ସିଂହପୁର,୨୧ା୯(ଅନଙ୍ଗ ଉଦୟ ବେଉରା): ଯାଜପୁର ଜିଲା ବିଞ୍ଝାରପୁର ବ୍ଲକ ଅନ୍ତର୍ଗତ ଜରି କୃଷିସେବା ସମବାୟ ସମିତି କାର୍ଯ୍ୟାଳୟ ସମ୍ମୁଖରେ ଗୁରୁବାର ଶହଶହ ଚାଷୀ ଦୀର୍ଘ ୩ ଘଣ୍ଟା କାଳ ଘେରି ରହିଥିଲେ।
ସୂଚନାଯୋଗ୍ୟ, ୨୦୨୩ ଖରିଫ ଋତୁ ଫସଲ କ୍ଷତି ବାବଦ ଜରି ପଞ୍ଚାୟତରେ ଶତକଡା ୩୭ ଭାଗ କ୍ଷତି ହୋଇଥିବା ସରକାରୀ ରିପୋର୍ଟ ଆଧାରରେ ଜରି ପଞ୍ଚାୟତର ବୀମାଭୁକ୍ତ ଚାଷୀଙ୍କ ଜମାଖାତାକୁ ପ୍ରଧାନମନ୍ତ୍ରୀ ଫସଲ ବୀମା ରାଶି ଆସିଥିବା ବେଳେ ବହୁ ଯୋଗ୍ୟ ଚାଷୀ ଏହି ଅର୍ଥ ପାଇବାରୁ ବଞ୍ଚିତ ହୋଇଛନ୍ତି। ଚାଷୀମାନେ ବାରମ୍ବାର ସମବାୟ ସମିତି କାର୍ଯ୍ୟାଳୟକୁ ଯାଇ ନିରାଶ ହେବାପରେ ଆଜି ଦଳ ମତ ନିର୍ବିଶେଷରେ ଶହ ଶହ ଚାଷୀ ଜରି ସମବାୟ ସମିତି କାର୍ଯ୍ୟାଳୟକୁ ଯାଇ ଲିଖିତ ଦାବିପତ୍ର ଦେବା ସହିତ ଘଣ୍ଟା ଘଣ୍ଟା ଧରି କାର୍ଯ୍ୟାଳୟକୁ ଘେରି ରହିଥିଲେ। ପୋଲିସ ଖବର ପାଇ ଘଟଣାସ୍ଥଳକୁ ଆସି ବୁଝାଶୁଝା କଲା ପରେ ପରିସ୍ଥିତି ଶାନ୍ତ ପଡ଼ିଥିଲା।ସଂଗେ ସଂଗେ ସମିତିର ସଭାପତି, ସମ୍ପାଦକ, ସମିତିର ବୋର୍ଡ଼ ସଦସ୍ୟ,ସଦସ୍ୟା, ଜରି ପଞ୍ଚାୟତର ସରପଞ୍ଚ, ପ୍ରାକ୍ତନ ସରପଞ୍ଚ,ଚାଷୀ ନେତୃବୃନ୍ଦ ପ୍ରମୁଖ ବସି ଚାଷୀଙ୍କ ଦ୍ୱାରା ପ୍ରଦତ୍ତ ୩ ଦଫା ଦାବି ସମ୍ପର୍କରେ ବିଷଦ ଆଲୋଚନା କରାଯାଇ ଆସନ୍ତା ଦୁଇ ସପ୍ତାହ ମଧ୍ୟ ଚାଷୀଙ୍କ ମୌଳିକ ଦାବି ପୂରଣ କରାଯିବ ବୋଲି ନିର୍ଭର ପ୍ରତିଶ୍ରୁତି ସମିତିର ସଭାପତି ଦିଲ୍ଲୀପ ରାଉତ ଓ ସମ୍ପାଦକ ଗୋପାଳ ସ୍ବାଇଁ ଘେରି ରହିଥିବା ଉତ୍ତ୍ୟକ୍ତ ଚାଷୀଙ୍କୁ ଜଣାଇବା ପରେ ଚାଷୀମାନେ ଶାନ୍ତ ପଡ଼ିଥିଲେ।
