ଡେରାବିଶ,୧୮ା୫(ସ୍ବ.ପ୍ର.): ଡେରାବିଶ ବ୍ଲକ କାଉପଡା ପ୍ରାଥମିକ ସମବାୟ ସମିତିର ଜଣେ ସମ୍ପାଦକ ସମିତି ଅଧୀନ ବହୁ ଚାଷୀଙ୍କ ଫସଲବୀମା ଓ ଋଣସବସିଡ ଟଙ୍କା ଆତ୍ମସାତ୍ କରିଥିବା ବହୁ ଚାଷୀ ଅଭିଯୋଗ କରିଛନ୍ତି । ଏବାବଦରେ ଚାଷିମାନେ ରାଜ୍ୟ ସମବାୟ ନିବନ୍ଧକ,୫-ଟି ସଚିବ, ପାଟକୁରା ବିଧାୟିକାଙ୍କ ସମେତ ଜିଲାପାଳ, ଜିଲା ସମବାୟ ନିବନ୍ଧକ ଓ ଜିଲା ଯୋଗାଣ ଅଧିକାରୀଙ୍କୁ ଜଣାଇଛନ୍ତି ।
ଚାଷୀମାନେ ଦର୍ଶାଇଛନ୍ତି, ୨୦୧୯-୨୦ ଆର୍ଥକ ବର୍ଷରେ ଫସଲ କ୍ଷୟକ୍ଷତି ପାଇଁ ସମିତି ଅଧୀନ ବହୁ ଚାଷୀଙ୍କ ଜମାଖାତାରେ ଫସଲବୀମା ଟଙ୍କା ସମେତ ଋଣ ସବସିଡ ବାବଦ ଅର୍ଥ ଆସିଥିଲା। ହେଲେ ସଂପୃକ୍ତ ସମିତି ସମ୍ପାଦକ ଚାଷୀମାନଙ୍କୁ ଏବାବଦରେ ଜଣାଇ ନଥିଲେ । ତା’ ପରବର୍ଷ ଅର୍ଥାତ୍ ମାର୍ଚ୍ଚ ୨୦୨୧ରେ ସମ୍ପାଦକ ନିଜ ପାଖରେ ରଖୁଥିବା ଚାଷୀମାନଙ୍କ ଚେକ୍ ବହିରେ କୌଶଳକ୍ରମେ ଦସ୍ତଖତ କରାଇ ଚାଷୀଙ୍କ ଜମାଖାତାରୁ ସେହି ଟଙ୍କା ଉଠାଇ ନେଇଥିବା ନେଇ ଗୋପାଳଚନ୍ଦ୍ର ଲେଙ୍କା, ବଂଶୀଧର ବେହେରା, ଅରକ୍ଷିତ ବେହେରା, ଖଗେଶ୍ୱର ବେହେରା, ସନ୍ତୋଷୀ ସ୍ବାଇଁ ଓ କରୁଣାକର ମଲିକ ପ୍ରମୁଖ ଶତାଧିକ ଚାଷୀ ଅଭିଯୋଗ କରିଛନ୍ତି। ଏପରି କି ସମ୍ପାଦକ ୨୦୨୧ରେ ଉଠାଯାଇଥିବା ଟଙ୍କା ବାବଦ ରସିଦ କେତେଜଣ ଚାଷୀଙ୍କୁ ୨୦୨୨ରେ ଦେଇଥିବା ଉଚ୍ଚ କର୍ତ୍ତୃପକ୍ଷଙ୍କୁ ଦିଆଯାଇଥିବା ଅଭିଯୋଗପତ୍ରରେ ଦର୍ଶାଯାଇଛି। ଏହି ଅଭିଯୋଗ ବାବଦରେ ଜିଲା ସମବାୟ ନିବନ୍ଧକ ସନ୍ତୋଷ ଦାସଙ୍କୁ ପଚାରିବାରୁ ଏପରି କୌଣସି ଅଭିଯୋଗ ସେ ପାଇ ନ ଥିବା କହିଛନ୍ତି। ଅପରପକ୍ଷରେ ଏହି ଘଟଣା ବାବଦରେ ସଂପୃକ୍ତ ସମିତି ସମ୍ପାଦକ ଗୌରାଙ୍ଗ ପ୍ରଧାନଙ୍କୁ ପଚାରିବାରୁ ୨୦୧୮ ରେ ସମିତି ଅଧୀନ ଚାଟରାଚକଡା, କାଉପଡା, କୁରୁଜଙ୍ଗା ଓ ଗୋଲରାହାଟ ପଞ୍ଚାୟତର କେତେଜଣ ଚାଷି ଏହି ସମବାୟ ବ୍ୟାଙ୍କରୁ ଋଣ ନେଇଥିଲେ। ବୀମା ବାବଦ ଅର୍ଥ ୨୦୨୦ରେ ଆସିବା ପରେ ସମବାୟ ସମିତି ପ୍ରତି ଚାଷୀମାନଙ୍କ ଜମାଖାତାକୁ ସେମାନଙ୍କ ଟଙ୍କା ପଠାଇ ଦେଇଥିଲା। ଏବାବଦରେ ସମ୍ପୃକ୍ତ ଚାଷୀମାନଙ୍କୁ ସମିତି ପକ୍ଷରୁ ସୂଚନା ଦେବା ପରେ ବହୁ ଚାଷୀ ସେମାନଙ୍କ ଟଙ୍କାକୁ ଉଠାଇ ନେଇଥିଲେ। ଏପରି କି ଏବେ ବି ବହୁ ଚାଷୀଙ୍କ ଜମାଖାତାରେ ଉକ୍ତ ଫସଲବୀମା ଟଙ୍କା ରହିଛି। ଅପରପକ୍ଷେ ଦୀର୍ଘଦିନ ହେଲା ଋଣ ନେଇ ବିଲକୁଲ ଶୁଝିବାର ନାମ ଧରୁ ନ ଥିବା ଚାଷୀମାନଙ୍କ ଫସଲବୀମା ଅର୍ଥକୁ ତାଙ୍କ ଋଣ ମୂଳଧନ ବାବଦକୁ ପଇଠ କରାଯାଇଛି। ଏ ସଂକ୍ରାନ୍ତରେ ରସିଦ କଟାଯାଇ ସେମାନଙ୍କୁ ଜଣାଇ ଦିଆଯାଇଛି ବୋଲି ପ୍ରଧାନ କହିଛନ୍ତି। ତେବେ କେତେଜଣ ନ୍ୟସ୍ତସ୍ବାର୍ଥ ବ୍ୟକ୍ତିଙ୍କ ମୋ ବିରୋଧରେ ଏହି ଅଭିଯୋଗ କରିଛନ୍ତି । ଏହି ଟଙ୍କା ବାବଦରେ ଯଦି କୌଣସି ଚାଷୀଙ୍କ ଅଭିଯୋଗ ରହିଛି ତେବେ ସେମାନେ ସମିତିକୁ ଆସି ବୁଝିପାରିବେ ବା କାଗଜପତ୍ର ତନଖି କରି ପାରିବେ ବୋଲି ସମିତି ସମ୍ପାଦକ ପ୍ରଧାନ କହିଛନ୍ତି।