ସୋନପୁର,୧୭।୯(ନି.ପ୍ର.): ସୁବର୍ଣ୍ଣପୁରର ପ୍ରସିଦ୍ଧ ମହାବଳୀ ଯାତ୍ରା ଓ ଦଶହରା ପୂଜା ପାଇଁ ଏକ ପ୍ରସ୍ତୁତି ବୈଠକ ଅତିରିକ୍ତ ଜିଲାପାଳ ସୂର୍ଯ୍ୟନାରାୟଣ ଦାଶଙ୍କ ଅଧ୍ୟକ୍ଷତାରେ ଶୁକ୍ରବାର ଅନୁଷ୍ଠିତ ହୋଇଯାଇଛି। ସୋନପୁର ଉପଜିଲାପାଳ ତଥା ଦେବୋତ୍ତର ଅଧିକାରୀ ଡକ୍ଟର ଇପ୍ସିତା ପ୍ରିୟଦର୍ଶନୀ ମିଶ୍ରଙ୍କ ଆବାହକତ୍ୱରେ ଜିଲା ଯୋଜନା ଓ ସମନ୍ବୟ ବିଭାଗର କାର୍ଯ୍ୟାଳୟ ସଭାଗୃହରେ ଏହି ବୈଠକ ଅନୁଷ୍ଠିତ ହୋଇଥିଲା। ଚଳିତବର୍ଷ ଦଶହରା ପୂଜା ଓ ମହାବଳୀ ଯାତ୍ରାର ବିଭିନ୍ନ ପୂଜା ଏବଂ ବଳି ପର୍ବ ପରମ୍ପରା ଅନୁଯାୟୀ ଯଥାରୀତି ପାଳନ ପାଇଁ ନିଷ୍ପତ୍ତି ହୋଇଛି। ସହରର ବିଭିନ୍ନ ଦେବୀ ମନ୍ଦିରରେ ପୂଜା ଓ ନିର୍ଦ୍ଦିଷ୍ଟ ସମୟ ନିର୍ଘଣ୍ଟ ଉପରେ ବିଶଦ ଆଲୋଚନା ହୋଇଥିଲା। ବଳି ଯାତ୍ରାର ମୁଖ୍ୟ ବରୁଆ ବିକାର ନେଗୀଙ୍କ ପରଲୋକ ହୋଇଥିବାରୁ ତାଙ୍କ ବିୟୋଗରେ ଶୋକ ସଭା ଅନୁଷ୍ଠିତ ହୋଇଥିଲା। ସୁବାଷ ନେଗୀ ଚଳିତ ବର୍ଷ ମୁଖ୍ୟ ବରୁଆ ଦାୟିତ୍ୱ ନିର୍ବାହ କରିବେ ବୋଲି ସ୍ଥିର ହୋଇଥିଲା । ବୈଠକରେ ଅଧିକାରୀ, ସେବାୟତ ଓ ଯାତ୍ରା ସହିତ ଜଡିତ ସହରର ବିଶିଷ୍ଟ ବ୍ୟକ୍ତିମାନେ ଏହି ଯୋଗଦାନ କରିଥିଲେ। ନିରବିଚ୍ଛିନ୍ନ ବିଦ୍ୟୁତ୍ ଯୋଗାଣ, ମନ୍ଦିର ଗୁଡିକୁ ସମୟ ପୂର୍ବରୁ ରଙ୍ଗ ଲଗାଇବା, ମନ୍ଦିର ପରିବେଶ ସଫାସୁତୁରା, ଶାନ୍ତି ଶୃଙ୍ଖଳା ରକ୍ଷା ଓ ସେବା ପୂଜା ଉପରେ ଆଲୋଚନା ହୋଇଥିଲା। ରାଜପୁରୋହିତ ଦୀପକ କୁମାର ପୁରୋହିତ ବଳିଯାତ୍ରା ସମ୍ପର୍କରେ ସୂଚନା ଦେଇଥିଲେ। ସେପ୍ଟେମ୍ବର ୨୫ ତାରିଖ ଅମାବାସ୍ୟା ତିଥି ଅପରାହ୍ନରେ ବାହୁତି ବିଜୟ ଛତ୍ର ସୁରେଶ୍ୱରୀ ମନ୍ଦିର ଠାରୁ ବାହାରି ସମଲେଶ୍ୱର ମନ୍ଦିରକୁ ଯିବ। ରାତିରେ ଜିଲାର ଇଷ୍ଟଦେବୀ ମା ସୁରେଶ୍ୱର, ସମଲେଶ୍ୱରୀ ଓ ବୁଢାରାଜାଙ୍କ ପୀଠରେ ପୂଜା ଓ ବଳି, ୨୬ ତାରିଖରୁ ୯ ଦିନ ବ୍ୟାପୀ ପୂଜାରମ୍ଭ ଓ ସମଲେଶ୍ୱରୀ ପୀଠରେ ପୂଜା ବଳି ହେବ। ୨୭ ତାରିଖରେ ଦ୍ୱିତୀୟା ପୂଜା ବଳି। ସେହିପରି ୨୯ ତାରିଖ ବିଳମ୍ବିତ ରାତିରେ ସୁରେଶ୍ୱରୀଙ୍କ ପୀଠରେ ଖଉଳ ବଳି, ୩୦ ତାରିଖରେ ଦୁର୍ଗାଦେବୀଙ୍କର ସମଲେଶ୍ୱରୀ ମଣ୍ଡପରେ ଷୋଡଷ ଉପଚାରରେ ପୂଜା, ଅକ୍ଟୋବର ୩ ତାରିଖରେ ମହାଷ୍ଟମୀ ପୂଜା ଓ ଅଷ୍ଟଚଣ୍ଡୀ ପୀଠରେ ମହାଖଳା ପୂଜା, ଡାଙ୍ଗୁଆ ବଳି ଓ ଭୋରରେ ମହାବଳି ଯାତ୍ରା ଏବଂ ସମସ୍ତ ଶକ୍ତିପୀଠରେ ଦଶହରା ପୂଜା ଆୟୋଜନ ସମ୍ପର୍କରେ ବିଶଦ ଆଲୋଚନା ହୋଇଥିଲା। ସୋନପୁର ଏସଡିପିଓ ପୁଷ୍ପାଞ୍ଜଳି ନିଙ୍ଗି, ତହସିଲଦାର ନବୀନ କିଶୋର ପାଢୀ, ସୋନପୁର ଆଇଆଇସି କୃଷ୍ଣଚନ୍ଦ୍ର ମେହେର, ଡାକ୍ତର ରମେଶ ଚନ୍ଦ୍ର ସ୍ବାଇଁ, ଦେବୋତ୍ତର ପରିଚାଳକ ମେଘନାଦ ମନହିରା, ନୀଳାମ୍ବର ଶତପଥୀ, ସାମାଜିକକର୍ମୀ ଶ୍ରୀବତ୍ସ ମଲ୍ଳିକ, ଦେବୋତ୍ତର ଉପଦେଷ୍ଟା କମିଟିର ସଭ୍ୟାସଭ୍ୟ ବୈଠକରେ ଯୋଗଦାନ କରି ଆଲୋଚନାରେ ଅଂଶଗ୍ରହଣ କରିଥିଲେ।