ଭୁବନେଶ୍ୱର/ନୟାଗଡ଼ ଅଫିସ,୨୪।୧୧(ବ୍ୟୁରୋ): ନୟାଗଡ଼ ସଦର ଥାନା ଯଦୁପୁର ଗ୍ରାମରେ ପ୍ରାୟ ୪ମାସ ତଳେ ଘଟିଥିବା ପରୀ (୫) ନାମକ ଶିଶୁକନ୍ୟା ହତ୍ୟା ଘଟଣାରେ ଏଯାଏ ତାଙ୍କ ପରିବାରକୁ ନ୍ୟାୟ ମିଳି ନାହିଁ । ପୋଲିସ ଓ ଜିଲା ପ୍ରଶାସନ ଉପରେ ଅସନ୍ତୋଷ ବ୍ୟକ୍ତ କରି ମୃତ ପରୀଙ୍କ ମା’ ବାପା ମଙ୍ଗଳବାର ବିଧାନସଭା ସମ୍ମୁଖରେ ଡିଜେଳ ଢାଳି ଆତ୍ମାହୁତି ଉଦ୍ୟମ କରିଛନ୍ତି । ଘଟଣାସ୍ଥଳରେ ଭୁବନେଶ୍ୱର କମିଶନରେଟ ପୋଲିସ ପହଞ୍ଚି ଉଭୟ ଦମ୍ପତିଙ୍କୁ ଉଦ୍ଧାର କରିଛି। ତେବେ ହତ୍ୟାକାଣ୍ଡ ନେଇ ପରୀଙ୍କ ମା’ ବାପା କହିଛନ୍ତି, ଆମ କଥା କେହି ଶୁଣି ନାହାନ୍ତି। ଆମ ଅଭିଯୋଗକୁ ଅଣଦେଖା କରାଯାଉଛି । ଝିଅର ହତ୍ୟାକାଣ୍ଡରେ ନ୍ୟାୟ ନ ମିଳିବା ସହ ଆମକୁ ନିର୍ଯାତନା ଦିଆଯାଉଛି।
ପ୍ରକାଶଯୋଗ୍ୟ, ଗତ ଜୁନ ୧୪ରେ ଜିଲା ସଦର ଥାନା ଯଦୁପୁରରେ ଅମ୍ରିତା ସ୍ନେହା ସାହୁ ଓରଫ ପରୀ (୫) ନାମକ ଶିଶୁକନ୍ୟା ନିଖୋଜ ହୋଇଥିଲା। ଜୁନ ୨୩ରେ ନିଖୋଜ ସ୍ଥାନଠାରୁ ମାତ୍ର ୫୦ ମିଟର ଦୂରରେ ମୃତଦେହ ଉଦ୍ଧାର ହୋଇଥିଲା। ମୃତଦେହ ଉଦ୍ଧାର ପରେ ପୋଲିସ ହତ୍ୟା ମାମଲା ରୁଜୁ କରିଛି । ଅନ୍ୟପକ୍ଷେ ମୃତ ପରୀର ମା’ବାପା, ବଡବାପା ଓ ବଡମାଙ୍କର ଲାଏ ଡିଟେକ୍ସନ ପରୀକ୍ଷା କରି ରିପୋର୍ଟକୁ ଅପେକ୍ଷା କରାଯାଇଛି।