ମାଲକାନଗିରି, ୩୧ା୩ (ଦୁର୍ଯ୍ୟୋଧନ ପାତ୍ର)ମାଲକାନଗିରି ଜିଲାରେ ଫୁଲଚାଷ ପାଇଁ ଭିତ୍ତିଭୂମି, ଉପଯୁକ୍ତ ଜଳବାୟୁ, ଉର୍ବର ମୃତ୍ତିକା ଥିବା ସତ୍ତ୍ୱେ ଏଠାରେ ଫୁଲ ଚାଷ ପାଇଁ ଚାଷୀମାନେ ଆଗ୍ରହ ଦେଖାଉନାହାନ୍ତି। ଜିଲାବାସୀ ବିଭିିନ୍ନ ବିବାହ, ବ୍ରତ, ମାଙ୍ଗଳିକ କାର୍ଯ୍ୟ ଓ ସଭା ସମିତି ପାଇଁ ଫୁଲ ଖୋଜିଲେ ଆବଶ୍ୟକ ପରିମାଣରେ ମିଳୁନାହିଁ। ଫୁଲ ରାଜ୍ୟ ବାହାରୁ ଅଧିକ ଦାମ୍ ଦେଇ କିଣୁଛନ୍ତି। ବିଶେଷକରି ଆନ୍ଧ୍ରପ୍ରଦେଶର ବିଶାଖାପାଟଣା, ବିଜୟନଗରମ୍, ସାଲୁର, ଛତିଶଗଡ଼ ରାୟପୁର, ଜଗଦଲପୁର, ତେଲଙ୍ଗାନାର ହାଇଦ୍ରାବାଦ ଓ ସିକନ୍ଦରାବାଦ ଇତ୍ୟାଦି ସ୍ଥାନରୁ ଫୁଲ କ୍ରୟ କରାଯାଉଛି। ଉଦ୍ୟାନ, କୃଷି ବିଭାଗ, କୃଷି ବିଜ୍ଞାନ କେନ୍ଦ୍ର ତରଫରୁ ଚାଷୀଙ୍କୁ ଫୁଲ ଚାଷ ସମ୍ବନ୍ଧରେ ବିଭିନ୍ନ ଅଞ୍ଚଳରେ ତାଲିମ ଦିଆଯିବା ସହ ଉତ୍କୃଷ୍ଟ ଫୁଲଚାରା, ମୃତ୍ତିକା ପରୀକ୍ଷା, ଫୁଲଚାଷ ପାଇଁ ବିଭିନ୍ନ ପ୍ରଣାଳୀ, କୀଟନାଶକ ପ୍ରୟୋଗ, ଜୈବିକ ଖତ ସାର, ଇତ୍ୟାଦି ସମ୍ବନ୍ଧରେ ତାଲିମ ଦିଆଯାଉଥିଲେ ମଧ୍ୟ ସରକାରଙ୍କ ନିୟମ ଅନୁସାରେ ସେମାନଙ୍କୁ ପ୍ରୋତ୍ସାହନ ରାଶି ପ୍ରଦାନ କରା ଯାଉ ନ ଥିବା ଏମ୍ଭି ୧୦ ଗ୍ରାମର ଚାଷୀ ସୁବାସ ଚନ୍ଦ୍ର ମଣ୍ଡଳ କହିଛନ୍ତି।
ମଣ୍ଡଳ ଆହୁରି କହିଛନ୍ତି, ଅଧ ଏକର ଜମିରେ ଫୁଲଚାଷ କରିବା ପାଇଁ ମାଲକାନଗିରି ଉଦ୍ୟାନ ବିଭାଗ ତରଫରୁ ମୋତେ ଚାରା ଯୋଗାଇ ଦିଆଯାଇଥିଲା। ନିଜସ୍ବ ଖର୍ଚ୍ଚରେ ସେ ତାଙ୍କ ଜମିରେ ଗେଣ୍ଡୁଫୁଲ ଚାଷ କରିଥିଲେ। କିନ୍ତୁ ଆଜକୁ ୪ ମାସ ହେଲା ବିଭାଗର କୌଣସି ପଦାଧିକାରୀ ମୋର ଫୁଲ ଚାଷ କ୍ଷେତ୍ର ପରିଦର୍ଶନ କିମ୍ବା ବୈଷୟିକ ଜ୍ଞାନକୌଶଳ ଓ ଆର୍ଥିକ ପ୍ରୋତ୍ସାହନ ଦେଇନାହାନ୍ତି। ଫଳରେ ମୁଁ ଋଣ କରି ଏହି ଚାଷ କରିଛି। ତେବେ ଫୁଲର ଚାହିଦା ଥିବାରୁ ଦୀର୍ଘ ୫ କି.ମି.ରାସ୍ତା ଅତିକ୍ରମକରି ମାଲକାନଗିରି ସହରରେ ଫୁଲ ବ୍ୟବସାୟୀଙ୍କୁ କମ୍ ଦରରେ ବିକ୍ରି କରିବାକୁ ବାଧ୍ୟ ହେଉଛି। ସରକାର ମୋତେ ଆର୍ଥିକ ସହାୟତା ସହ ଏହି ଫୁଲ କ୍ଷେତରେ ଅଧିକ ଅମଳ ହୋଇ ପାରିବ ସେ ସମ୍ବନ୍ଧରେ ବୈଷୟିକ ସହାୟତା ଦେଲେ ଗେଣ୍ଡୁ ବ୍ୟତୀତ ଅନ୍ୟ ଫୁଲ ଚାଷ ମଧ୍ୟ କରିପାରିବି। ଅନ୍ୟ ଚାଷୀମାନେ ମୋର ଚାଷ ଦେଖି ଫୁଲଚାଷରେ ଆଗ୍ରହ ବଢ଼ାଇବେ ା ବର୍ତ୍ତମାନ ନିର୍ବାଚନ ସମୟ, ବିଭିନ୍ନ ରାଜନୈତିକ ଦଳ ନେତାମାନଙ୍କ ପାଇଁ ଫୁଲମାଳର ଆବଶ୍ୟକତା ରହିଛି।
ଏ ସମ୍ପର୍କରେ ଜିଲା ଉଦ୍ୟାନ ବିଭାଗ ଉପ ନିଦ୍ଦେର୍ର୍ଶକ ପ୍ରଶାନ୍ତ କୁମାର ପାତ୍ରଙ୍କୁ ପଚାରିବାରୁ ସମସ୍ତ ଫୁଲ ଓ ଛତୁ ଚାଷୀଙ୍କୁ ସେମାନଙ୍କ ପ୍ରୋତ୍ସାହନ ରାଶି ସରକାରଙ୍କ ନିୟମ ଅନୁଯାୟୀ ଖୁବ୍ ଶୀଘ୍ର ଦିଆଯିବା ପାଇଁ ପ୍ରକ୍ରିୟା ଜାରି ରହିଛି। ଜିଲାରେ ଫୁଲଚାଷ ପାଇଁ ଚାରା ନେଇଥିବା ଚାଷୀମାନଙ୍କ ବ୍ୟାଙ୍କ ଆକାଉଣ୍ଟରେ ଅର୍ଥ ଜମା କରାଯିବ ବୋଲି କହିଛନ୍ତି ।