ସମ୍ବଲପୁର,୨୯ା୧୧(ବ୍ୟୁରୋ): ସମଗ୍ର ପଶ୍ଚିମ ଓଡ଼ିଶାରେ ଧାନ ସଂଗ୍ରହରେ ଅବ୍ୟବସ୍ଥା ଦେଖା ଦେଇଛି। ଟୋକନ ସମସ୍ୟା ଚାଷୀଙ୍କ ପାଇଁ କାଳ ସାଜିଛି । ଅନ୍ୟପକ୍ଷେ ଏକର ପିଛା ୧୩ ରୁ ୧୯ କୁଇଣ୍ଟାଲ ପର୍ଯ୍ୟନ୍ତ ଧାନ ବିକ୍ରି ନିଷ୍ପତ୍ତି ଅଭାବୀ ବିକ୍ରି ପରିସ୍ଥିତି ସୃଷ୍ଟି କରିଛି । ଗତ ଏକ ମାସ ହେବ ଚାଷୀମାନେ ଏହି ସମସ୍ୟାର ସମାଧାନ ପାଇଁ ସରକାରଙ୍କ ନିକଟରେ ଦାବି କରି ଆସୁଛନ୍ତି । ହେଲେ କୌଣସି ପଦକ୍ଷେପ ଗ୍ରହଣ କରାଯାଉନାହିଁ। ବାସ୍ତବରେ କୃଷି ଓ ପରିସଂଖ୍ୟାନ ବିଭାଗ କ୍ରଫ୍ କଟିଂ ରିପୋର୍ଟକୁ ଆଧାର ନ କରି ମନଇଚ୍ଛା ଧାନ ବିକ୍ରିର ପରିମାଣ ଧାର୍ଯ୍ୟ କରିଛନ୍ତି । ଭୁବନେଶ୍ୱରରେ ବସି ତ୍ରୁଟିପୂର୍ଣ୍ଣ ଧାନ ସଂଗ୍ରହ ନୀତି ଲାଗୁ କରିବା ଚାଷୀଙ୍କ ପାଇଁ ସମସ୍ୟା ହୋଇଛି। ଏଥିପାଇଁ ସରକାରଙ୍କୁ ବହୁ ମୂଲ୍ୟ ଦେବାକୁ ପଡିବ ବୋଲି ଶନିବାର ଓଡ଼ିଶା ସାଂସ୍କୃତିକ ସମାଜ ଭବନରେ ଆୟୋଜିତ ଖବରଦାତା ସମ୍ମିଳନୀ ପଶ୍ଚିମ ଓଡିଶା କୃଷକ ସଙ୍ଗଠନ ଆବାହକ ଅଶୋକ ପ୍ରଧାନ କହିଛନ୍ତି ।
ସେ କହିଛନ୍ତି, ବହୁ ବର୍ଷ ହେବ ଚାଷୀମାନେ ଟୋକନ ବ୍ୟବସ୍ଥାକୁ ବିରୋଧ କରି ଆସିଛନ୍ତି । ହେଲେ ସରକାର ନିଜ ଜିଦ୍ରେ ଅଟଳ ରହିଛନ୍ତି। ନାମକୁମାତ୍ର ଜିଲାସ୍ତରୀୟ ଧାନ ସଂଗ୍ରହ ବୈଠକ କରାଯାଉଛି। ପୂର୍ବରୁ ଭୁବନେଶ୍ୱରରେ ସବୁ ନିଷ୍ପତ୍ତି ହେଉଛି । ଏଥିପାଇଁ ସ୍ଥାନୀୟ ଜନପ୍ରତିନିଧିମାନେ ବିଧାନସଭାରେ ପ୍ରଶ୍ନ କରି ପାରୁନାହାନ୍ତି । ଜାନୁୟାରୀ ଓ ଫେବୃୟାରୀ ପର୍ଯ୍ୟନ୍ତ ଟୋକନ ଦିଆଯାଇଛି । ଚାଷୀମାନେ ଆଗାମୀ ଚାଷ ପାଇଁ ପ୍ରସ୍ତୁତି କରିବେ ନା ଧାନ ବିକ୍ରି ପାଇଁ ସମୟ ଦେବେ । ଏପରି କି ଚାଷୀଙ୍କ ପାଖରେ ବନ୍ୟପ୍ରାଣୀ ଓ ପ୍ରକୃତି ପ୍ରକୋପରୁ ଫସଲକୁ ରକ୍ଷା କରିବା ପାଇଁ ଆବଶ୍ୟକ ଭିତ୍ତିଭୂମି ନାହିଁ । ବହୁଦିନରୁ ଚାଷୀଙ୍କ ମନରେ କୁହୁଳୁଥିବା ଅସନ୍ତୋଷ ଉଗ୍ରରୂପ ନେବ। ଡିସେମ୍ବର ୪ ସୁଦ୍ଧା ସରକାର ଏ ସଂକ୍ରାନ୍ତରେ କୌଣସି ସମାଧାନର ବାଟ ବାହାର ନ କଲେ ଆସନ୍ତା ୫ରୁ ଚାଷୀମାନେ ରାଜରାସ୍ତା ଅବରୋଧ କରିବେ । ଧାନ ବସ୍ତା, ଟ୍ରାକ୍ଟର, ଲଙ୍ଗଳ ସହିତ ବିଭିନ୍ନ ଚାଷ ଉପକରଣ ରାସ୍ତା ଉପରେ ରଖି ଚାଷୀମାନେ ଏହି ଆନ୍ଦୋଳନ କରିବେ । ୨୦୦୧ରେ ବରଗଡ ଜିଲା ବରାଗୁଡାରେ ଚାଷୀମାନେ ଜାତୀୟ ରାଜପଥକୁ ୭୨ ଘଣ୍ଟା ଅବରୋଧ କରିଥିଲେ । ଏହି ଆନ୍ଦୋଳନ ସେହିପରି ହେବ ବୋଲି ପ୍ରଧାନ ଚେତାବନୀ ଦେଇଛନ୍ତି ।
ଚାଷୀନେତା ଲିଙ୍ଗରାଜ କହିଛନ୍ତି, ରାଜ୍ୟ ଓ କେନ୍ଦ୍ର ସରକାର କୃଷି ବିରୋଧୀ କାର୍ଯ୍ୟ କରୁଛନ୍ତି। କେନ୍ଦ୍ର ସରକାରଙ୍କ କୃଷି ଆଇନକୁ କଳା ଆଇନ ଭାବେ ଚାଷୀମାନେ ଗ୍ରହଣ କରିଛନ୍ତି। ସମଗ୍ର ଦେଶରେ ଆନ୍ଦୋଳନ ହେଉଛି । ଏହାକୁ ପଶ୍ଚିମ ଓଡ଼ିଶା ଚାଷୀ ସଙ୍ଗଠନ ସମର୍ଥନ କରୁଛୁ । ଏ ନେଇ କେନ୍ଦ୍ର ଚାଷୀ ସଙ୍ଗଠନ ସହ ଆମେ ଯୋଗାଯୋଗରେ ଅଛୁ । ଚାଷୀଙ୍କ ସହ ଆଲୋଚନା କରି ଧାନ ସଂଗ୍ରହରେ ସୃଷ୍ଟି ହୋଇଥିବା ସମସ୍ୟାର ସମାଧାନ କରାଯାଉ ବୋଲି ସେ ଦାବି କରିଥିଲେ ।