ଲୋଇସିଂହା,୨୬।୫(ଡି.ଏନ୍.ଏ.): ବଲାଙ୍ଗୀର ଜିଲା ଆଗଲପୁର ବ୍ଲକ ଅଧୀନ ଝରଣୀପାଲି, ବଡ଼ଟିକା, ନଅଗାଁ(ଖ), ବେନ୍ଦ୍ରା, ପଟୁଆପାଲି, ସାଲେଭଟା, ନୁନିଆପାଲି ଆଦି ପଞ୍ଚାୟତର ଚାଷୀ ୨୦୨୧-୨୨ ଖରିଫ ଫସଲ ବୀମା ସହାୟତାରୁ ବଞ୍ଚିତ ହୋଇଛନ୍ତି। ଏନେଇ ଚାଷୀ ସ୍ଥାନୀୟ ଜିଲା ପ୍ରଶାସନ, ବିଧାୟକ ଏବଂ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ ନିରାଶ ହେବାକୁ ପଡିଛି। ଏହାର ପ୍ରତିବାଦରେ ଚାଷୀନେତା ରତ୍ନାକର ମିଶ୍ରଙ୍କ ନେତୃତ୍ୱରେ ଶତାଧିକ ଚାଷୀ ଲୋଇସିଂହା ଥାନା ଅଧୀନ ବଲାଙ୍ଗୀର-ବରଗଡ଼ ୨୬ ନମ୍ବର ଜାତୀୟ ରାଜପଥରେ ଧାରଣା ଦେଇ ବିକ୍ଷୋଭ ପ୍ରଦର୍ଶନ କରିଥିଲେ। ଏପରିକି ଚାଷୀନେତାମାନେ କେନ୍ଦ୍ର ଏବଂ ରାଜ୍ୟ ସରକାରଙ୍କୁ କଡା ସମାଲୋଚନା କରିଥିଲେ। ଖବର ପାଇ ଆଗଲପୁର ତହସିଲଦାର ସୂଚିତା ପୁଷ୍ପା ଓ ଆଇଆଇସି ସଂଗ୍ରାମ ପଟ୍ଟନାୟକ ପହଞ୍ଚି ଚାଷୀଙ୍କ ସହ ଆଲୋଚନା କରିଥିଲେ l ହେଲେ ଜିଲାସ୍ତରୀୟ ଅଧିକାରୀ ଆସି କେବେ ସୁଦ୍ଧା ବୀମା ଟଙ୍କା ମିଳିବ ସେନେଇ ପ୍ରତିଶ୍ରୁତି ଦେବା ପରେ ଆନ୍ଦୋଳନରୁ ଓହରିବେ ବୋଲି ଚାଷୀ ରୋକ୍ଠୋକ୍ ଶୁଣାଇ ଦେଇଥିଲେ। ଫଳରେ ସକାଳ ୯ ଟାରୁ ଆନ୍ଦୋଳନ ଜାରି ରହିଛି।
