ସୁପରଷ୍ଟାର୍ ଅମିତାଭ ବଚ୍ଚନ କରୋନା ପଜିଟିଭ୍ ଚିହ୍ନଟ ହେବା ପରେ ତାଙ୍କ ଆରୋଗ୍ୟ କାମନା କରି ଦେଶର ବିଭିନ୍ନ ଯାଗାରେ ପୂଜାର୍ଚ୍ଚନା ଚାଲିଛି। ବଲିଉଡ୍ର ଅନେକ କଳାକାର, ରାଜନେତା, କ୍ରିକେଟର ଏବଂ ତାଙ୍କ ଫ୍ୟାନ୍ମାନେ ମଧ୍ୟ ସୁସ୍ଥତା କାମନା କରିଛନ୍ତି। ପଡୋଶୀ ଦେଶ ପାକିସ୍ତାନରେ ମଧ୍ୟ ଅମିତାଭ ବଚ୍ଚନଙ୍କ ଅନେକ ଫ୍ୟାନ୍ ରହିଛନ୍ତି। ପାକିସ୍ତାନ କ୍ରିକେଟର ସୋଏବ୍ ଅଖତର ଏବଂ ଶାହିଦ୍ ଆଫ୍ରିଦ୍ ମଧ୍ୟ ତାଙ୍କ ଶୀଘ୍ର ଆରୋଗ୍ୟ କାମନା କରି ଟୁଇଟ୍ କରିଛନ୍ତି। ପାକିସ୍ତାନର କ୍ରିକେଟରମାନେ ଅମିତାଭଙ୍କ ପାଇଁ ଟୁଇଟ୍ କରୁଥିବାବେଳେ ଭାରତୀୟ କ୍ରିକେଟ ଦଳର ଅଧିନାୟକ ବିରାଟ କୋହଲି ଚୁପ୍ ଅଛନ୍ତି। ଏସବୁ ଭିତରେ ଜଣେ ଫ୍ୟାନ୍ ଟୁଇଟରରେ କହିଛନ୍ତି କୋହଲି ସୋଏବ୍ ଅଖତରଙ୍କଠାରୁ କିଛି ଶିଖିବା ଉଚିତ୍। ଏବେ ଏହି ଟୁଇଟ୍ ଭାଇରାଲ ହେବାରେ ଲାଗିଛି। ସୂଚନାଯୋଗ୍ୟ, ଅମିତାଭ ବଚ୍ଚନ ଏବଂ ପୁଅ ଅଭିଷେକ ଶନିବାର କରୋନା ପଜିଟିଭ୍ ଚିହ୍ନଟ ହୋଇଥିଲେ। ଏହାର ଦିନକ ପରେ ଅମିତାଭଙ୍କ ବୋହୂ ଐଶ୍ଚର୍ଯ୍ୟା ଏବଂ ନାତୁଣୀ ଆରାଧ୍ୟା ମଧ୍ୟ କରୋନା ସଂକ୍ରମିତ ହୋଇଛନ୍ତି।