ନୂଆପଡ଼ା,୨୬।୬(ମକାରୁ ବେମାଲ): ନୂଆପଡା ଜିଲାରେ ଚାଷୀମାନେ ମାଣ୍ଡିଆ ଚାଷକରି ଆସୁଥିଲେ। ତାହା ଏକ ନିର୍ଦ୍ଦିଷ୍ଟ ସୀମା ମଧ୍ୟରେ ସିମିତ ହୋଇ ରହିଥିଲା। କିନ୍ତୁ ରାଜ୍ୟ ସରକାରଙ୍କ ମିଲେଟ ମିଶନ ହେବା ପରେ ଜିଲାରେ ମାଣ୍ଡିଆ ଚାଷ ବିପୁଳ ମାତ୍ରାରେ ବଢି ଚାଳିଛି। ବର୍ତ୍ତମାନ ବର୍ଷା ଦିନିଆ ମାଣ୍ଡିଆ ଚାଷ ଅପେକ୍ଷା ଖରାଟିଆ ମାଣ୍ଡିଆ ଚାଷ ପାଇଁ ଚାଷୀଙ୍କ ମଧ୍ୟରେ ବେଶ ଉତ୍ସାହ ପରିଲକ୍ଷିତ ହେଉଛି। ହେଲେ କୋମନା ବ୍ଲକ ଅନ୍ତର୍ଗତ ରଜନା ପଞ୍ଚାୟତ ବେଳଗାଁ ଚାଷୀ ଖରାଟିଆ ମାଣ୍ଡିଆ ଚାଷ କରି ମଣ୍ଡିରେ ବିକ୍ରୟ କରି ପାରି ନାହାନ୍ତି କି ତାଙ୍କର ପ୍ରୋତ୍ସାହନ ରାଶି ଏଯାଏଁ ଆକାଉଣ୍ଟରେ ପଡିନାହିଁ। ସୁଚନା ମୁତାବକ ଜିଲା କୃଷି ବିଭାଗ ପକ୍ଷରୁ ନୂଆପଡା ବ୍ଲକର ୯୫ ହେକ୍ଟର ଚାଷୀ ଓ କୋମନା ବ୍ଲକରେ ୧୫୫ ହରକ୍ଟର ଜମିରେ ଚଳିତବର୍ଷ ଏଲଟିଆଇ ଓ ଏସଏମଆଇ ପଦ୍ଧତିରେ ମାଣ୍ଡିଆ ଚାଷ ହୋଇ ଅମଳ ମଧ୍ୟ ଭଲ ହୋଇଛି। ହେଲେ ମାଣ୍ଡିଆ ମଣ୍ଡି ଏପ୍ରିଲ ୩୦ରେ ବନ୍ଦ ହୋଇଯିବାରୁ ଅଧିକାଂଶ ଚାଷୀ ମାଣ୍ଡିଆ ବିକ୍ରୟ କରି ପାରିନାହାନ୍ତି। ବେଳଗଁାର ଚମାର କରୁଆ, କୁନ୍ତି କରୁଆ, କାଶି କରୁଆ, ମିତ୍ରଭାନୁ କରୁଆ, ରୁପସିଂ ମାଝି, ସୁକ୍ତ ମାଝି, ରାଜେନ୍ଦ୍ର ଦଳ, ଇନ୍ଦ୍ର ଦଳ, ଡୋଳାମଣି କରୁଆ, ପୀତାମ୍ବାର ମାଝି, ଲୋକନାଥ ମାଝି, ସୁଚିନ୍ଦ୍ର ଦଳ, ପ୍ରମେଶ୍ୱର ଦଳ, ପୂର୍ଣ୍ଣମୀ ଦଳ, ପଦ୍ମନୀ ଦଳ, ଜୁଗେଶ୍ୱର ମାଝି, ଶ୍ୟାବ ମାଝି, ପଦ୍ମ ଲୋଚନ ମାଝି, ଶାନ୍ତି ମାଝି, ପୁଷ୍ପା କରୁଆ, ମଞ୍ଜୁଳତା ମାଝି, କୋଶଲ୍ୟା ମାଝି ପ୍ରମୁଖ ୨୨ଜଣ ଚାଷୀ ଖରାଟିଆ ମାଣ୍ଡିଆ ଚାଷ କରି ପାଖାପାଖି ୮୦ କୁଇଣ୍ଟାଲ ମାଣ୍ଡିଆ ବିକ୍ରୟ କରି ପାରିନାହାନ୍ତି। ଚାଷ କରି ହଳ, ସାର, ଶ୍ରମିକ ପାଉଣା ଦେଇ ପାରୁ ନାହାନ୍ତି। ମାଣ୍ଡିଆ ଚାଷ ଅମଳ ଜୁନ ମାସରେ ହୋଇଛ। ହେଲେ ଏପ୍ରିଲ ମାସରେ ମାଣ୍ଡିଆ ମଣ୍ଡି ବନ୍ଦ ହୋଇ ଯାଇଥିବାରୁ ଚାଷୀ ମାଣ୍ଡିଆ ବିକ୍ରୟ କରି ପାରିନାହାନ୍ତି। ମାଣ୍ଡିଆ ବିକ୍ରୟ କରିବା ପାଇଁ ଚାଷୀଙ୍କୁ ଗୋଟିଏ ବର୍ଷ ଅପେକ୍ଷା କରିବାକୁ ପଡିବ। କୃଷି ବିଭାଗ ପକ୍ଷରୁ ପ୍ରୋତ୍ସାହନ ରାଶି ମିଳିଲେ ସାର କିମ୍ବା ଶ୍ରମିକ ପାଉଣା ଦେଇ ପାରନ୍ତେ। ହେଲେ ଚାଷ ହୋଇ ଅମଳ ସରି ଯାଇଥିଲେ ମଧ ପ୍ରାତ୍ସାହନ ରାଶି ପଡି ନ ଥିବାରୁ ଚାଷୀ ନାହିଁ ନ ଥିବା ଅସୁବିଧାର ସମ୍ମୁଖିନ ହେବାକୁ ପଡୁଛି। ଏ ସଂକ୍ରାନ୍ତରେ ଜିଲା ମୁଖ୍ୟ କୃଷି ଅଧିକାରୀ ହିମାଂଶୁ ମହାପାତ୍ରଙ୍କୁ ପଚାରିବାରୁ ଜିଲାର ସବୁ ଚାଷୀଙ୍କ ତାଲିକା ଆସି ନାହିଁ। ଆସିଲା ପରେ ଗୋଟିଏ ସପ୍ତାହ ମଧ୍ୟରେ ସମସ୍ତଙ୍କ ଆକାଉଣ୍ଟରେ ପ୍ରୋତ୍ସାହନ ରାଶି ଜମା ହେବ ବୋଲି କହିଛନ୍ତି।