ବନ୍ଧାକୋବି କିଆରିରେ ଗୋରୁ, ଛେଳି ଛାଡ଼ିଲେ ଚାଷୀ

ବରଗଡ଼,୬।୩(ପ୍ରେମାନନ୍ଦ ଖମାରୀ)କୃଷିବହୁଳ ବରଗଡ଼ ଜିଲାରେ ଅଣଧାନ ଫସଲ କରିବାକୁ କୃଷି ବିଭାଗ ପରାମର୍ଶ ଦେଉଛି। ହେଲେ ପରିବା ସଂରକ୍ଷିତ ରଖିବା ପାଇଁ ଜିଲାରେ ସେଭଳି ଶୀତଳ ଭଣ୍ଡାର ବ୍ୟବସ୍ଥା ନାହିଁ। ଫଳରେ ପରିବା ଚାଷ କରି ମଧ୍ୟ ଜିଲାର ଚାଷୀମାନଙ୍କୁ କ୍ଷତିଗ୍ରସ୍ତ ହେବାକୁ ପଡ଼ିଛି। ଜିଲାରେ ଏଥର ଟମାଟୋ ଚାଷ କରି ଚାଷୀଙ୍କୁ ବହୁତ କ୍ଷତି ସହିବାକୁ ପଡ଼ିଛି। ଅନୁରୂପଭାବେ ବନ୍ଧାକୋବି ଚାଷରେ ମଧ୍ୟ ଚାଷୀମାନଙ୍କୁ ସମଦଶା ଭୋଗିବାକୁ ପଡ଼ିଛି। ଟମାଟୋ ଭଳି ବନ୍ଧାକୋବିକୁ ମଧ୍ୟ ବେପାରୀମାନେ କିଲୋ ପ୍ରତି ୨ଟଙ୍କା ଦରରେ କିଣୁଛନ୍ତି। ଫଳରେ ଚାଷୀ ଭାଙ୍ଗି ପଡ଼ି ଶେଷରେ ପରିବା କିଆରିରେ ଗାଈଗୋରୁ ଏବଂ ଛେଳି ଛାଡ଼ି ଦେଉଛନ୍ତି। ଜିଲାର ବିଜେପୁର ବ୍ଲକ ଅନ୍ତର୍ଗତ ଗୁଡ଼ିମୁଣ୍ଡା ଗ୍ରାମରେ ଏଭଳି ଦୃଶ୍ୟ ଦେଖିବାକୁ ମିଳିଛି। କେବଳ ଗୁଡ଼ିମୁଣ୍ଡା ନୁହେଁ, ଜିଲାର ଯେଉଁଠି ବି ଚାଷୀମାନେ ଟମାଟୋ କିମ୍ବା ବନ୍ଧାକୋବି ଚାଷ କରିଛନ୍ତି, ସେମାନଙ୍କୁ ଏଭଳି କ୍ଷତି ସହିବାକୁ ପଡୁଛି। ଜିଲାରେ ପରିବା ସଂରକ୍ଷିତ ରଖିବା ପାଇଁ ଶୀତଳ ଭଣ୍ଡାର ଥିଲେ ସେମାନେ ଏଭଳି ସମସ୍ୟାର ସମ୍ମୁଖୀନ ହୋଇ ନଥାନ୍ତେ ବୋଲି ଚାଷୀମାନେ କହିଛନ୍ତି।

ଜିଲାରେ ଉଭୟ ଜଳସେଚିତ ଏବଂ ଅଣଜଳସେଚିତ ଅଞ୍ଚଳର ଚାଷୀମାନେ ବନ୍ଧାକୋବି ଚାଷ କରିଥାନ୍ତି। ତେବେ ସେତେ ବେଶୀ ପାଣି ଆବଶ୍ୟକ କରୁ ନଥିବା ଏବଂ ଢ଼ିପ ଜମି କୋବି ଫସଲ ପାଇଁ ଅନୁକୂଳ ହୋଇଥିବା ଯୋଗୁ ଅଣଜଳସେଚିତ ଅଞ୍ଚଳରେ ଅଧିକ ପରିମାଣରେ ଏହି ଚାଷ ହୋଇଥାଏ। ଏହି କ୍ରମରେ ଜିଲାର ପଦ୍ମପୁର ଉପଖଣ୍ଡର ବିଜେପୁର, ପଦ୍ମପୁର, ସୋହେଲା ଆଦି ଅଞ୍ଚଳରେ ଏହି ଚାଷ ଚାଷୀମାନେ କରିଥିଲେ। ବରଗଡ଼ ଉପଖଣ୍ଡର ଜମୁର୍ଡ଼ା, ସର୍ଲା, ଜାମପାଲି, ବରଗାଁ ଆଦି ଅଞ୍ଚଳରେ ମଧ୍ୟ ବନ୍ଧାକୋବି ଚାଷ ହୋଇଥିଲା। ଫସଲ ଭଲ ହୋଇଥିଲା। ଚାଷୀମାନେ ବେଶ୍‌ ଦିପଇସା ରୋଜଗାର କରିବୁ ବୋଲି ମନରେ ଆଶା ବାନ୍ଧିଥିଲେ। କିନ୍ତୁ ଟମାଟୋ ଭଳି ବନ୍ଧାକୋବି ଯେତେବେଳେ ଅମଳ ଅବସ୍ଥାକୁ ଆସିଲା, ସେତେବେଳେ ବିଲରେ ବନ୍ଧାକୋବି ଦର କିଲୋ ପ୍ରତି ଦେଢ଼, ୨ଟଙ୍କାରୁ ଅଧିକ ଦାମ୍‌ରେ ନେବାକୁ ବେପାରୀମାନେ ରାଜି ହେଉ ନାହାନ୍ତି। ଏଭଳି ସ୍ଥିତିରେ ଚାଷୀମାନେ ସେମାନଙ୍କ ବନ୍ଧାକୋବି କିଆରିରେ ଗୃହପାଳିତ ଗୋରୁ, ଛେଳି ଛାଡ଼ି ଦେବାକୁ ବାଧ୍ୟ ହୋଇଛନ୍ତି।

ବିଜେପୁର ବ୍ଲକ ଗୁଡ଼ିମୁଣ୍ଡାର ଚାଷୀ ପ୍ରହଲ୍ଳାଦ ନାଏକ କହିଛନ୍ତି, ସେ ୮୦ଡେସିମିଲ ଜମିରେ ବନ୍ଧାକୋବି ଚାଷ କରିଥିଲେ। ତାହା ଭଲ ମଧ୍ୟ ହୋଇଥିଲା। ହେଲେ ଅମଳ ସମୟକୁ ବେପାରୀମାନେ ବିଲକୁ ପହଞ୍ଚିଥିଲେ ଏବଂ କିଲୋ ପ୍ରତି ଦେଢ଼ରୁ ୨ଟଙ୍କା ଦରରେ ନେବାକୁ କହିଥିଲେ। ଫଳରେ ତାଙ୍କ କିଆରିରେ ସେ ଛେଳି, ଗାଈଗୋରୁ ଛାଡ଼ି ଦେଇଥିବା ସେ କହିଥିଲେ। ପରିବାକୁ ସଂରକ୍ଷିତ ରଖିବା ପାଇଁ ସରକାର ଶୀତଳ ଭଣ୍ଡାର କରିଥିଲେ ସେ ଏଭଳି ସମସ୍ୟାର ସମ୍ମୁଖୀନ ହୋଇ ନଥାନ୍ତେ ବୋଲି ପ୍ରହଲ୍ଲାଦ କହିଛନ୍ତି। ସେହିପରି ଅନ୍ୟଜଣେ ମହିଳା ଚାଷୀ ଫଟୁ ମହାନନ୍ଦ କହିଛନ୍ତି, ବନ୍ଧାକୋବି, ଟମାଟର, ବାଇଗଣ ସବୁ ପରିବା ଦର କମି ଯାଇଛି। ବଜାରକୁ ବିକ୍ରି କରିବାକୁ ନେଲେ ସେଠାରେ ବେପାରୀମାନେ ଶସ୍ତାରେ ମାଗୁଛନ୍ତି। ଫଳରେ ଚାଷୀମାନେ ନିରାଶରେ ଘରକୁ ଫେରୁଛନ୍ତି। ଆମେ ଗରିବ ଲୋକ, ପରିବା ଚାଷ କରି ସେଥିରୁ କିଛି ରୋଜଗାର କରିବୁ ବୋଲି ଆଶା କରିଥିଲୁ। କିନ୍ତୁ ବନ୍ଧାକୋବି ଅମଳ ହେବା ପରେ ଦର ଶସ୍ତା ହୋଇଗଲା। ତାକୁ ବିକିଲେ ମଧ୍ୟ ମୂଳ ମିଳୁ ନାହିଁ। ଫଳରେ ପରିବା କିଆରିରେ ଛେଳି, ଗାଈଗୋରୁ ଛାଡ଼ି ଦେଉଛୁ। ସରକାର ଏଥିପାଇଁ କିଛି ବ୍ୟବସ୍ଥା କରିବା ଦରକାର ବୋଲି ସେ କହିଥିଲେ।

ଜିଲାରେ ପରିବା ସଂରକ୍ଷିତ ରଖିବାକୁ ଶୀତଳ ଭଣ୍ଡାର ଥିଲେ ଚାଷୀମାନଙ୍କୁ ଏଭଳି ସମସ୍ୟାର ସମ୍ମୁଖୀନ ହେବାକୁ ପଡ଼ି ନଥାନ୍ତା ବୋଲି ବିଭିନ୍ନ ମହଲରେ ମତପ୍ରକାଶ ପାଇଛି। କିନ୍ତୁ ଏ ଯାଏ ଜିଲାରେ ଗୋଟିଏ ମଧ୍ୟ ସରକାରୀ ଶୀତଳ ଭଣ୍ଡାର କାର୍ଯ୍ୟକ୍ଷମ ହୋଇପାରି ନାହିଁ। ବରଗଡ଼ ବ୍ଲକର ଏକାମ୍ର ଛକ ଏବଂ ସୋହେଲା ବ୍ଲକର ଛୁରିଆପାଲିରେ ୧ଏକର ପରିମିତ ଜମିରେ ଗୋଟିଏ ଲେଖାଏ ଶୀତଳ ଭଣ୍ଡାର ନିର୍ମାଣ କରିବାର ପ୍ରସ୍ତାବ ରହିଛି। ସେହିପରି ଭେଡ଼େନ ଓ ଗାଇସିଲେଟ୍‌ ବ୍ଲକରେ ଓରେଡ଼ା ୧୦ମେଟ୍ରିକ ଟନ୍‌ କ୍ଷମତା ସମ୍ପନ୍ନ ଶୀତଳ ଭଣ୍ଡାର ନିର୍ମାଣ କରିବାର ଯୋଜନା ରହିଛି। ନିୟନ୍ତ୍ରିତ ବଜାର କମିଟି ପକ୍ଷରୁ ୨ଟି ସୋଲାର ଶୀତଳ ଭଣ୍ଡାର ରହିଥିଲେ ସୁଦ୍ଧା ତାହା କାର୍ଯ୍ୟକ୍ଷମ ହୋଇପାରି ନାହିଁ। ଅନ୍ୟପଟେ ବରଗଡ଼ ବ୍ଲକ କୁରୁଆଁ ଗ୍ରାମରେ ୨୫୦୦ ମେଟ୍ରିକ ଟନ୍‌ କ୍ଷମତା ସମ୍ପନ୍ନ ଏକ ଘରୋଇ ଶୀତଳ ଭଣ୍ଡାର ରହିଥିବାବେଳେ ଗୋବିନ୍ଦପୁରରେ ଆଉ ଏକ ଘରୋଇ ଶୀତଳ ଭଣ୍ଡାର ନିର୍ମାଣାଧୀନ ରହିଛି। ତେବେ କୃଷିବହୁଳ ଜିଲାଭାବେ ବରଗଡ଼ର ଏକ ସ୍ବତନ୍ତ୍ର ପରିଚୟ ଥିବାବେଳେ ଏଠାରେ ଶୀତଳ ଭଣ୍ଡାର ଅଭାବ ଯୋଗୁ ଚାଷୀମାନେ ପରିବା ବିକ୍ରିରେ ଅଭାବିବିକ୍ରିର ସମ୍ମୁଖୀନ ହେବା ବିଡ଼ମ୍ବନାର ବିଷୟ ବୋଲି ସଚେତନ ନାଗରିକ ମହଲରେ ମତପ୍ରକାଶ ପାଇଛି।