ମୁମ୍ବାଇ,୨୧।୧: ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତଙ୍କ ୩୫ତମ ଜୟନ୍ତୀ ଗୁରୁବାର ପାଳିତ ହେଉଛି। ୧୯୮୬ ଜାନୁୟାରୀ ୨୧ରେ ସେ ବିହାର ପାଟନାଠାରେ ଜନ୍ମଗ୍ରହଣ କରିଥିଲେ। ଇଞ୍ଜିନିୟରିଂ ପାଠ ଶେଷ ପରେ ସେ ଛୋଟ ପରଦାରେ ପବିତ୍ର ରିସ୍ତା ସିରିଏଲ୍ରେ ଅଙ୍କିତା ଲୋଖଣ୍ଡେଙ୍କ ସହିତ ଅଭିନୟ କରି ଦେଶର ଘରେ ଘରେ ବେଶ୍ ଚର୍ଚ୍ଚାରେ ରହିଥିଲେ। ଏହି ସିରିଏଲ୍ରୁ ଅଙ୍କିତାଙ୍କ ସହିତ ତାଙ୍କର ଅନ୍ସ୍କ୍ରିନ୍ ତଥା ଅଫ୍ସ୍କ୍ରିନ୍ ରୋମାନ୍ସ୍ ଆରମ୍ଭ ହୋଇଥିଲା। ପରେ ସୁଶାନ୍ତଙ୍କୁ ବଲିଉଡ୍ରୁ ମିଳିଥିଲା ଅଫର। ପିକେ ଫିଲ୍ମ ତାଙ୍କ ଜୀବନର ଗତିପଥ ବଦଳାଇ ଦେଇଥିଲା। ପରେ ଅଙ୍କିତାଙ୍କ ସହିତ ତାଙ୍କର ୬ ବର୍ଷର ସମ୍ପର୍କରେ ଫାଟ ଦେଖାଦେଇଥିଲା। ଦୁହିଁଙ୍କର ବ୍ରେକ୍ ଅପ୍ ହୋଇଥିଲା। ଏହାପରେ କ୍ରିତି ସେନନଙ୍କ ସହିତ ତାଙ୍କର ଡେଟିଂ ନେଇ ବଲିଉଡ୍ରେ ବେଶ୍ ଚର୍ଚ୍ଚା ହୋଇଥିଲା। ଏମ୍.ଏସ୍. ଧୋନୀ, କେଦାରନାଥ, ସୋନଚିରିଆ, ଛିଛୋରେ, ଡ୍ରାଇଭ୍ ଆଦି ଫିଲ୍ମରେ ତାଙ୍କ ଅଭିନୟକୁ ଦର୍ଶକ ବେଶ୍ ପସନ୍ଦ କରିଥିଲେ। ସେହିପରି ଦିଲ୍ ବେଚାରା, ପାନି ଆଦି ଫିଲ୍ମ ପ୍ରଶଂସକଙ୍କୁ ବେଶ୍ ଆକର୍ଷିତ କରିଥିଲା। ୨୦୨୦ ଜୁନ୍ ୧୪ରେ ମୁମ୍ବାଇର ଓ୍ବେଷ୍ଟବାନ୍ଦ୍ରାସ୍ଥିତ ବାସଭବନରେ ସୁଶାନ୍ତ ଆତ୍ମହତ୍ୟା କରିଥିଲେ। ତାଙ୍କ ଜନ୍ମଦିନରେ ପ୍ରଶଂସକଙ୍କ ମଧ୍ୟରେ ନିରାଶ ଭାବ ଖେଳି ଯାଇଛି।
