ନୂଆଦିଲ୍ଲୀ,୧୪।୧: ଭାରତୀୟ ଟିମ୍ ଏବେ ଶ୍ରୀଲଙ୍କା ବିପକ୍ଷରେ ଦିନିକିଆ ସିରିଜ ଖେଳୁଛି। ହେଲେ ଶୁକ୍ରବାର ବିସିସିଆଇ ଅଷ୍ଟ୍ରେଲିଆ ସିରିଜ ଲାଗି ଦଳ ଘୋଷଣା କରିଛି। ଦୁଇ ଟେଷ୍ଟ ମ୍ୟାଚ୍ ଲାଗି ଘୋଷଣା କରାଯାଇଥିବା ଟିମ୍ରେ ସୂର୍ଯ୍ୟକୁମାରଙ୍କୁ ସୁଯୋଗ ମିଳିଛି। ହେଲେ ପ୍ରଶଂସକମାନେ ଏହି ଫର୍ମାଟରେ ତାଙ୍କ ଚୟନକୁ ନେଇ ଖପ୍ପା ହୋଇଛନ୍ତି। ଟି୨୦ ଫର୍ମାଟରେ ସେ ରନ୍ କରୁଥିବା ବେଳେ ଲମ୍ବା ଫର୍ମାଟରେ ନିଜକୁ ସାବ୍ୟସ୍ତ କରିବାକୁ ପଡ଼ିପାରେ ବୋଲି ଅନେକେ କହୁଛନ୍ତି। ଏହାଛଡ଼ା ମୁମ୍ବାଇର ସରଫରାଜ ଖାଁଙ୍କୁ ଦଳରେ ସାମିଲ କରାଯାଇ ନ ଥିବା ନେଇ ମଧ୍ୟ ପ୍ରଶ୍ନ କରାଯାଉଛି।
ସରଫରାଜ ଘରୋଇ କ୍ରିକେଟରେ ଉଲ୍ଲେଖନୀୟ ପ୍ରଦର୍ଶନ କରିଆସୁଛନ୍ତି। ରଣଜୀ ଟ୍ରଫି ସିଜନରେ ସରଫରାଜ ମୁମ୍ବାଇ ପାଇଁ ୪୩୧ ରନ୍ କରିଛନ୍ତି। ଏଥିରେ ୨ ଶତକ ଏବଂ ୧ ଅର୍ଦ୍ଧଶତକ ରହିଛି। ଗତ ସିଜନରେ ମଧ୍ୟ ସେ ମାତ୍ର ୬ ମ୍ୟାଚ୍ରେ ୯୮୨ ରନ୍ କରିଥିଲେ। ଏହାକୁ ନେଇ କ୍ରିକେଟ ପ୍ରଶଂସକମାନେ ଦଳ ଚୟନ ପ୍ରକ୍ରିୟାକୁ ନେଇ ବର୍ଷିଛନ୍ତି। ସୋସିଆଲ ମିଡିଆରେ ସେମାନେ ନିଜର ପ୍ରତିକ୍ରିୟା ଦେଉଥିବା ଦେଖାଯାଇଛି। ସରଫରାଜଙ୍କ ସ୍ଥାନରେ ସୂର୍ଯ୍ୟକୁମାରଙ୍କୁ ଚୟନ କରାଯିବା ରଣଜୀ ଟ୍ରଫିର ଅପମାନ ବୋଲି ସେମାନେ କହୁଛନ୍ତି।