କୁତ୍ରା,୧୨।୩(ଡି.ଏନ୍.ଏ.): ସୁନ୍ଦରଗଡ଼ ଜିଲା କୁତ୍ରା ବ୍ଲକ ଅଧୀନ ବିରିଙ୍ଗାଟୋଲ ପଞ୍ଚାୟତ ନକଟି ଗ୍ରାମର ଚାଷୀ ପଣ୍ଡିତ ଟପ୍ପୋ ଗରିବ ଲୋକଙ୍କୁ କୋବି ବାଣ୍ଟିଛନ୍ତି। ରବିବାର କୁତ୍ରାରେ ହାଟପାଳି ଥିବାବେଳେ ସେ ସକାଳୁ ଏକ ଅଟୋରେ ବନ୍ଧାକୋବି ଆଣିଥିଲେ। କୁତ୍ରା ଦେଇ ଯାଇଥିବା ବିଜୁ ଏକ୍ସପ୍ରେସ୍ ୱେ ପାର୍ଶ୍ୱରେ କୋବି ଜମାକରି ରଖିଥିଲେ। ଯେଉଁ ଗରିବ ଲୋକ ଯାଉଥିଲେ ସମସ୍ତଙ୍କୁ ଡାକି କୋବି ବାଣ୍ଟୁଥିଲେ। ଜଣେ ଲୋକଙ୍କୁ ୨ଟି ଲେଖାଏ କରି ଦେଇଥିଲେ। ଯେତିକି କୋବି ବଜାରକୁ ଆଣିଥିଲେ ସବୁ ବାଣ୍ଟି ଦେଇଥିଲେ। ଏହି ଘଟଣା କୁତ୍ରା ଅଞ୍ଚଳରେ ବେଶ୍ ଚର୍ଚ୍ଚାର ବିଷୟ ହୋଇଛି।
ଘଟଣାରୁ ଜଣାପଡିଛି ଯେ, ପଣ୍ଡିତ ଓାହେ ସ୍ତ୍ରୀ ସୁଚିତା ୧ ଏକର ଜମିରେ ବନ୍ଧାକୋବି ଚାଷ କରିଥିଲେ। କୋବି ଅମଳ ହେବା ପରେ ଦୁଇ ଥର ବଜାରକୁ ଆଣି ବିକ୍ରିକରି କିଛି ଟଙ୍କା ପାଇଥିଲେ। ତେବେ କୋବି ବଜାର ଦର କମ୍ ରହୁଥିବାରୁ ବିକ୍ରି କଲେ ବିଶେଷ ଅର୍ଥ ମିଳିବ ନାହିଁ। ଦୂରଦୂରାନ୍ତକୁ ନେଇ ବିକ୍ରି କରିବା ତାଙ୍କ ପାଇଁ ଅସମ୍ଭବ ହେଉଛି। ଘରେ ସେ ଦୁଇଜଣଙ୍କ ବ୍ୟତୀତ ଆଉ କେହି ନାହାନ୍ତି। ବ୍ୟବସାୟୀଙ୍କୁ ଦେଲେ ସେମାନେ ଅତି କମ ଦାମ୍ କହୁଛନ୍ତି। ନିଜେ ବିକ୍ରି କଲେ ମଧ୍ୟ ଚାଷରେ ଖର୍ଚ୍ଚ ହୋଇଥିବା ଟଙ୍କା ବାହାରୁନାହିଁ। ତେଣୁ ଉଭୟ ସ୍ବାମୀସ୍ତ୍ରୀ ବିଚାର କଲେ କମ୍ ଦାମ୍ରେ ଦେବା ଅପେକ୍ଷା ସମସ୍ତ କୋବିକୁ ଗରିବ ଲୋକଙ୍କୁ ବାଣ୍ଟି ଦେବେ। ତେଣୁ ସକାଳେ କୋବିକୁ ଅଟୋରେ ଆଣି କୁତ୍ରା ଅଞ୍ଚଳର ଗରିବ ଲୋକଙ୍କୁ ଅତି ଆନନ୍ଦର ସହକାରେ ବାଣ୍ଟି ଥିଲେ। ଏଥିରେ ସେ ବହୁତ ଖୁସି ଅନୁଭବ କରିଥିବା କହିଥିଲେ। ଜମିରେ କୋବି ଶେଷ ହେବା ପର୍ଯ୍ୟନ୍ତ ସେ ହାଟପାଳିରେ ଆଣି ଗରିବ ଲୋକଙ୍କୁ ବାଣ୍ଟିବେ ବୋଲି କହିଛନ୍ତି।