କୋଚି, ୩୦ା୧୦: ଭାରତୀୟ ପରିବାର ପରିପ୍ରେକ୍ଷୀରେ ଶିଶୁଙ୍କ ଯତ୍ନ ଲାଗି ଜଣେ ମହିଳା ରହିବା ଜରୁରୀ ବୋଲି କେରଳ ହାଇକୋର୍ଟ ଟିପ୍ପଣୀ ଦେଇଛନ୍ତି। କାରଣ ଆମେ ସ୍କାଣ୍ଡିନାଭିଆନ୍ ଦେଶ ଭଳି ସ୍ତରରେ ପହଞ୍ଚିନାହୁଁ, ଯେଉଁଠି ସମଲିଙ୍ଗୀ ବିବାହ କରି ଯେ କେହି ବି ପିଲାର ଲାଳନପାଳନ ପାଇଁ ପ୍ରସ୍ତୁତ। ଗୁଜରାଟରେ ରହୁଥିବା ଜଣେ ୩୮ ବର୍ଷୀୟ ବ୍ୟକ୍ତି ତାଙ୍କ ୪ ବର୍ଷୀୟା ଝିଅଙ୍କୁ ଶ୍ୱଶୁର ଘରୁ ଆଣିବାକୁ ହାଇକୋର୍ଟରେ ଆବେଦନ କରିଥିଲେ। ତାଙ୍କ ଶ୍ୱଶୁର ଘର ଲୋକେ ଝିଅକୁ ବେଆଇନ ଭାବେ ଘରେ ରଖିଥିବା ସେ ଏଥିରେ ଦର୍ଶାଇଥିଲେ। ହେଲେ ଶିଶୁଙ୍କ ଯତ୍ନ ନେବା ଭଳି କୌଣସି ମହିଳା ସମ୍ପୃକ୍ତ ବ୍ୟକ୍ତିଙ୍କ ଘରେ କିମ୍ବା ସେ ରହୁଥିବା ସ୍ଥାନରେ ନ ଥିବା କୋର୍ଟ ଜାଣିବାକୁ ପାଇଥିଲେ। ପରେ ଜଷ୍ଟିସ୍ ଆଲେକ୍ଜାଣ୍ଡର ଏବଂ ସୋଫି ଥୋମାସ୍ଙ୍କ ଖଣ୍ଡପୀଠ ଶିଶୁକୁ ସମ୍ପୃକ୍ତ ବ୍ୟକ୍ତିଙ୍କୁ ହସ୍ତାନ୍ତର ପାଇଁ ମନା କରିଥିଲେ।
ଶିଶୁଙ୍କ ଦେଖାରଖା କରିବା ପାଇଁ ପରିବାରରେ ଜଣେ ମହିଳା ରହିବା ନିହାତି ଜରୁରୀ। ସେ ମା’ ହୁଅନ୍ତୁ ଅବା ଭଉଣୀ, ଶାଶୁ, ଜେଜେ ମା’, ଆଈ କିମ୍ବା ଅନ୍ୟ କେହି ମହିଳା। ସ୍କାଣ୍ଡିନାଭିଆନ୍ ଦେଶଗୁଡ଼ିକରେ ମହିଳା, ପୁରୁଷ ଶିଶୁଙ୍କ ପାଇଁ ସମାନ ଭାବେ ସେମାନଙ୍କ ସମୟ ଦେଇଥାନ୍ତି। ଏଥିରେ ଉଭୟେ ପିଲାଙ୍କ ଯତ୍ନ ନେବା ପାଇଁ ପ୍ରସ୍ତୁତଥା’ନ୍ତି। କିନ୍ତୁ ଭାରତ ପରିପ୍ରେକ୍ଷୀରେ ତାହା ହୋଇ ନ ଥାଏ। ଏଠାରେ ମୁଖ୍ୟତଃ ମହିଳାମାନେ ହିଁ ଶିଶୁଙ୍କ ଯତ୍ନ ଠିକ୍ ଭାବେ ନେଇପାରନ୍ତି। ୧୦ ବର୍ଷରୁ କମ୍ ବୟସର ପିଲାଙ୍କ ଦେଖାଶୁଣା କରିବା ସମ୍ପୃକ୍ତ ବ୍ୟକ୍ତିଙ୍କ ପାଇଁ କଷ୍ଟକର ହେବ ବୋଲି ହାଇକୋର୍ଟ ଆବେଦନକାରୀଙ୍କୁ କହିଥିଲେ। ସେ କାମକୁ ଯାଇଥିବାବେଳେ ତାଙ୍କ ପିଲା ବିପଦରେ ପଡ଼ିବା ଆଶଙ୍କା ରହିଛି। ସମ୍ପ୍ରତି ବହୁଶିଶୁ ଯୌନହିଂସାର ଶିକାର ହେଉଛନ୍ତି। ଏପରିସ୍ଥିତିରେ ପିଲାର ସୁରକ୍ଷା ସୁନିଶ୍ଚିତ କରିବା ଜରୁରୀ। ଏହା ଅତି ସମ୍ବେଦନଶୀଳ। ଶିଶୁକନ୍ୟାଟି ତାଙ୍କ ଆଈଅଜାଙ୍କ ପାଖରେ ରହିଛନ୍ତି, ଯାହା କି କୌଣସି ଦୃଷ୍ଟିରୁ ବେଆଇନ ନୁହେଁ। ପିଲାଙ୍କ ଯତ୍ନ ନେବାର ଯୋଗ୍ୟତାକୁ ଦେଖି ୪ ବର୍ଷୀୟା ଝିଅର ଦାୟିତ୍ୱ ଆବେଦନକାରୀଙ୍କୁ ଦେଇପାରିବେ ନାହିଁ ବୋଲି ହାଇକୋର୍ଟ କହିଥିଲେ। ତେବେ ଏହାକୁ ସମ୍ପୃକ୍ତ ବ୍ୟକ୍ତି ଚ୍ୟାଲେଞ୍ଜ କରିପାରିବେ ବୋଲି ଖଣ୍ଡପୀଠ କହିଥିଲେ। ମାମଲାର ପରବର୍ତ୍ତୀ ଆସନ୍ତା ସପ୍ତାହରେ ହେବ ବୋଲି ହାଇକୋର୍ଟ ଧାର୍ଯ୍ୟ କରିଛନ୍ତି।