ଖଇରା,୧୮।୨(ଡି.ଏନ.ଏ.): ବାଲେଶ୍ୱର ଜିଲା ଖଇରା ବ୍ଲକରେ ଧାନ କିଣାରେ ମନ୍ଥର ଯୋଗୁ ୧୪ଟି ସେବା ସମବାୟ ସମିତି ଅଧୀନ ଚାଷୀମାନେ ମାନସିକ ନିର୍ଯାତନାର ଶିକାର ହେଉଛନ୍ତି। ଟାର୍ଗେଟ ଆସୁ ନ ଥିବାରୁ ହଜାର ହଜାର ଚାଷୀ ଟୋକନ ଧରି ସରକାରଙ୍କ ନିଷ୍ପତ୍ତିକୁ ଚାହିଁ ରହିଛନ୍ତି। ଅନ୍ୟପକ୍ଷେ ଏକାଧିକ ଟୋକନରେ ଧାନ କିଣାକୁ ନେଇ ଯୋଗାଣ ବିଭାଗ ଅଙ୍କୁଶ ଲଗାଇ ଥିବାରୁ ଅଧିକାଂଶ ଚାଷୀଙ୍କର ଟୋକନର ଅତିରିକ୍ତ ସମୟ ସୀମା ଅତିକ୍ରାନ୍ତ ହୋଇ ସାରିିଲାଣି। ଚାଷୀଙ୍କ ପ୍ରତି ସରକାରଙ୍କ ଏଭଳି ବୈମାତୃକ ମନୋଭାବ ଯୋଗୁ ବିତସ୍ପୃହ ଓ ହତାଶ ହୋଇ ପଡ଼ିଥିବା ଚାଷୀ ବାଧ୍ୟହୋଇ ଚାଷ ଛାଡ଼ିବେ ବୋଲି ଚେତାବନୀ ଦେଇଛନ୍ତି।
୧୪ଟି ସେବା ସମବାୟ ସମିତିର ୯୩୩୮ଚାଷୀ ଧାନ ବିକ୍ରି ପାଇଁ ପଞ୍ଜୀକରଣ କରିଥିଲେ। ଯାଞ୍ଚ ପରେ ୯୨୪୯ ଚାଷୀ ଧାନ ବିକ୍ରି କରିବାକୁୁ ଯୋଗ୍ୟ ବିବେଚିତ ହୋଇଥିଲେ। ଫେବୃଆରୀ ୧୬ ସୁଦ୍ଧା ମାତ୍ର ୪୭୧୧ଚାଷୀ ୧ଲକ୍ଷ୯୯ହଜାର୧୪୬କୁଇଣ୍ଟାଲ ଧାନ ବିକ୍ରି କରିବାକୁ ସକ୍ଷମ ହୋଇଛନ୍ତି। ଅଢ଼େଇ ମାସରେ ମାତ୍ର ୫୦ ପ୍ରତିଶତ ଚାଷୀ ଧାନବିକ୍ରି କରି ପାରିଛନ୍ତି। ଯାହା ଅନ୍ୟ ବର୍ଷ ତୁଳନାରେ ବହୁତ କମ୍ ବୋଲି ଚାଷୀମାନେ ଅଭିଯୋଗ କରିଛନ୍ତି। କେନ୍ଦ୍ର ଓ ରାଜ୍ୟ ସରକାରଙ୍କ ଅରୁଆ ଉଷୁନା କଳି ଯୋଗୁ ଚାଷୀମାନଙ୍କୁ ଏହାର ଫଳ ଭୋଗିବାକୁ ପଡ଼ୁଥିବା ଗନ୍ଧାଳି ଗ୍ରାମର ଚାଷୀ ସଞ୍ଜୟ ବେହେରା କହିଛନ୍ତି। ବର୍ତ୍ତମାନ ଧାନ କିଣା ବନ୍ଦ ହେବାକୁ ଆଉ ମାତ୍ର କିଛି ଦିନ ବାକିଥିବା ବେଳେ ଟୋକନ ଧରି ଟାର୍ଗେଟ ଆସିବା ଦିନକୁ ଅପେକ୍ଷା କରି ରହିଛନ୍ତି। ରାଜ୍ୟ ଯୋଗାଣ ବିଭାଗ ଏକ ସମୟରେ ଲାଗ୍ଲାଗ୍ ସବୁ ଟୋକନ ଇସ୍ୟୁ କରୁଥିବା ବେଳେ ଜିଲା ଯୋଗାଣ ବିଭାଗ ଏକାଧିକ ଟୋକନରେ ଧାନ ବିକ୍ରି ଉପରେ କଟକଣା ଲଗାଇବା ଅତ୍ୟନ୍ତ ଦୁର୍ଭାଗ୍ୟପୂଣ୍ଣର୍ର୍ ବୋଲି ଚାଷୀ ଶଙ୍କୁନ୍ତଳା ବାରିକ କହିଛନ୍ତି। ପ୍ରକୃତ ଚାଷୀ ଅଦ୍ୟାବଧି ମଣ୍ଡିରେ ଧାନ ପକାଇବାକୁ ସମର୍ଥ ହୋଇ ନ ଥିବା କଇଥଗଡ଼ିଆର ବିଶିଷ୍ଟ ଚାଷୀ ରଘୁନାଥ ନାୟକ କହିଛନ୍ତି। ଏ ସମ୍ପର୍କରେ ଅତିରିକ୍ତ ଜିଲା ଯୋଗାଣ ବିଭାଗ ଅଧିକାରୀ ଅଜୟ ମଲ୍ଲିକଙ୍କୁ ପଚାରିବାରୁ ମାର୍ଚ୍ଚ ୨୧ପର୍ଯ୍ୟନ୍ତ ଧାନକିଣା ଚାଲିବ। ଟାର୍ଗେଟ ଭୁବନେଶ୍ୱରରୁ ଆସିବା ପରେ ବିଭିନ୍ନ ସମିତିକୁ ପ୍ରଦାନ କରାଯିବ ବୋଲି ସେ କହିଛନ୍ତି।