ଗୁରୁଗ୍ରାମ,୧। ୯: ହରିୟାଣା ମାନେସରରେ ସରକାରଙ୍କ ପକ୍ଷରୁ ୧,୮୧୦ ଏକର ଜମି ଅଧିଗ୍ରହଣ ବିରୋଧରେ ସ୍ଥାନୀୟ କୃଷକମାନେ ବିକ୍ଷୋଭ ପ୍ରଦର୍ଶନ କରିଛନ୍ତି। ଏ ନେଇ ଚାଷୀମାନେ ବୁଧବାର ଡେପୁଟି କମିଶନର ନିଶାନ୍ତ କୁମାର ଯାଦବଙ୍କୁ ସ୍ମାରକପତ୍ର ପ୍ରଦାନ କରିବା ସହ ସମୂହ ଆତ୍ମହତ୍ୟା ପାଇଁ ଅନୁମତି ମାଗିଛନ୍ତି। ଦାବି ବାବଦରେ ସରକାରଙ୍କୁ ଜଣାଯିବ ବୋଲି ନିଶାନ୍ତ କୁମାର ପ୍ରତିଶ୍ରୁତି ଦେବା ପରେ କୃଷକ ପ୍ରଦର୍ଶନରୁ ଓହରିଛନ୍ତି। କୃଷକମାନଙ୍କ ବିକ୍ଷୋଭ ୭୦ ଦିନରେ ପହଞ୍ଚିଥିବାବେଳେ କିଷାନ ସମିତିର ସଦସ୍ୟମାନେ ଭାଜପା ଓ ଜନନାୟକ ଜନତା ପାର୍ଟି (ଜେଜେପି) ଦଳର ନେତାଙ୍କୁ ବଏକଟ କରିବା ପାଇଁ ନିଷ୍ପତ୍ତି ନେଇଛନ୍ତି। ୪ରୁ ଊର୍ଦ୍ଧ୍ୱ ଗ୍ରାମରେ ହରିୟାଣା ଷ୍ଟେଟ୍ ଇଣ୍ଡଷ୍ଟ୍ରିଆଲ୍ ଆଣ୍ଡ ଇନ୍ଫ୍ରାଷ୍ଟ୍ରକ୍ଚର ଡେଭଲପ୍ମେଣ୍ଟ କର୍ପୋରେଶନ୍ ତରଫରୁ ଭୂମି ଅଧିଗ୍ରହଣ ପାଇଁ ୨୦୧୦ରେ ନୋଟିସ୍ ଜାରି କରାଯାଇଥିଲା।
