ନିରାକାରପୁର,୨୦ା୭(ମାନସ ଚନ୍ଦ୍ର ପଟ୍ଟନାୟକ): ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ପ୍ରଭାବରେ ୨ଦିନ ଧରି ଲଗାଣ ବର୍ଷା ଜାରି ରହିଛି। ଫଳରେ ଧାନଜମିରେ ବର୍ଷା ପାଣି ଲହଡ଼ି ଭାଙ୍ଗୁଥିବା ବେଳେ ତଳି କିଆରିରେ ପାଣି ବୁଡି ରହିବା କାରଣରୁ ଗଜା ଧାନ ନଷ୍ଟ ହେବା ନେଇ ଚାଷୀ ଏବେ ମୁଣ୍ଡରେ ହାତ ଦେଇ ବସିଛି। ଚାଷୀ ଭୋଇ ପ୍ରଧାନ କୁହନ୍ତି, ଗତ ଅକ୍ଷୟ ତୃତୀୟାରେ ସେ ନିଜ ଜମିରେ ଧାନ ବୁଣି ଅନୁକୂଳ କରିଥିଲେ। ହେଲେ ମୌସୁମୀର ଲୁଚକାଳି ଖେଳ ଯୋଗୁ ପାଣି ନ ପାଇ ଗଜା ହେଲାନି। ବାଧ୍ୟ ହୋଇ ପୁଣି ଏବେ ମୌସୁମୀ ଆଗମନ ଦେଖି ସୋସାଇଟିରୁ ଧାନ କିଣି ଅଧମାଣ ଜମିରେ ତଳି ପକାଇଥିଲି, ହେଲେ ଧାନ ଆଖି ଦୃଷ୍ଟିଆ ହେଲା ବେଳକୁ ବର୍ଷା ଏବେ ଦାଉ ସାଜିଛି। ସେହିପରି ଚାଷୀ ଅଶୋକ ମହାପାତ୍ର କୁହନ୍ତି, ସେ ମଧ୍ୟ ଡିଆ ମୌଜାରେ ଥିବା ଜମିରେ ଅଧମାଣ ଜମିରେ ଧାନ ତଳି ପକାଇଥିଲେ। ହେଲେ କାଁଭାଁ ଗଛ ଉଠିଛି କି ନାହିଁ ଏବେ ତଳି କ୍ଷେତ ପାଣିରେ ବୁଡ଼ି ରହିଛ। ସେହିପରି ଚାଷୀ ସୁନୀଲ କୁମାର ସୁବୁଦ୍ଧି କୁହନ୍ତି ସେ ମଧ୍ୟ ମୌସୁମୀର ଲୁଚକାଳି ଖେଳ ଦେଖି ନିଜର ମାଣେ ଜମିରେ ତଳି ପକାଇଥିଲେ। ହେଲେ ତଳି କିଆରିରେ ବର୍ଷା ପାଣିର ଲହଡ଼ି ଦେଖି ଚଳିତ ବର୍ଷ ଧାନ ଜମିକୁ କିପରି ଉଠିଆ କରିବି ବୋଲି ଭାବି ମୁଣ୍ଡରେ ହାତ ଦେଇ ବସିଛନ୍ତି। ବିଶେଷକରି ଏହି ଲଘୁଚାପଟି ଆହୁରି ଅଧିକ ଘନୀଭୂତ ହୋଇ ଏହାର ପ୍ରଭାବରେ ପ୍ରବଳରୁ ଅତି ପ୍ରବଳ ବର୍ଷା ହେବାର ବିଭିନ୍ନ ଗଣମାଧ୍ୟମରୁ ଖବର ପାଇ ସ୍ଥାନୀୟ ଚାଷୀକୁଳ ଏବେ ଚିନ୍ତାରେ ପଡ଼ିଛନ୍ତି। ଏନେଇ ଟାଙ୍ଗୀବ୍ଲକ ଗ୍ରାମସେବକ ପ୍ରତାପ କୁମାର ସାହୁଙ୍କୁ ପଚାରିବାରେ ଆମ ବ୍ଲକ ଅଞ୍ଚଳରେ ଚାଷୀଭାଇମାନଙ୍କ ପାଇଁ ବର୍ଷାର ଆବଶ୍ୟକତା ଥିଲା। ତଥାପି ଯେତିକି ବର୍ଷା ହୋଇଛି ତାହା ଆବଶ୍ୟକତାଠାରୁ ଅଧିକ। ତେବେ ଯଦି କୌଣସି ଖାଲୁଆ ଜମିରେ ଥିବା ତଳି କ୍ଷେତରେ ପାଣି ବୁଡି ରହିଛି ତେବେ କିଛି ଅସୁବିଧା ନାହିଁ କି ଚାଷୀ ଭାଇମାନେ ଚିନ୍ତା କରିବାର ନାହିଁ। ମାତ୍ର ଏହିଭଳି ଯଦି ଆଉ ୪ରୁ ୫ଦିନ ଲଗାଣ ବର୍ଷା ହୋଇ ପାଣି ଜମି ରହିବ ତେବେ ତଳି ଜମି କ୍ଷତିଗ୍ରସ୍ତ ହୋଇପାରେ ବୋଲି ସେ ସୂଚନା ଦେଇଛନ୍ତି।