ଚେନ୍ନାଇ,୬।୭: ୨୦୦୮ରେ ଚେନ୍ନାଇ ସୁପର କଙ୍ଗ୍ସ (ସିଏସ୍କେ) ସହ ଯୋଡ଼ି ହୋଇଥିଲେ ମହେନ୍ଦ୍ର ସିଂ ଧୋନୀ। ତା’ ପରଠୁ ସବୁ ଇତିହାସ ପାଲଟି ଯାଇଛି। ଧୋନୀଙ୍କ ନେତୃତ୍ୱରେ ସିଏସ୍କେ ୩ ଥର ଆଇପିଏଲ ଟ୍ରଫି ହାତେଇଥିବାବେଳେ ଦୁଇ ଥର ଜିତିଛି ଚାମ୍ପିୟନ୍ସ ଟ୍ରଫି। ପ୍ରତ୍ୟେକ ସିଜନରେ ସିଏସ୍କେ ନେତୃତ୍ୱ ନେଇଛନ୍ତି ଧୋନୀ। ଚଳିତ ବର୍ଷ ମଧ୍ୟ ପ୍ଲେ-ଅଫ୍ସରେ ସିଏସ୍କେର ସ୍ଥାନ ପ୍ରାୟତଃ ପକ୍କା ହୋଇସାରିଛି। ଆଗାମୀ ବର୍ଷ ଆଇପିଏଲ ପୂର୍ବରୁ ବଡ଼ ଅକ୍ଶନ ହେବ। ଏବେ ଠାରୁ ଧୋନୀଙ୍କ ଭବିଷ୍ୟତ ନେଇ ଆରମ୍ଭ ହୋଇଗଲାଣି ଫ୍ୟାନ୍ସଙ୍କ ମଧ୍ୟରେ କଳ୍ପନାଜଳ୍ପନା।
ପୂର୍ବତନ ଅଷ୍ଟ୍ରେଲିଆନ ସ୍ପିନର ବ୍ରାଡ୍ ହଗ୍ଙ୍କୁ ଜଣେ ପ୍ରଶଂସକ ପ୍ରଶ୍ନ କରିଥିଲେ, ”ସିଏସ୍କେ ଧୋନୀଙ୍କୁ ଦଳରେ ନ ରଖିଲେ, କେଉଁ ଆଇପିଏଲ ଫ୍ରାଞ୍ଚାଇଜ ତାଙ୍କ ଅଭିଜ୍ଞତାକୁ ବ୍ୟବହାର କରିବାକୁ ଚାହିଁବ“। ଏହାର ଉତ୍ତରରେ ହଗ୍ ଟୁଇଟ୍ କରିଛନ୍ତି, ଧୋନୀ ଚେନ୍ନାଇ ଛାଡ଼ୁ ନାହାନ୍ତି। ସେ ଫ୍ରାଞ୍ଚାଇଜର ମହାରାଜା। ଯଦି ଖେଳାଳି ଭାବେ ସେ ନ ଖେଳନ୍ତି, ତେବେ ସେ କୋଚ୍ ଭାବେ ଦଳକୁ ସାହାଯ୍ୟ କରିବେ।
