ରେଳରୋକୋ ପାଇଁ ଷ୍ଟେଶନ ଆସିପାରିଲେନି ଚାଷୀ, ଶେଷରେ ରାସ୍ତାରେ ବସିଲେ

ବରଗଡ଼,୧୦ା୩(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ପ୍ରଧାନମନ୍ତ୍ରୀ ଫସଲବୀମା ଯୋଜନା ବାଟବଣା ହୋଇପଡ଼ିଛି। ଏଠାରେ ଅନେକ କ୍ଷତିଗ୍ରସ୍ତ ଚାଷୀଙ୍କୁ ବୀମା କ୍ଷତିପୂରଣ କିମ୍ବା ଇନପୁଟ୍‌ ସହାୟତା ମିଳୁ ନ ଥିବା ଅଭିଯୋଗ ହୋଇଛି। ଏହାକୁ ନେଇ ସୋମବାର ସକାଳ ୯ଟାରୁ ବରଗଡ଼ ରୋଡ୍‌ ରେଳ ଷ୍ଟେଶନରେ ରେଲରୋକୋ କରିବା ପାଇଁ ସଂଯୁକ୍ତ କୃଷକ ସଂଗଠନ ଭେଡେନ ବ୍ଲକ ଶାଖା ନିଷ୍ପତ୍ତି ନେଇଥିଲା। କିନ୍ତୁ ପୋଲିସ ରାତିଅଧିଆ କିଛି ଚାଷୀନେତାଙ୍କୁ ଉଠାଇ ନେଇଥିବାବେଳେ ରେଳ ଷ୍ଟେଶନକୁ ଆସୁଥିବା ଚାଷୀଙ୍କ ଗାଡ଼ିକୁ ପୋଲିସ ଅଧବାଟରେ ଅଟକାଇ ରଖିଥିଲା। ରେଳଷ୍ଟେଶନକୁ ପୋଲିସ ଏବଂ ଆରପିଏଫ୍‌ ଚାରିଆଡୁ ଘେରି ରହିଛନ୍ତି। ସେହିପରି ଚାଷୀମାନଙ୍କ ଗତିବିଧି ଉପରେ ମଧ୍ୟ ପୋଲିସ ନଜର ରଖିଛି। ଏଭଳି ସ୍ଥିତିରେ ଚାଷୀମାନେ ବରଗଡ଼-ଭେଡେନ ରାସ୍ତାକୁ ବରମକେଲା ଛକରେ ଅବରୋଧ କରିଛନ୍ତି। ଫଳରେ ରାସ୍ତାର ଉଭୟ ପାଶର୍‌ବରେ ଗାଡ଼ିମୋଟର ଅଟକି ରହିଛି। ଯାତାୟାତ ଠପ ପଡିଛି।

ପ୍ରକାଶ ଥାଉକି, ଗତ ୨୦୨୩ରେ ମିଗ୍‌ଜୋମ ବାତ୍ୟା ସମୟରେ କ୍ଷତିଗ୍ରସ୍ତ ଚାଷୀଙ୍କୁ ଏପର୍ଯ୍ୟନ୍ତ ବୀମା କ୍ଷତିପୂରଣ କିମ୍ବା ଇନପୁଟ୍‌ ସହାୟତା ମିଳିପାରି ନାହିଁ। ଅନ୍ୟପଟେ ବିଭିନ୍ନ ଚାଷୀଙ୍କୁ ନାନା ଆଳ ଦେଖାଇ ସେଥିରୁ ବଞ୍ଚିତ କରାଯାଇଥିବା ଚାଷୀମାନେ ଅଭିଯୋଗ କରିଛନ୍ତି। ଏ ନେଇ ସଂଯୁକ୍ତ କୃଷକ ସଂଗଠନ ବାରମ୍ବାର ଜିଲା ପ୍ରଶାସନର ଦୃଷ୍ଟି ଆକର୍ଷଣ କରିଛି। ପ୍ରଶାସନ, ବୀମା କମ୍ପାନୀ ଏବଂ ଚାଷୀ ସଂଗଠନ ମଧ୍ୟରେ ତୁହାକୁ ତୁହା ବୈଠକ ବସିଛି। ହେଲେ ବୈଠକରେ କୌଣସି ନିର୍ଯ୍ୟାସ ବାହାରି ପାରିନାହିଁ। ଫଳରେ ପୂର୍ବ ନିର୍ଦ୍ଧାରିତ କାର୍ଯ୍ୟକ୍ରମ ଅନୁଯାୟୀ ସୋମବାର ଚାଷୀମାନେ ଆନ୍ଦୋଳନକୁ ଓହ୍ଲାଇଛନ୍ତି।