ସରଣ୍ଡା,୨ା୧୨(ଡି.ଏନ୍.ଏ.): ବରଗଡ଼ ଜିଲାରେ ଖରିଫ ଋତୁର ଧାନ ବିକ୍ରି ଲାଗି ପ୍ରଥମରୁ ଚାଷୀଙ୍କ ସମସ୍ୟା ବଢ଼ିବାରେ ଲାଗିଛି। ଆରମ୍ଭରୁ ଟୋକନ ସମସ୍ୟା ଦେଖାଦେଇଛି। ଏପରି ସ୍ଥଳେ ଚାଷୀ ଓ ପ୍ରଶାସନର ଆଲୋଚନା ମଧ୍ୟ ବିଫଳ ହୋଇଛି। ଫଳରେ ଚାଷୀ ଗୁରୁବାରର ନିଷ୍ପତ୍ତି ଅନୁସାରେ ଶୁକ୍ରବାର ସକାଳ ୮ଟାରୁ ବରଗଡ଼ ଜିଲା ଗୋଡ଼ଭଗା ମାର୍କେଟ ୟାର୍ଡ ସମ୍ମୁଖ ସମ୍ବଲପୁର-ବରଗଡ଼ ଓ ବରଗଡ଼ ସମ୍ବଲପୁର ୫୩ ନମ୍ବର ଜାତୀୟ ରାଜପଥରେ ଧାନବସ୍ତା ପକାଇ ଅବରୋଧ କରିଛନ୍ତି। ଓଡ଼ିଶା ରାଜ୍ୟ କୃଷକ ସଂଗଠନ ଅତାବିରାର ଆହ୍ବାନ କ୍ରମେ ସଭାପତି ବୀରେନ୍ଦ୍ର କରଙ୍କ ନେତୃତ୍ୱରେ ରାସ୍ତାରୋକୋ ଚାଲିଛି। ଖବର ପାଇ ଅତାବିରା ଥାନା ଆଇଆଇସି ଅନିଲ କୁମାର ପ୍ରଧାନ ଚାଷୀଙ୍କ ସହ ଆଲୋଚନା କରିଥିଲେ। ତେବେ ଚାଷୀ ମାନି ନ ଥିଲେ। ପରେ ବରଗଡ଼ ଉପଜିଲାପାଳ ଲଲାଟ କୁମାର ଲୁହା, ଡିଆରସିଏସ୍ କେ. ସେଠୀ, ଏଆର୍ସିଏସ୍ ଅଶୋକ ଦାଶ, ବରଗଡ଼ ଅତିରିକ୍ତ ଯୋଗାଣ ଅଧିକାରୀ ଜ୍ୟୋତ୍ସ୍ନାରାଣୀ କଣ୍ଠ, ଯୋଗାଣ ନିରୀକ୍ଷକ ରଞ୍ଜନ କୁମାର ନାୟକ, ଆର୍ଏମ୍ସି ସମ୍ପାଦକ ପ୍ରଦୀପ କୁମାର ବେସନ ପ୍ରମୁଖ ଚାଷୀଙ୍କ ସହ ଆଲୋଚନା କରିଛନ୍ତି। ତେବେ ଦାବି ପୂରଣ ହେବା ପରେ ହିଁ ଆନ୍ଦୋଳନ ପ୍ରତ୍ୟାହୃତ ହେବ ବୋଲି ଚାଷୀ ନେତା ପ୍ରକାଶ କରିଛନ୍ତି।
