ନୂଆଦିଲ୍ଲୀ,୨୧।୧୧: ଚଳିତ ବର୍ଷ କ୍ରିକେଟ ବିଶ୍ୱକପ ଫାଇନାଲରେ ଭାରତର ପରାଜୟ ହେତୁ ଦେଶବାସୀଙ୍କ ହୃଦୟ ଭାଙ୍ଗି ଯାଇଥିଲା। ଏହି ସମୟରେ ତିନି ଜଣ ଯୁବକଙ୍କର ମୃତ୍ୟୁ ହୋଇଥିବା କୁହାଯାଉଛି। ଭାରତର ପରାଜୟରେ ଦୁଃଖିତ, ଜଣେ ୨୩ବର୍ଷୀୟ ଯୁବକ ପଶ୍ଚିମବଙ୍ଗର ବ୍ୟାଙ୍କୁରା ଜିଲାରେ ନିଜକୁ ଫାଶୀ ଦେଇଥିବା ଅଭିଯୋଗ ହୋଇଛି। ଏଥି ସହ ଉତ୍ତରପ୍ରଦେଶର ସାହାରନପୁର ଜିଲାରେ ଜଣେ ୬୦ବର୍ଷ ବୟସ୍କ ବ୍ୟକ୍ତିଙ୍କ ହୃଦଘାତରେ ମୃତ୍ୟୁ ଘଟିଥିବା ବେଳେ ଆନ୍ଧ୍ରପ୍ରଦେଶର ତିରୁପତି ଜିଲାର ଜଣେ ସଫ୍ଟୱେୟାର ଇଞ୍ଜିନିୟର ହୃଦଘାତରେ ମୃତ୍ୟୁ ବରଣ କରିଛନ୍ତି।
ବେଙ୍ଗାଲୁରୁ ପୋଲିସର ସୂଚନାନୁସାରେ ମୃତ ରାହୁଲ ଲୋହରଙ୍କ ସମ୍ପର୍କୀୟ ଉତ୍କଳ ସୁର କହିଛନ୍ତି ଯେ ସେ ଏକ ପୋଷାକ ଦୋକାନରେ କାମ କରୁଥିଲେ ଏବଂ ଫାଇନାଲ ମ୍ୟାଚ ଦେଖିବା ପାଇଁ ରବିବାର ଛୁଟି ନେଇଥିଲେ। ଭାରତର ପରାଜୟରେ ଦୁଃଖିତ ହୋଇ ରବିବାର ରାତି ପ୍ରାୟ ୧୧ଟା ସମୟରେ ସେ ନିଜ କୋଠରୀରେ ଫାଶୀ ଲଗାଇ ଦେଇଥିଲେ। ପୋଲିସର ସୂଚନାନୁସାରେ, ଘଟଣା ସମୟରେ ଘରେ ଆଉ କେହି ନଥିଲେ।
ଦ୍ୱିତୀୟ ଘଟଣା ଉତ୍ତରପ୍ରଦେଶର ସାହାରନପୁରରେ ଘଟିଥିଲା। ଭାରତର ପରାଜୟରେ ଚକିତ ହୋଇ ୬୦ବର୍ଷ ବୟସ୍କ ବ୍ୟକ୍ତିଙ୍କ ହୃଦଘାତରେ ମୃତ୍ୟୁ ଘଟିଛି। ପୁଅ କୁଲଦୀପ କହିଛନ୍ତି ଯେ ପିତା ମହାବୀର କ୍ରିକେଟ ପ୍ରେମୀ ଥିଲେ। ରବିବାର ରାତିରେ ଭାରତ ହାରିଯିବା ମାତ୍ରେ ସେ ହୃଦଘାତରେ ପୀଡିତ ହୋଇଥିଲେ। କହିଥିଲେ ଯେ ୧୯୮୩ରେ ଯେତେବେଳେ କପିଲ ଦେବଙ୍କ ଦଳ କ୍ରିକେଟ ବିଶ୍ୱକପ ଜିତିଥିଲା, ସେତେବେଳେ ତାଙ୍କ ପିତା ପୁରା ଗାଁରେ ମିଠା ବାଣ୍ଟିଥିଲେ। ଏଥର ମଧ୍ୟ ସେ ଭାରତୀୟ ଦଳର ବିଜୟ ଉପରେ ସମ୍ପୂର୍ଣ୍ଣ ଆତ୍ମବିଶ୍ୱାସୀ କରିଥିଲେ।
ତୃତୀୟ ଘଟଣା ଆନ୍ଧ୍ରପ୍ରଦେଶର ତିରୁପତି ଜିଲାରେ ଘଟିଛି। ଏଠାରେ ରହୁଥିବା ସଫ୍ଟୱେୟାର ଇଞ୍ଜିନିୟର ୩୨ବର୍ଷିୟ ଜ୍ୟୋତି କୁମାର ଯାଦବ ଭାରତର ପରାଜୟ ସହ୍ୟ କରିପାରିନଥିଲେ। ପରାଜୟର ଝଟକା ଯୋଗୁଁ ଭାରତୀୟ ଦଳର ଜଣେ ଦୃଢ ସମର୍ଥକ ଜ୍ୟୋତି କୁମାରଙ୍କର ହୃଦଘାତରେ ମତ୍ୟୁ ହୋଇଥିଲା। ତିରୁମାଲା ତିରୁପତି ଦେବସ୍ତାନମ୍ସର ଅବସରପ୍ରାପ୍ତ କର୍ମଚାରୀଙ୍କ ପୁଅ ଜ୍ୟୋତି କୁମାରଙ୍କର ନିକଟରେ ବିବାହ ହୋଇଥାଆନ୍ତା।