ମୁମ୍ବାଇ: ଟୋକିଓରେ ଚାଲିଥିବା ଅଲିମ୍ପିକ୍ସରେ ଭାରତୀୟ ପୁରୁଷ ହକି ଦଳ ଇତିହାସ ରଚିଛନ୍ତି । ଦୀର୍ଘ ୪୧ ବର୍ଷ ପରେ ଏମାନେ ବ୍ରୋଞ୍ଚ ପଦକ ଜିତି ଦେଶର ନାମ ଗୌରବାନ୍ୱିତ କରିଛନ୍ତି । ଏହି ଖୁସିର ମୁହୂର୍ତ୍ତକୁ ଦେଖି ସମଗ୍ର ଦେଶବାସୀ ଖୁସିରେ ଝୁମି ଉଠିଛନ୍ତି । ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କଠାରୁ ଆରମ୍ଭ କରି ବଲିଉଡ୍ର ବହୁ ସେଲିବ୍ରିଟି, ରାଜନେତା ପୁରୁଷ ହକି ଦଳକୁ ଶୁଭେଚ୍ଛା ଜଣାଇଛନ୍ତି । ଏହି କ୍ରମରେ ବଲିଉଡ୍ ନାୟକ ଫରହାନ ଅଖତର ବି ଶୁଭେଚ୍ଛା ଜଣାଇବାକୁ ଭୁଲି ନାହାନ୍ତି । ହେଲେ ଶୁଭେଚ୍ଛା ଜଣାଇବା ପରେ ସେ ଟ୍ରୋଲ ହୋଇଛନ୍ତି । ଘଟଣା ହେଲା ସେ ପୁରୁଷ ହକି ଟିମ୍ ବଦଳରେ ମହିଳା ହକି ଟିମକୁ ଶୁଭେଚ୍ଛା ଜଣାଇ ଦେଇଛନ୍ତି । ଟୁଇଟ କରି ସେ ଏହି ଶୁଭେଚ୍ଛା ଜଣାଇଥିବା ବେଳେ ଭୁଲ ହୋଇଥିବା ଦେଖି ଏହାକୁ ସାଙ୍ଗେସାଙ୍ଗେ ଡିଲିଟ୍ କରି ଦେଇଛନ୍ତି । ହେଲେ ଏହାର ସ୍କ୍ରିନ୍ ସଟ୍ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଆଉ ଏହାକୁ ଦେଖି ୟୁଜର୍ସ ଫରହାନଙ୍କୁ ଟ୍ରୋଲ କରିବା ଆରମ୍ଭ କରି ଦେଇଛନ୍ତି ।
