ଭୁବନେଶ୍ୱର,୨୭।୨: ଭାରତୀୟ ଷ୍ଟେଟ ବ୍ୟାଙ୍କ ଅଧିକାରୀ ସଂଘ ଓଡ଼ିଶା ସର୍କଲର ବାର୍ଷିକ ସାଧାରଣ ସଭା ରବିବାର ସ୍ଥାନୀୟ କିଟ୍ ବିଶ୍ୱବିଦ୍ୟାଳୟ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି। ଉକ୍ତ ସଭାରେ ଓଡ଼ିଶାର କୋଣ ଅନୁକୋଣରୁ ପ୍ରାୟ ୨୦୦୦ରୁ ଅଧିକ ଷ୍ଟେଟ ବ୍ୟାଙ୍କ ଅଧିକାରୀ ଯୋଗଦାନ କରିଥିଲେ। ଷ୍ଟେଟ ବ୍ୟାଙ୍କ ଭୁବନେଶ୍ବର ମଣ୍ଡଳର ମୁଖ୍ୟ ମହାପ୍ରବନ୍ଧକ ଚନ୍ଦ୍ରଶେଖର ଶର୍ମା ସମ୍ମାନିତ ଅତିଥି ଭାବେ ଯୋଗଦେଇ ଏହାର ଉଦ୍ଘାଟନ କରିଥିଲେ। ସଂଘର ସାଧାରଣ ସଭାପତି ତଥା ଏଆଇବିଓସିର ସାଧାରଣ ସମ୍ପାଦକ ରୂପମ ରାୟ, ଷ୍ଟେଟ ବ୍ୟାଙ୍କ ଭୁବନେଶ୍ବର ମଣ୍ଡଳ କର୍ମଚାରୀ ସଂଘର ସାଧାରଣ ସମ୍ପାଦକ ତଥା ୟୁଏଫବିୟୁ ଓଡ଼ିଶାର ଆବାହକ ଆର.ପି.ଦାସଙ୍କ ସମେତ ଷ୍ଟେଟ ବ୍ୟାଙ୍କର ସମସ୍ତ ମଣ୍ଡଳର ଅଧିକାରୀ ସଂଘର ସଭାପତି ଓ ସାଧାରଣ ସମ୍ପାଦକମାନେ ଉକ୍ତ ସଭାରେ ସମ୍ମାନିତ ଅତିଥି ଭାବେ ଯୋଗଦାନ କରିଥିଲେ।
ଷ୍ଟେଟ ବ୍ୟାଙ୍କ ଭୁବନେଶ୍ବର ମଣ୍ଡଳ ଅଧିକାରୀ ସଂଘର ସାଧାରଣ ସମ୍ପାଦକ ଅରୁଣ କୁମାର ବିଶୋୟୀ ସ୍ବାଗତ ଅଭିଭାଷଣ ପ୍ରଦାନ ସହ ରାଜ୍ୟରେ ସଂଘର ବଳିଷ୍ଠ ନେତ୍ୱତୃ ପାଇଁ ସମସ୍ତ ସଦସ୍ୟ ସହୃଦୟ ସହଯୋଗ ବଜାୟ ରଖିଥିବାରୁ ବିଶୋୟୀ ପ୍ରଶଂସା କରିଥିଲେ। ଏପରିକି ଜୀବନରେ ପରିବାର ଓ କର୍ମକ୍ଷେତ୍ର ମଧ୍ୟରେ ସମତୁଲ ରଖିବା ପାଇଁ ବିଶୋୟୀ ଉପସ୍ଥିତ ଅଧିକାରୀ ଓ ଅତିଥିମାନଙ୍କୁ ପ୍ରେରଣା ଦେଇଥିଲେ। ବିଶେଷ କରି ଅଧିକାରୀମାନଙ୍କ ସମସ୍ୟାକୁ ସୁଚାରୁ ଭାବେ ସମାଧାନ କରିଥିବାରୁ ସେ ମଣ୍ଡଳ ପ୍ରବନ୍ଧନ ସମିତି ସଭ୍ୟମାନଙ୍କୁ ଧନ୍ୟବାଦ ଜଣାଇଥିଲେ। ସେହିଭଳି ଉକ୍ତ ଅଧିବେଶନରେ ଷ୍ଟେଟ ବ୍ୟାଙ୍କ ଅଧିକାରୀ ସଂଘ ଭୁବନେଶ୍ବର ମଣ୍ଡଳର ସଭାପତି ଅମିତାଭ ଦାସ ସଭାପତିତ୍ୱ କରିଥିଲେ। ସଭା ଶେଷରେ ସଂଘର ଆନୁଷ୍ଠାନିକ ସମ୍ପାଦକ ସଦାଶିବ ବିଶି ଧନ୍ୟବାଦ ଅଭିଭାଷଣ ପ୍ରଦାନ କରିଥିଲେ।