ମୁମ୍ବାଇ: ହିନ୍ଦୀ ଫିଲ୍ମ ଇଣ୍ଡଷ୍ଟ୍ରିର ବେବି ଡଲ୍ କୁହାଯାଉଥିବା ସନି ଲିଓନିଙ୍କ ଫ୍ୟାନ୍ସମାନେ ଭିନ୍ନ ଢଙ୍ଗରେ ତାଙ୍କ ଜନ୍ମଦିନ ପାଳିଛନ୍ତି। ଯାହା ପାଇଁ ସନି ମଧ୍ୟ ବେଶ୍ ଖୁସିଥିବା ବେଳେ ତାଙ୍କୁ ଧନ୍ୟବାଦ ଜଣାଇଛନ୍ତି। କର୍ନାଟକର ମାଣ୍ଡ୍ୟା ଗାଁରେ ସନିଙ୍କ ପ୍ରଶଂସକ ତାଙ୍କ ଜନ୍ମଦିନ ଅବସରରେ ଏକ ରକ୍ତଦାନ ଶିବିରର ଆୟୋଜନ କରିଥିଲେ। ଏହି ଆୟୋଜନ ବିଷୟରେ ସନି ଅବଗତ ନ ଥିବା ବେଳେ ଖବରକାଗଜରେ ଏହାର ସୂଚନା ପାଇଥିଲେ। ଏହାର ଏକ ଫଟୋ ଏବେ ସେ ନିଜ ଇନ୍ଷ୍ଟାଗ୍ରାମରେ ଶେୟାର କରିଛନ୍ତି। ଯାହା ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। କର୍ନାଟକରେ ତାଙ୍କ ପ୍ରଶଂସକଙ୍କ ଏପ୍ରକାର ଭଲପାଇବା ଦେଖି ଅଭିନେତ୍ରୀ ଜଣଙ୍କ ଭାବ ବିହ୍ବଳ ହେବା ସହ ଫ୍ୟାନ୍ସମାନଙ୍କୁ ଧନ୍ୟବାଦ ଜଣାଇଛନ୍ତି। ଯଦି ସେ ଏ ବିଷୟରେ ଅବଗତ ହୋଇଥାନ୍ତେ ନିହାତି ଭାବେ କାର୍ଯକ୍ରମରେ ସାମିଲ ହେବାକୁ ଚେଷ୍ଟା କରିଥାନ୍ତେ ବୋଲି ସେ ଉକ୍ତ ପୋଷ୍ଟରେ ଲେଖିଛନ୍ତି। ସୂଚନାଯୋଗ୍ୟ, ଗତ ୧୩ ତାରିଖରେ ବି. ଟାଉନ୍ ଅଭିନେତ୍ରୀ ଜଣକ ତାଙ୍କ ୪୧ତମ ଜନ୍ମଦିନ ପାଳନ କରିଥିଲେ। ରିଆଲିଟି ଶୋ’ ବିଗ୍ବସ୍ ସିଜନ୍ ୫ରୁ ସନି ହିନ୍ଦୀ ମନୋରଞ୍ଜନ ଜଗତକୁ ପ୍ରବେଶ କରିଛନ୍ତି। ଜିସ୍ମ-୨ ତାଙ୍କ ଅଭିନୀତ ପ୍ରଥମ ଫିଲ୍ମ ହୋଇଥିବା ବେଳେ ବେବି ଡଲ୍ ସଙ୍ଗ୍ ତାଙ୍କୁ ଇଣ୍ଡଷ୍ଟ୍ରିରେ ଏକ ସ୍ବତନ୍ତ୍ର ପରିଚୟ ଦେଇଥିଲା। ଅଭିନୟ ସାଙ୍ଗକୁ ହୋଷ୍ଟିଂ ଜଗତରେ ମଧ୍ୟ ସନି ନିଜର ଏକ ସ୍ବତନ୍ତ୍ର ସ୍ଥାନ ତିଆରି କରିପାରିଛନ୍ତି।