କାନୁପର, ୨୫।୧୧: ଗୁରୁବାର ଏଠାରେ ନ୍ୟୁଜିଲାଣ୍ଡ ବିପକ୍ଷରେ ଆରମ୍ଭ ହୋଇଥିବା ପ୍ରଥମ ଟେଷ୍ଟରେ ପ୍ରଥମ ଦିନ ସୁଦ୍ଧା ଭାରତ ୪ ଉଇକେଟ ହରାଇ ୨୫୮ ରନ୍ କରିଛି। କାଇଲ ଜେମିସନଙ୍କ ବୋଲିଂ ଯୋଗୁ ଭାରତ ଏକଦା ୧୪୫ ରନ୍ରେ ୪ ଉଇକେଟ ହରାଇ ସଙ୍କଟରେ ପଡ଼ିଥିଲା। ଏଭଳି ସ୍ଥିତିରେ ଦଳକୁ ଆଗେଇ ଦେଇଥିଲେ ପଦାର୍ପଣକାରୀ ଶ୍ରେୟାସ ଆୟାର (୭୫) ଓ ରବୀନ୍ଦ୍ର ଜାଡେଜା (୫୦)। ଆଲୋକ ଅଭାବରୁ ୬ ଓଭର ପୂର୍ବରୁ ଖେଳ ଶେଷ କରାଯାଇଥିଲା।
ମ୍ୟାଚ୍ରେ ଅଧିନାୟକ ଅଜିଙ୍କ୍ୟ ରାହାନେ (୩୫) ଓ ଉପ ଅଧିନାୟକ ଚେତେଶ୍ୱର ପୂଜାରା(୨୬)ଙ୍କୁ ଭଲ ଆରମ୍ଭ ମିଳିଥିଲା। ଏହାସତ୍ତ୍ୱେ ଦୁହେଁ ବଡ଼ ସ୍କୋର କରିବାରେ ସଫଳ ହୋଇ ନ ଥିଲେ। ଏଭଳି ପ୍ରଦର୍ଶନ ପାଇଁ ଟିମ୍ ଇଣ୍ଡିଆର ଦୁଇ ବରିଷ୍ଠ ଖେଳାଳିଙ୍କୁ ସୋସିଆଲ ମିଡିଆରେ ବେଶ୍ ସମାଲୋଚିତ ହେବାକୁ ପଡ଼ିବ। ଏପରି କି କିଛି ପ୍ରଶଂସକ ଦୁହିଁଙ୍କୁ ଅନ୍ତର୍ଜାତୀୟ କ୍ରିକେଟରୁ ସନ୍ନ୍ୟାସ ନେଇଯିବାକୁ କହିଛନ୍ତି।
ଜଣେ ପ୍ରଶଂସକ ଟୁଇଟ୍ କରିଛନ୍ତ, ଯୁବ ଖେଳାଳିଙ୍କ ପାଇଁ ବାଟ ଛାଡ଼ିବାର ସମୟ ଆସିଯାଇଛି। ସେହିଭଳି ଅନ୍ୟ ଜଣେ ଫ୍ୟାନ ଲେଖିଛନ୍ତି, ସମତଳ ବାଉନ୍ସ ନ ଥିବା ଏଭଳି ପିଚ୍ରେ ଅଫ୍ ଷ୍ଟମ୍ପ ବାହାର ବଲକୁ ପୁଲ କରିବା ରାହାନେଙ୍କ ଭୁଲ।