କେନ୍ଦୁଝର, ୨୧ା୯ (ସ୍ବ.ପ୍ର.) -କେନ୍ଦୁଝରରେ ପନିପରିବା ଦର ଆକାଶ ଛୁଆଁ । ଏଭଳି ପରିସ୍ଥିତିରେ ବେପାରୀ ମାନେ ପରିବା ଦରକୁ ଆହୁରୀ ଅଧିକ ବଢାଇ ଦେଉଥିବାରୁ ଗ୍ରାହକ ଅସନ୍ତୋଷ ବୃଦ୍ଧି ପାଇବାରେ ଲାଗିଛି । ବାଇଗଣ, ଭେଣ୍ଡି, ଜହ୍ନି, କାକୁଡି, ଲାଉ, କଦଳୀ, ବିଲାତି, ବୋଇତାଳୁ, ଅମୃତଭଣ୍ଡା, କାଙ୍କଡ ଆଦି ସବୁ ପରିବାର ଦର ପାଖାପାଖି ଦୁଇ ଗୁଣା ବଢିଯାଇଥିବାରୁ ଗ୍ରାହକ ଅସନ୍ତୋଷ ବଢୁଛି । ଏସବୁ କିଲୋ ୫୦ରୁ ୧୨୦ ଟଙ୍କା ପର୍ଯ୍ୟନ୍ତ ଥିବା ବେଳେ ଶାଗ ବିଡା ୧୦ ଟଙ୍କାରେ ବିକ୍ରି ହେଉଛି । ଏବେଠୁଁ ଏଭଳି ଦର ହୋଇଥିବା ବେଳେ ଆଗକୁ କାର୍ତ୍ତିକ ମାସ ଥିବାରୁ ସେତେବେଳେ ଦରଦାମ୍ କଣ ହେବ ସେ ନେଇ ଗ୍ରାହକଙ୍କ ବଡ଼ ଚିନ୍ତା।
ଏହା ମଧ୍ୟରେ ପାହାଡିଆ ବୁଢା କାକୁଡ଼ିର ଚାହିଦା ବଢୁଛି । ଏହି ବଡ ବଡ ସାଇଜର କାକୁଡିକୁ ରାଇ କରି ବା ତେନ୍ତୁଳି ବା ଆମ୍ବୁଲ ମିଶାଇ ଖଟା କରି ଲୋକେ ଖାଇଥାନ୍ତି। ଏହି ସମୟରେ ବୁଢା କାକୁଡି ଗୋଟା ୧୦ଟଙ୍କାରେ ବିକ୍ରି ହେଉଛି। ପାହାଡିଆ ପନିପରିବା ବୋଲି ଲୋକଙ୍କ ଚାହିଦା ଅଧିକ। ବିନା ରସାୟନିକ ସାରରେ ଏସବୁ ଚାଷ କରାଯାଉଥିବାରୁ ସମସ୍ତେ କିଣି ନେଉଛନ୍ତି । ତେବେ ବେପାରୀମାନେ ପାହାଡିଆ ଲୋକଙ୍କ ଠାରୁ କମ ଦାମରେ ଅନେକ ପନିପରିବା ମୂଲାଇ କିଣି ନେଇ ବିନା ପରିଶ୍ରମରେ ପାଖାପାଖି ୨ ଗୁଣା ଅଧିକରେ ବିକି ବେଶ ଲାଭ କରୁଛନ୍ତି ା କିନ୍ତୁ ପାହାଡିଆ ଲୋକଙ୍କ ଆର୍ଥିକ ସ୍ଥିତି ରେ ସୁଧାର ହେଉନାହିଁ ।
କେନ୍ଦୁଝର ସହରରେ କୃଷକ ବଜାର ଥାଉ ଥାଉ ଡେଲି ମାର୍କେଟ, ମୁଖ୍ୟବଜାର ରାସ୍ତା କଡରେ, ଜେଲ ରୋଡ, ପୋଲିସ ହାଇସ୍କୁଲ ରାସ୍ତା କଡରେ ପନିପରିବା ବିକ୍ରି ହୋଇଥାଏ ା ତେବେ ଚାଷୀ ମାନଙ୍କ ଅପେକ୍ଷା ବେପାରୀ ମାନଙ୍କ ସଂଖ୍ୟା ବୃଦ୍ଧି ପାଇବାରେ ଲାଗୁଥିବାରୁ ଚାଷୀ ତଥା ବନବାସୀ ମାନେ ଅନେକ ସମୟରେ ଶୋଷିତ ହେଉଛନ୍ତି ା ଅନେକ ସମୟରେ ଫୁଟପାଥ, ରାସ୍ତା ଉପରେ ବସି ବିକୁଥିବାରୁ ରାସ୍ତା ଜାମ ହେଉଛି ଏବଂ ଟ୍ରାଫିକ ସମସ୍ୟା ଗୁରୁତର ହୋଇ ପଡୁଛି ା ଏଣୁ ଏନେଇ ଜିଲା ପ୍ରଶାସନ ପକ୍ଷରୁ ସେମାନଙ୍କ ସୁରକ୍ଷା କରିବା ସହ ବେପାରୀ ମାନଙ୍କ ପାଇଁ ସ୍ବତନ୍ତ୍ର ନୀତିନିୟମ ଲାଗୁ କରିବାକୁ ଦାବି ହେଉଛି ା