ଦଶମନ୍ତପୁର, ୨୦।୮ ( ଡି.ଏନ.ଏ.): କୋରାପୁଟ ଜିଲା ଦଶମନ୍ତପୁର ବ୍ଲକ ଅନ୍ତର୍ଗତ ଏ. ମାଲକାନଗିରି ପଞ୍ଚାୟତର ଏ.ଚଣ୍ଡାଲଗୁଡ଼ା ଗ୍ରାମରେ ପ୍ରଶାସନର ଅବହେଳାରୁ ଚାଷୀଙ୍କ ୭୦ ଏକର ଚାଷଜମି ନଷ୍ଟ ହେଉଥିବା ଅଭିଯୋଗ ହେଉଛି। ଆଡ଼ିବନ୍ଧ ଏବଂ ଚେକ୍ ଡ୍ୟାମ୍ ନିର୍ମାଣ ପାଇଁ ଚାଷୀ ଦାବି କରିଛନ୍ତି। ଆମ ଜଳସେଚିତ ଜମି ବର୍ଷା ହେଲେ ନାଳରେ ପ୍ରବଳ ମାତ୍ରାରେ ପାଣି ଆସି ଘାଇ ସୃଷ୍ଟି ହେଉଛି। ଜମି ନଷ୍ଟ ହୋଇଯାଉଛି ବୋଲି ଚାଷୀ ହଳଧର ନାୟକ, ବିଦ୍ୟାଧର ତନ୍ତି, ସଞ୍ଜୀବ ନାୟକ,ଲୋଚନ ମାଳି, ସୁରେଶ ତନ୍ତି, ପଦୁ ମାଳି ପ୍ରମୁଖ କହିଛନ୍ତି। ବର୍ତ୍ତମାନ ଡୁମୁରିଚୁଆର ପାଣି ମାଡ଼ି ଚାଷୀଙ୍କ ଜମି ନଷ୍ଟ ହେବାରେ ଲାଗିଛି । ଏ ନେଇ ଅନେକ ଥର ପ୍ରଶାସନ ଦୃଷ୍ଟି ଆକର୍ଷଣ କରିଥିଲେ ହେଁ ଚେକ୍ ଡ୍ୟାମ୍ କିମ୍ବା ଆଡିବନ୍ଧ ନିର୍ମାଣ କରାଯାଉନାହିଁ ବୋଲି ଚାଷୀମାନେ ଅଭିଯୋଗ କରିଛନ୍ତି। ସୁନାମୁଣ୍ଡନାଳଠାରୁ ତେନ୍ତୁଳିଗାଡ଼ ନଦୀ ପର୍ଯ୍ୟନ୍ତ ମାତ୍ର ୨ଶହ ମିଟର ଆଡ଼ିବନ୍ଧ ଏବଂ ୩ଟି ଚେକ୍ ଡ୍ୟାମ୍ ନିର୍ମାଣ ହେଲେ ଚାଷୀମାନେ ଉପକୃତ ହେବେ ବୋଲି କହିଛନ୍ତି। ତୁରନ୍ତ ଏ ଦିଗରେ ପଦକ୍ଷେପ ନ ନେଲେ ଆଗାମୀ ଦିନରେ ୫୦୦ ଚାଷୀ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେବେ ବୋଲି ଚେତାବନୀ ଦେଇଛନ୍ତି।