ନୂଆଦିଲ୍ଲୀ,୧୧ ।୧୨: କେନ୍ଦ୍ର ସରକାରଙ୍କ ନୂଆ କୃଷି ଆଇନକୁ ବିରୋଧ କରି ଦୀର୍ଘ ପ୍ରାୟ ବର୍ଷକରୁ ଊର୍ଦ୍ଧ୍ୱ ସମୟ ହେବ ଦିଲ୍ଲୀ ସୀମାରେ ଆନ୍ଦୋଳନ କୃଷକଙ୍କ ଦାବି ପୂରଣ ହେବା ପରେ ଏବେ ସେମାନେ ଘର ବାହୁଡିଛନ୍ତି । କେବଳ କୃଷି ଆଇନ ନୁହେଁ ଆଉ କିଛି ଦାବି ନେଇ ଆନ୍ଦୋଳନରେ ବସିଥିବା କୃଷକଙ୍କ ଦାବି ପୂରଣ ହେବ ବୋଲି ସରକାର କଥା ଦେବା ପରେ ଏମାନେ ଆନ୍ଦୋଳନରୁ ଉଠିଛନ୍ତି । ଶୁକ୍ରବାର ରାସ୍ତା କଡରେ ଟେଣ୍ଟ ଉଠାଇବା ବେଳେ ଲାଉଡସ୍ପିକରରେ ପଞ୍ଜାବୀ ଗୀତଗାଇ ଏମାନେ ଯେଉଁଭଳି ଭାବରେ ଉତ୍ସବ ମନାଉଥିଲେ ଲାଗୁଥିଲା ଏହା ଯେମିତି କୌଣସି ମେଳାର ଦୃଶ୍ୟ । ଏବେ ବାକି ରହିଯାଇଥିବା କୃଷକମାନେ ଶନିବାର ସେମାନଙ୍କ ବିଜୟ ଉତ୍ସବ ପାଳନ କରିବାକୁ ଏକ ରାଲି ବାହାର କରିବେ । ଏହାପରେ ସେମାନେ ଘରକୁ ଫେରିଯିବେ ବୋଲି ଜଣାପଡିଛି । ବିଜୟ ରାଲିରେ ସାମିଲ ହେବା ଲାଗି ପଞ୍ଜାବ ଓ ହରିୟାଣାରୁ ପ୍ରାୟ ୫୦୦ ଟ୍ରାକ୍ଟର-ଟ୍ରଲି କୁଣ୍ଡଲି ସୀମାରେ ପହଞ୍ଚିଛି । ଆଉ ଘର ବାହୁଡିବାକୁ କୃଷକମାନେ ସେମାନଙ୍କ ଜିନିଷ ପତ୍ର ପ୍ୟାକିଂ କରିସାରିଥିବା କୁହାଯାଉଛି । ଏମାନେ ପ୍ରଥମେ ନିଜନିଜର କାମ ସାରି ୨ ଘଣ୍ଟା ପର୍ଯ୍ୟନ୍ତ ଲଙ୍ଗରରେ ବସିବେ ଏହାପରେ ବିଜୟ ରାଲି ବାହାର କରି ନିଜ ନିଜ ଘରକୁ ବାହୁଡିଯିବେ ବୋଲି ସୂଚନା ରହିଛି ।