ବମ୍ବେ: ଅଭିନେତା ସୁଶାନ୍ତ ସିଂଙ୍କ ମୃତ୍ୟୁକୁ ବିତିଲାଣି ପନ୍ଦର ଦିନରୁ ଅଧିକ ସମୟ। ପୋଲିସ ଘଟଣାର ବିଭିନ୍ନ ଦିଗକୁ ନେଇ କରୁଛି ଯାଞ୍ଚ। ହେଲେ ସୁଶାନ୍ତଙ୍କ ପ୍ରଶଂସକ ତାଙ୍କ ମୃତ୍ୟୁକୁ ଗ୍ରହଣ କରିବାକୁ ନାରାଜ। ଏପରିକି ସେମାନେ ପୋଲିସ ଦ୍ୱାରା ଯାଞ୍ଚ କରାଇବାକୁ ମଧ୍ୟ ଅନିଚ୍ଛା ପ୍ରକାଶ କରୁଛନ୍ତି। ଏଥିପାଇଁ ସୋସିଆଲ ମିଡିଆରେ ‘ସିବିଆଇ ମଷ୍ଟ ଫର୍ ସୁଶାନ୍ତ’ ଟ୍ରେଣ୍ଡ କରୁଥିବା ଦେଖାଯାଉଛି। ଅଭିନେତା ଶେଖର ସୁମନ ମଧ୍ୟ ନିକଟରେ ସୁଶାନ୍ତଙ୍କ ମୃତ୍ୟୁର ସିବିଆଇ ଯାଞ୍ଚ କରାଯାଉ ବୋଲି ଦାବି କରି ଆସୁଛନ୍ତି।
ସୁଶାନ୍ତ ଜଣେ ଲଢ଼ୁଆ ବ୍ୟକ୍ତିତ୍ୱ ଥିଲେ। ସଂଘର୍ଷକୁ ସାମ୍ନା କରିବାକୁ ପସନ୍ଦ କରୁଥିଲେ। ଜଣେ ସକରାତ୍ମକ ଚିନ୍ତାଧାରାର ବ୍ୟକ୍ତି ନିଜ ଜୀବନ ନେଇପାରିବ ନାହିଁ ବୋଲି ଜଣେ ପ୍ରଶଂସକ ଲେଖିଛନ୍ତି। ସେ ଏବେ ଯେଉଁଠି ଥିବେ ଖୁସିରେ ଥିବେ। ତାଙ୍କୁ ନ୍ୟାୟ ନ ମିଳିବା ପର୍ଯ୍ୟନ୍ତ ଆମେ ଶାନ୍ତିରେ ବସିବୁ ନାହିଁ ବୋଲି ସେ କହିଛନ୍ତି।
ଏଭଳି ଭାବେ କେହି ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କ କାମ ଉପରେ ପ୍ରଶ୍ନ ଉଠାଉଥିବା ବେଳେ ସିବିଆଇ ଯାଞ୍ଚ ଆଦେଶ ଦିଆଯାଉ ବୋଲି ଦାବି କରୁଥିବା ଦେଖାଯାଉଛି।
ଏସବୁ ମଧ୍ୟରେ ପୋଲିସର ଯାଞ୍ଚକୁ ଯଦି ଦେଖାଯାଏ ତେବେ ସୁଶାନ୍ତଙ୍କ ବନ୍ଧୁ ଏବଂ କ୍ରିଏଟିଭ୍ କଣ୍ଟେଣ୍ଟ ମ୍ୟାନେଜର ସିଦ୍ଧାର୍ଥ ପିଥାନୀଙ୍କୁ ପଚରାଉଚରା କରାଯାଉଛି। ସୁଶାନ୍ତ ଆତ୍ମହତ୍ୟା କରିବା ସମୟରେ ସିଦ୍ଧାର୍ଥ ସେଠାରେ ଥିବା ଜଣାପଡ଼ିଛି। ଏହାଛଡ଼ା ପ୍ରେମିକା ରିୟାଙ୍କୁ ମଧ୍ୟ ପୋଲିସ ବିଭିନ୍ନ ପ୍ରସଙ୍ଗରେ ପଚରାଉଚରା କରିସାରିଛି।
