ଲାଠୋର, ୧୩।୧୧ (ଡି.ଏନ.ଏ.)
ବଲାଙ୍ଗର ଜିଲା ଖପ୍ରାଖୋଲ ବ୍ଲକ ଲାଠୋର ଅଞ୍ଚଳରେ ପରିବା ଦର ଆକାଶ ଛୁଆଁ ହୋଇଛି । ଫଳରେ ଗରିବ ତଥା ମଧ୍ୟବିତ୍ତ ଶ୍ରେଣୀର ଲୋକଙ୍କ ପକ୍ଷେ ପରିବା କିଣି ଖାଇବା ସମ୍ଭବ ହେଉନାହିଁ । କରୋନା କଟକଣା ଯୋଗୁ ଲୋକଙ୍କ ରୋଜଗାର ଠପ୍ ହୋଇପଡିଛି । ଟଙ୍କାଟିଏ ରୋଜଗାର କରିବା ଗରିବଙ୍କ ପକ୍ଷେ କଷ୍ଟକର ହେଉଛି। ଏପରି ସ୍ଥଳେ ଲାଠୋର ଅଞ୍ଚଳରେ ପରିବା ଦର ବୃଦ୍ଧି ସେମାନଙ୍କ ଦୈନିକ ଚଳଣି ଉପରେ ଗଭୀର ପ୍ରଭାବ ପକାଇଛି । ଆଳୁ କିଲୋ ପିଛା ୫୦ ଟଙ୍କା, ଡାଲି ୧୨୦, ପିଆଜ ୮୦, ଫୁଲକୋବି ୮୦, ଟମୋଟୋ ୬୦, ବାଇଗଣ ୬୦, ଭେଣ୍ଡି ୮୦ ଟଙ୍କା କିଲୋ ଥିବା ବେଳେ ଶାଗ କିଲୋ ପିଛା ୫୦ ଟଙ୍କାରେ ବିକ୍ରି ହେଉଛି । ସରକାରୀ ଲଗାମର ଅଭାବ ହେତୁ ଏହି ଅଞ୍ଚଳର ବେପାରୀମାନେ ଚଢ଼ା ଦରରେ ପରିବା ବିକ୍ରି କରୁଥିବାରୁ ତାର ପ୍ରଭାବ ସିଧାସଳଖ ପ୍ରଭାବ ଗରିବ ଏବଂ ମଧ୍ୟବିତ୍ତ ପରିବାର ଉପରେ ପଡୁଛି । ବେପାରୀଙ୍କୁ ପଚାରିଲେ କୁହନ୍ତି, ଆଖପାଖରେ ପରିବା ମଣ୍ଡି ନ ଥିବାରୁ ଆମେ ବାଧ୍ୟ ହୋଇ ଛତିଶଗଡର ରାୟପୁର, ମହାସମୁନ୍ଦ, ଭିଲାଇ, ଦୁର୍ଗ ମଣ୍ଡିରୁ ପରିବା ଆଣୁଛୁ। ଫଳରେ ଦର ଅଧିକ ହେଉଛି । ଏଥିପ୍ରତି ଜିଲା ପ୍ରଶାସନ ସ୍ବତନ୍ତ୍ର ଦୃଷ୍ଟି ଦେଇ ଏହି ଅଞ୍ଚଳରେ ପରିବା ମଣ୍ଡି କରିବା ଦିଗରେ ପଦକ୍ଷେପ ଗ୍ରହଣ କରିବାକୁ ଅଞ୍ଚଳବାସୀ ଦାବି କରିଛନ୍ତି ।