ନୂଆଦିଲ୍ଲୀ,୨୬।୩: ସଂଯୁକ୍ତ କିଷାନ ମୋର୍ଚ୍ଚା ପକ୍ଷରୁ ଆଜି ୧୨ ଘଣ୍ଟିଆ ଭାରତ ବନ୍ଦ ଡାକରା ଦିଆଯାଇଛି। କେନ୍ଦ୍ର ସରକାର ଆଣିଥିବା ୩ କୃଷି ଆଇନ ବିରୋଧରେ ମୋର୍ଚ୍ଚା ପକ୍ଷରୁ ଦିଆଯାଇଥିବା ବନ୍ଦ ଡାକରାକୁ ବିଭିନ୍ନ ରାଜନୀତିକ ଦଳ ସମର୍ଥନ କରୁଛନ୍ତି। ବନ୍ଦ ବେଳେ ଦେଶର ସମସ୍ତ ସଡ଼କ, ରେଳ ପରିବହନ ସମେତ ଦୋକାନ ବଜାର ଓ ସର୍ବସାଧାରଣ ସ୍ଥାନ ବନ୍ଦ ରହିବ। କିନ୍ତୁ ଜରୁରୀ ସେବା ଗୁଡିକୁ ଅନୁମତି ମିଳିବ। ଆମ୍ବୁଲାନ୍ସ ଯିବା ଆସିବାରେ କେହି ବି ବାଧା ସୃଷ୍ଟି କରିବେ ନାହିଁ ବୋଲି ମୋର୍ଚ୍ଚା ପକ୍ଷରୁ କୁହାଯାଇଛି।
ଚାଷୀଙ୍କ ବନ୍ଦ ଡାକରାର ପ୍ରଭାବ ସକାଳୁ ସକାଳୁ କିଛି ସ୍ଥାନରେ ଦେଖିବାକୁ ମିଳିଲାଣି। ବିକ୍ଷୋଭକାରୀମାନେ ପିକେଟିଂ କରି ରାସ୍ତା ରୋକ ମଧ୍ୟ କରିବା ଆରମ୍ଭ କରିଛନ୍ତି। ଦିଲ୍ଲୀ ଏନସିଆର ଅଞ୍ଚଳରେ ଏହାର ପ୍ରଭାବ ଅଧିକ ଦେଖିବାକୁ ମିଳିଛି। ବିଭିନ୍ନ ସ୍ଥାନରେ ବିକ୍ଷୋଭକାରୀ ରେଳ ଧାରଣାରେ ବସି ଟ୍ରେନ ଚଳାଚଳକୁ ଅଟକାଇ ଦେଇଛନ୍ତି। ଭାରତ ବନ୍ଦ ସମୟରେ ପଞ୍ଜାବ-ହିମାଚଳ ସୀମାରେ କୃଷକ ଆନ୍ଦୋଳନକାରୀମାନେ ଧର୍ମଘଟ କରିଛନ୍ତି। ହିମାଚଳରୁ ଆସୁଥିବା ଲୋକଙ୍କୁ ସୀମାରେ ଅଟକାଇ ଦିଆଯାଇଥିଲା। ବନ୍ଦକୁ ଦୃଷ୍ଟିରେ ରଖି ବିଭିନ୍ନ ସ୍ଥାନରେ ପୋଲିସ ଫୋର୍ସ ମୁତୟନ କରାଯାଇଛି। ବିଭିନ୍ନ କୃଷକ ସଂଗଠନର ଲୋକମାନେ ଏହି ଧର୍ମଘଟରେ ଯୋଗ ଦେଇଛନ୍ତି ଏବଂ ହିମାଚଳରୁ ଆସୁଥିବା ଲୋକମାନେ ସମସ୍ୟାର ସମ୍ମୁଖୀନ ହେଉଛନ୍ତି। ସେହିପରି ଗାଜିପୁର ବର୍ଡରରେ କୃଷକମାନେ ନାଚି-ଗାଇ ବନ୍ଦ ପାଳନ କରୁଛନ୍ତି।