ନୀଳଗିରି,୧୯।୧୧(ସ୍ବ.ପ୍ର.): ମୌସୁମୀ ବର୍ଷା ଅଭାବ ଯୋଗୁ ଆଜି ସାରା ରାଜ୍ୟରେ ଚାଷୀକୁଳ ହତାଶ ହୋଇପଡିଛନ୍ତି। ବିଶେଷ କରି ବାଲେଶ୍ୱର ଜିଲା ନୀଳଗିରି ଉପଖଣ୍ଡରେ ଏହାର ପ୍ରଭାବ ଅଧିକ। ଏହା ଏକ ପାହାଡ଼ିଆ ଅଞ୍ଚଳ। ଦେବଗିରି ପାହାଡ଼, କୁଲଡ଼ିହା ଅଭୟାରଣ୍ୟ, ବିଜ୍ଞାପିତ ଅଞ୍ଚଳକୁ ଲାଗି ସ୍ବର୍ଣ୍ଣଚୂଡ଼ ପର୍ବତ। ପାହାଡ଼ପର୍ବତରୁ ପାଣି ସମୁଦ୍ରରେ ମିଶେ। ମାତ୍ର ଉକ୍ତ ପାଣିକୁ ଅଟକାଇବା ଭଳି କୌଣସି ନଦୀବନ୍ଧ ଯୋଜନା ନାହିଁ। ଦୁଇମାସ ଧରି ମୌସୁମୀ ବର୍ଷା ନ ହେବା ଯୋଗୁ ଧାନଫସଲ ୯୦ଭାଗ ଉଜୁଡିବାକୁ ବସିଛି। ଗଛ ମରିଯାଇଥିବାବେଳେ ଏକର ଏକର ଜମିରେ ଧାନ ବାହାରି ପାରିନି। ବହୁ କ୍ଷେତରେ ଚକଡ଼ା ପୋକ ଲାଗି ନଷ୍ଟ ହୋଇଛି ତ ଆଉ କେଉଁଠି ହାତୀମାନେ ଉପଦ୍ରବ କରି ନଷ୍ଟ କରିଛନ୍ତି। ଚାଷୀକୁଳଙ୍କୁ ଉଦ୍ଧାର ପାଇଁ ସିପିଆଇ ନୀଳଗିରି ଆଞ୍ଚଳିକ କମିଟି ପକ୍ଷରୁ ଶୁକ୍ରବାର ଜଗନ୍ନାଥ ମନ୍ଦିର ସମ୍ମୁଖରୁ ଶତାଧିକ ଚାଷୀ ଶୋଭାଯାତ୍ରାରେ ନୀଳଗିରି ବଡ଼ଦାଣ୍ଡ ପରିକ୍ରମା କରି ଉପଜିଲାପାଳଙ୍କ ଅଫିସ ଆଗରେ ବିକ୍ଷୋଭ ପ୍ରଦର୍ଶନ କରିଥିଲେ। କୃଷିଋଣ ଛାଡ଼ କରିବା ସହ ଚାଷୀଙ୍କ ପରିବାରଙ୍କୁ ସହାୟତା ଦାବିରେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ନୀଳଗିରି ଉପଜିଲାପାଳ ଦୀପ୍ତିରଞ୍ଜନ ସେଠୀଙ୍କ ଜରିଆରେ ୯ଟି ବିଷୟରେ ସ୍ମାରକପତ୍ର ପ୍ରଦାନ କରାଯାଇଛି। ଦାବିଗୁଡିକ ମଧ୍ୟରେ ନୀଳଗିରି ଉପଖଣ୍ଡକୁ ମରୁଡ଼ି ଅଞ୍ଚଳ ଘୋଷଣା, ୨୦୧୯ର ବାକି ଥିବା ଇନପୁଟ ସବ୍ସିଡ଼ି ଓ ୨୦୨୧ର କୃଷି ବୀମା ରାଶି ଚାଷୀଙ୍କୁ ଦେବାରେ ବ୍ୟବସ୍ଥା, ରବିଚାଷ ପାଇଁ ଚାଷୀଙ୍କୁ ସବ୍ସିଡ଼ି ବିହନ ଓ କୃଷି ଋଣ, ମରୁଡ଼ି ଅଞ୍ଚଳର ମୂଲିଆଙ୍କୁ ଏମ୍ଜିଏନଆରଇଜିଏସ୍ରେ ୨୦୦ ଦିନର କାମ, ଗରିବ ହିତାଧିକାରୀଙ୍କୁ ପ୍ରଧାନମନ୍ତ୍ରୀ ଆବାସ, ଚାଷୀଙ୍କଠାରୁ ସରକାରୀ ଧାର୍ଯ୍ୟ ଦରରେ ଧାନ ନିଜେ ସରକାର କିଣିବାର ବ୍ୟବସ୍ଥା ଆଦି ଅନ୍ତର୍ଭୁକ୍ତ। ଦାବିଗୁଡ଼ିକ କାର୍ଯ୍ୟକାରୀ ନ ହେଲେ ସିପିଆଇ, ନୀଳଗିରି ଆଞ୍ଚଳିକ କମିଟି ଗଣତାନ୍ତ୍ରିକ ପଦ୍ଧତିରେ ରାଜରାସ୍ତାକୁ ଓହ୍ଲାଇବାକୁ ବାଧ୍ୟ ହେବ ବୋଲି ସୂଚନା ଦେଇଛନ୍ତି। ସିପିଆଇର ରାଜ୍ୟ ସମ୍ପାଦକ ଅଭୟ ସାହୁ, ସର୍ବଭାରତୀୟ ସିପିଆଇର ସଭ୍ୟ ଆଶିଷ କାନୁନଗୋ, ଅନାମ ପ୍ରସାଦ ବାରିକ, ନିରଞ୍ଜନ ବାରିକ, କୈଳାସ ଚନ୍ଦ୍ର ପଣ୍ଡା, କରୁଣାକର ପରିଡା, ପୁରୁଷୋତ୍ତମ ସେଠୀ, ଦେବେନ୍ଦ୍ର ବେହେରା, ନିହାର ରଞ୍ଜନ ଜେନା, ହରେକୃଷ୍ଣ ପଣ୍ଡିତ, ହରେକୃଷ୍ଣ ରାଉତଙ୍କ ସମେତ ଶତାଧିକ ଚାଷୀ ଓ ଗ୍ରାମବାସୀ ଉପସ୍ଥିତ ଥିଲେ।