ବରଗଡ଼ ଅଫିସ,୨୩।୩: ରବି ଧାନ ସଂଗ୍ରହ ପାଇଁ ଚାଷୀ ପଞ୍ଜିକରଣ ଆରମ୍ଭ ହୋଇଛି। ମାତ୍ର କିଛି ଅବ୍ୟବସ୍ଥା ଯୋଗୁ ଚାଷୀଙ୍କୁ ବହୁବିଧ ସମସ୍ୟାର ସମ୍ମୁଖୀନ ହେବାକୁ ପଡୁଛି। ଏହାର ପ୍ରତିବାଦରେ ମଙ୍ଗଳବାର ବରଗଡ଼ ବ୍ଲକ ତୋରା ପଞ୍ଚାୟତର ଚାଷୀମାନେ ବିକ୍ଷୋଭ କରିଛନ୍ତି। ସେମାନେ ଶୋଭାଯାତ୍ରାରେ ଆସି ଜିଲାପାଳଙ୍କ ଅଫିସ ସମ୍ମୁଖରେ ଧାରଣାରେ ବସିଛନ୍ତି। ଚାଷୀ ପଞ୍ଜିକରଣ, ନବୀକରଣ ପ୍ରକ୍ରିୟାକୁ ସରଳୀକରଣ କରାଯିବା, ଅନ୍ଲାଇନ ବ୍ୟତୀତ ଅଫ୍ଲାଇନରେ ରାଜସ୍ବ ଖଜଣା ଆଦାୟ କରିବା, ପତିତ, ଅଟା, ବର୍ଚ୍ଛା ଜମିର ଜଳକର ନିଆଯାଉଥିବା ଯୋଗୁ ଏହି କିସମ ଜମିକୁ ପଞ୍ଜିକରଣ ପ୍ରକ୍ରିୟାରେ ସାମିଲ କରିବା, କେବଳ ରେଜିଷ୍ଟ୍ରି ଦଲିଲ ମାଧ୍ୟମରେ ପଞ୍ଜିକରଣ କରିବା, ପଞ୍ଜିକରଣରେ ଆଧାର କାର୍ଡକୁ ବାଧ୍ୟତାମୂଳକ କରା ନ ଯିବା, ଚକବନ୍ଦୀ ବିଜ୍ଞପ୍ତି ରବ୍ଦ ହୋଇଥିବା ଯୋଗୁ ତୋରା ପଞ୍ଚାୟତର ଜମିଜମାକୁ ଚକବନ୍ଦୀରୁ ରାଜସ୍ବ ବିଭାଗକୁ ହସ୍ତାନ୍ତର ଦାବି କରି ଚାଷୀମାନେ ଏହି ଆନ୍ଦୋଳନକୁ ଓହ୍ଲାଇଛନ୍ତି। ଏଥିରେ ତୋରା ପଞ୍ଚାୟତର ଶତାଧିକ ଚାଷୀ ସାମିଲ ଅଛନ୍ତି।