ବରଗଡ଼ ଅଫିସ୍,୧୬।୧୨: ପ୍ରାକୃତିକ ବିପର୍ଯ୍ୟୟରେ କ୍ଷତିଗ୍ରସ୍ତ ଚାଷୀଙ୍କୁ ବୀମା କ୍ଷତିପୂରଣ ଯୋଗାଇ ଦେବା ପାଇଁ କେନ୍ଦ୍ର ସରକାର ପ୍ରଧାନମନ୍ତ୍ରୀ ଫସଲବୀମା ଯୋଜନା କାର୍ଯ୍ୟକାରୀ କରିଛନ୍ତି। ଏଥିରେ ରବି ଫସଲ ପାଇଁ ଚାଷୀମାନେ ଡିସେମ୍ବର ୩୧ ତାରିଖ ସୁଦ୍ଧା ବୀମା ପ୍ରିମିୟମ ରାଶି ଜମା କରିବା କଥା। କିନ୍ତୁ କେନ୍ଦ୍ର ସରକାର ଏହି ଅବଧି ବଢ଼ାଇବା ପରିବର୍ତ୍ତେ ୧୬ଦିନ ପଛକୁ ଫେରାଇ ଆଣିଛନ୍ତି। ବୀମାରାଶି ଜମା କରିବା ସମୟ ଡିସେମ୍ବର ୧୫ରେ ଶେଷ ହୋଇଯିବାରୁ ବହୁ ଚାଷୀ ସେମାନଙ୍କ ପ୍ରିମିୟମ ଦେଇପାରିନାହାନ୍ତି। ଫଳରେ ଆଗକୁ ପ୍ରାକୃତିକ ବିପର୍ଯ୍ୟୟ ହେଲେ ସେମାନେ ଆଉ କ୍ଷତିପୂରଣ ପାଇପାରିବେ ନାହିଁ। କରୋନା କାଳରେ କେନ୍ଦ୍ର ସରକାର ୩ ନୂଆ କୃଷି ଆଇନ ଆଣି ବିବାଦ ଘେରକୁ ଆସିଛନ୍ତି। ବର୍ତ୍ତମାନ ବୀମା ରାଶି ଭରିବା ଅବଧି କମ୍ କରିବା ଯୋଗୁ ପୁଣି ଏକ ନୂଆ ବିବାଦ ସୃଷ୍ଟି ହୋଇଛି। ଏହା ଚାଷୀଙ୍କୁ ସରକାରଙ୍କ ହତାଦରର ନମୁନା ବୋଲି ଆଲୋଚନା ହେଉଛି।
ବରଗଡ଼ ଜିଲା ମୁଖ୍ୟ କୃଷି ଅଧିକାରୀଙ୍କ କାର୍ଯ୍ୟାଳୟରୁ ମିଳିଥିବା ସୂଚନା ଅନୁଯାୟୀ, ୨୦୨୦-୨୧ରେ ଏଚ୍ଡିଏଫ୍ସି ଆଗ୍ରୋ ବୀମା କମ୍ପାନୀ ଫସଲବୀମା ଦାୟିତ୍ୱରେ ରହିଛି। ୨୦୧୯-୨୦ ରବିଋତୁରେ ବରଗଡ଼ ଜିଲାର ୩୭୧୮ ଅଣଋଣୀ ଏବଂ ୧୭୮୨୦ ଋଣୀ ଚାଷୀ ଅର୍ଥାତ୍ ସମୁଦାୟ ୨୧ହଜାର ୫୩୮ ଚାଷୀ ପ୍ରିମିୟମ ଭରି ବୀମା ପାଇଁ ଆବେଦନ କରିଥିଲେ। ସେତେବେଳେ ଜିଲାର ୮୫୦୫.୬୭ ହେକ୍ଟର ଜମି ବୀମାଭୁକ୍ତ ହୋଇଥିଲା। ଚଳିତ ବର୍ଷ ଗତ ୯ତାରିଖ ସୁଦ୍ଧା ସମୁଦାୟ ୧୭ହଜାର ୯୯୭ଜଣ (୧୬ହଜାର ୨୧୧ ଋଣୀ, ୧୭୮୬ ଅଣଋଣୀ ଚାଷୀ) ପ୍ରିମିୟମ ଭରି ବୀମା ପାଇଁ ଆବେଦନ କରିଥିବାବେଳେ ମାତ୍ର ୩୬୦୯.୩୫ ହେକ୍ଟର ଜମି ବୀମାଭୁକ୍ତ ହୋଇ ପାରିଛି, ଯାହାକି ଗତ ରବିଋତୁ ବୀମାଭୁକ୍ତ ଫସଲଠାରୁ ବହୁ ଦୂରରେ ରହିଛି। ଗତ ନଭେମ୍ବରରୁ ରବିଋତୁ ଫସଲ ପାଇଁ ଏହି ବୀମା କମ୍ପାନୀ ପ୍ରିମିୟମ ରାଶି ସଂଗ୍ରହ କରୁଛି। ପ୍ରଧାନମନ୍ତ୍ରୀ ଫସଲବୀମା ଯୋଜନାର ଗାଇଡ୍ଲାଇନ୍ ଅନୁଯାୟୀ, ରବି ଫସଲ ପାଇଁ ଚାଷୀମାନେ ଡିସେମ୍ବର ୩୧ ତାରିଖ ପର୍ଯ୍ୟନ୍ତ ବୀମା ପ୍ରିମିୟମ ଭରି ପାରିବେ। ମାତ୍ର ଏବେ ଏହି ଅବଧିକୁ ଡିସେମ୍ବର ୧୫ ପର୍ଯ୍ୟନ୍ତ ରଖାଯାଇ ମଙ୍ଗଳବାର ବୀମା ପ୍ରିମିୟମ ଜମା କରିବା ଅବଧି ଶେଷ ହୋଇଛି । ୧୬ ଦିନ ଆଗରୁ ଏହା ସରିଯାଇଥିବାରୁ ବରଗଡ଼ ସମେତ ଅନ୍ୟ ଜିଲାର ଚାଷୀମାନେ ସେମାନଙ୍କ ବୀମା ପ୍ରିମିୟମ ରାଶି ଜମା କରି ପାରିନାହାନ୍ତି। ଧାନବିକ୍ରି ସରି ନ ଥିବାରୁ ଚାଷୀମାନଙ୍କୁ ବିକ୍ରିଧାନର ପ୍ରାପ୍ୟ ମିଳିପାରିନାହିଁ। ଫଳରେ ସେମାନେ ଋଣ ପରିଶୋଧ ସହିତ ବୀମା ପ୍ରିମିୟମ ଭରିପାରିନାହାନ୍ତି। ବାରମ୍ବାର ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଥିବା ଯୋଗୁ ଚାଷୀମାନେ ବୀମା ପ୍ରିମିୟମ ଜମା କରିବା ପାଇଁ ମଧ୍ୟ ଆଗ୍ରହ ପ୍ରକାଶ କରୁଛନ୍ତି। ମାତ୍ର ବୀମା ପ୍ରିମିୟମ ଜମା ଅବଧି ହ୍ରାସ କରାଯାଇଥିବାରୁ ତାହା ଚାଷୀଙ୍କ ପାଇଁ ଚିନ୍ତାର କାରଣ ପାଲଟିଛି। ଏଥିପାଇଁ ଅନେକ ଚାଷୀ ବୀମା ପ୍ରିମିୟମ ରାଶି ଜମା କରିବାରୁ ବଞ୍ଚିତ ହେବେ । ଏହାକୁ ନେଇ ଚାଷୀ ଅସନ୍ତୋଷ ବଢିବାରେ ଲାଗିଛି।
‘ଜୟ କିଷାନ’ ଆନ୍ଦୋଳନର ଉପଦେଷ୍ଟା ରମେଶ ମହାପାତ୍ର କହିଛନ୍ତି, କରୋନା କଟକଣା ସମୟରେ କେନ୍ଦ୍ର
ସରକାର ବୀମା ପ୍ରିମିୟମ ଭରିବା ଅବଧି ବଢ଼ାଇବା ଦରକାର। ମାତ୍ର ଏହାକୁ ୧୫ଦିନ ପଛକୁ ଫେରାଇବା ଦୁର୍ଭାଗ୍ୟଜନକ। ସରକାରଙ୍କ ଏଭଳି ଅଦୂରଦର୍ଶିତା ଯୋଗୁ ଯଦି ବୀମାଭୁକ୍ତ ହୋଇ ପାରି ନ ଥିବା କୌଣସି ଚାଷୀ ପ୍ରାକୃତିକ ବିପର୍ଯ୍ୟୟରେ କ୍ଷତିଗ୍ରସ୍ତ ହୁଅନ୍ତି, ସେଥିପାଇଁ କେନ୍ଦ୍ର ସରକାର ହିଁ ଦାୟୀ ରହିବେ । ସେହିପରି ପଶ୍ଚିମ ଓଡ଼ିଶା କୃଷକ ସଙ୍ଗଠନ ସମନ୍ବୟ ସମିତିର ଆବାହକ ଲିଙ୍ଗରାଜ କୁହନ୍ତି, ପ୍ରଧାନମନ୍ତ୍ରୀ ଫସଲବୀମା ଯୋଜନା ନେଇ କେନ୍ଦ୍ର ସରକାର ତଥା କେନ୍ଦ୍ର ମନ୍ତ୍ରୀମାନେ ବାରମ୍ବାର ବାହାସ୍ଫୋଟ ମାରୁଛନ୍ତି । ମାତ୍ର କରୋନା କାଳରେ ବୀମା ପ୍ରିମିୟମ ଅବଧି ଭରିବା ସମୟକୁ ୧୬ଦିନ କମ୍ କରିଦେବା ଚାଷୀଙ୍କ ପ୍ରତି ହତାଦରକୁ ସୂଚାଇ ଦେଉଛି । ଓଡ଼ିଶା ସରକାର ଏହାକୁ ଦୃଷ୍ଟିରେ ରଖି ଏହି ଅବଧିକୁ କିଭଳି ଡିସେମ୍ବର ୩୧ତାରିଖ ପର୍ଯ୍ୟନ୍ତ ବୃଦ୍ଧି କରାଯାଇ ପାରିବ, ସେଥିପ୍ରତି ପଦକ୍ଷେପ ନେବା ଜରୁରୀ । ଏ ସମ୍ପର୍କରେ ବରଗଡ଼ ଜିଲା ମୁଖ୍ୟ କୃଷି ଅଧିକାରୀ ଦୀନବନ୍ଧୁ ଗାନ୍ଧୀଙ୍କୁ ପଚାରିବାରୁ ସେ କହିଥିଲେ, ଯେହେତୁ ଡିସେମ୍ବର ୩୧ ବଦଳରେ ୧୫ତାରିଖ ପର୍ଯ୍ୟନ୍ତ ଏହି ଅବଧି ରହିଥିଲା। ସେଥିପାଇଁ ୮ଟି ସ୍ବତନ୍ତ୍ର ଗାଡ଼ିରେ ସେ ସମ୍ପର୍କରେ ପ୍ରଚାର କରି ଚାଷୀଙ୍କୁ ସଚେତନ କରାଯାଇଥିଲା ।
-ପ୍ରେମାନନ୍ଦ ଖମାରୀ