ମାର୍ଶାଘାଇ,୨୫ା୪ (ଶୁଭେନ୍ଦୁ ପ୍ରସାଦ ଚୌଧୁରୀ)କେନ୍ଦ୍ର, ରାଜ୍ୟ ସରକାର କୃଷି ଓ କୃଷକଙ୍କ ଉନ୍ନତି ପାଇଁ ବିଭିନ୍ନ ଯୋଜନା ପ୍ରଣୟନ କରୁଛନ୍ତି। ହେଲେ ତଳସ୍ତରରେ ତାହା ପ୍ରତିଫଳିତ ହେଉ ନ ଥିବା ଦେଖିବାର ମିଳୁଛି। ମାର୍ଶାଘାଇ ବ୍ଲକ ଏକ କୃଷି ପ୍ରବଣ ଅଞ୍ଚଳ। ୮୦ ଭାଗରୁ ଅଧିକ ଲୋକ କୃଷି ଉପରେ ନିର୍ଭର କରିଥାନ୍ତି। ଏ ଅଞ୍ଚଳର ଚାଷୀମାନେ ଅର୍ଥକାରୀ ଫସଲ ଭାବେ ଆଖୁ ଚାଷ କରିଥାନ୍ତି। ଲୁଣା କରାଣ୍ଡିଆ, ଚିତ୍ରୋତ୍ପଳା, ପାଇକା ଗୋବରୀ ଆଦି ନଦୀ କୁଳିଆ ଉର୍ବର ଜମିରେ ଚାଷୀ ଆଖୁ ଚାଷ କରି ପରିବାର ପ୍ରତିପୋଷଣ କରିଥାନ୍ତି। ମାତ୍ର ସରକାରୀ ପ୍ରୋତ୍ସାହନ ଅଭାବ ତଥା କୁଇଣ୍ଟାଲ ପ୍ରତି ସର୍ବନିମ୍ନ ସହାୟକ ରାଶି ବୃଦ୍ଧି କରା ନ ଯିବାରୁ ଚାଷୀମାନେ ଏହି ଚାଷରୁ ମୁହଁ ଫେରାଇ ନେଉଥିବା ଦେଖିବାକୁ ମିଳୁଛି। ପୂର୍ବରୁ ମାର୍ଶାଘାଇ କୃଷି ଜିଲାରେ ୩ଶହ ଏକର ଜମିରେ ପ୍ରତିବର୍ଷ ଆଖୁ ଚାଷ ହେଉଥିବା ବେଳେ ଏବେ ଏହା ହ୍ରାସ ପାଇଛି। ସୁଗାର କମ୍ପାନୀକୁ ଆଖୁ ବିକିବାକୁ ସହବନ୍ଧିତ ହୋଉଥିବା ଚାଷୀମାନେ ଏ ପରିସ୍ଥିତରେ ଚାଷ ପାଇଁ ଆବଶ୍ୟକ ସାମଗ୍ରୀ ସାର, କୀଟନାଶକର ମୂଲ୍ୟ ବୃଦ୍ଧି ସାଙ୍ଗକୁ ଆଖୁ କାଟିବା ଓ ଗାଡ଼ି ବୋଝେଇ କରିବା ମଜୁରୀ ବୃଦ୍ଧି କାରଣରୁ ଚାଷୀ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି। ଆଖୁ ଚାଷ ପାଇଁ କମ୍ପାନୀ ପକ୍ଷରୁ ଚାଷୀଙ୍କୁ ଦିଆଯାଉଥିବା ଆର୍ଥିକ ସହାୟତା ବଦଳରେ କମ୍ପାନୀ ସେମାନଙ୍କଠାରୁ ଉଚ୍ଚ ହାରରେ ସୁଧ ଅସୁଲ କରୁଥିବା କେତେଜଣ ଚାଷୀ ନାମ ଗୋପନ ସର୍ତ୍ତରେ କହିଛନ୍ତି।
ସରକାରୀ ସ୍ତରରେ ଆଖୁର ଟନ ପ୍ରତି ମୂଲ୍ୟ ୨ଶହ ଟଙ୍କା ବୃଦ୍ଧି କରାଯାଇଥିଲେ ମଧ୍ୟ ତାହା ଅନ୍ୟ ରାଜ୍ୟ ତୁଳନାରେ ନଗଣ୍ୟ। ଆଖୁ ଚାଷ ନିମନ୍ତେ ସରକାରଙ୍କ ପକ୍ଷରୁ ପ୍ରୋତ୍ସାହନ ସହ ନୂଆ ସହାୟକ ମୂଲ୍ୟ ୩ ହଜାର ୫ ଶହ ଟଙ୍କା ବୃଦ୍ଧି କରିବାକୁ ସ୍ଥାନୀୟ ଅଞ୍ଚଳ ଚାଷୀ ସଙ୍ଗଠନ ପକ୍ଷରୁ ଦାବି କରାଯାଇଛି। ଏ ସମ୍ପର୍କରେ ମାର୍ଶାଘାଇ ଅତିରିକ୍ତ କୃଷି ଅଧିକାରୀ ପ୍ରଦୀପ୍ତ ଘୋଷଙ୍କୁ ପଚାରିବାରେ ସରକାରଙ୍କ ସୀମିତ ପ୍ରୋତ୍ସାହନ ରାଶି ବ୍ୟବସ୍ଥା ରହିଛି। ଫଳରେ ଆଖୁ ଚାଷ କରୁଥିବା ସମସ୍ତ ଚାଷୀଙ୍କୁ ସହାୟତା ପ୍ରଦାନରେ କିଛି ଟା ସମସ୍ୟା ହେଉଛି ବୋଲି ସେ କହିଛନ୍ତି।