ନୟାଗଡ଼,୪।୯(ଲୋକନାଥ ମିଶ୍ର): ନୟାଗଡ଼ ସହର ଖଣ୍ଡପଡ଼ା ରୋଡ଼ରେ ଥିବା ବଲାଙ୍ଗୀ ବନ୍ଧ ବଲାଙ୍ଗୀ ପାର୍କରେ ରୂପାନ୍ତରିତ ହେବା ପରେ ଚାଷୀ, ଚାଷ ଓ ସ୍ଥାନୀୟ ବାସିନ୍ଦାଙ୍କ ପାଇଁ ଦୁଃଖ ଆଣିଛି । ଆମୋଦ ପ୍ରମୋଦ ନଁାରେ ସରକାର ଚାଷୀ ଓ ଚାଷ ପାଇଁ ବ୍ୟବସ୍ଥା ନ କରି ଭୁଲିଯିବା ପରେ ନୟାଗଡ଼ ବ୍ଲକର ଲକ୍ଷ୍ମୀପ୍ରସାଦ ଓ ସିନ୍ଦୁରିଆ ପଞ୍ଚାୟତବାସୀ ଜଳସେଚନ କ୍ଷେତ୍ରରେ ହଇରାଣ ହେଉଥିବା ଅଭିଯୋଗ ହେଉଛି। ଅନ୍ୟପକ୍ଷେ କେତେଜଣ ଲୋକ ବନ୍ଧକୁ ପୋଖରୀ ଭାବେ ବ୍ୟବହାର କରି ସ୍ନାନ କରୁଥିଲେ। ଏପରି କି ଶୁଦ୍ଧକ୍ରିୟା ପାଇଁ ବଲାଙ୍ଗୀ ବନ୍ଧ ଲକ୍ଷ୍ମୀ ପ୍ରସାଦ ପଞ୍ଚାୟତର କେତେଜଣ ବାସିନ୍ଦା ପାଇଁ ସୁବିଧା ହେଉଥିଲା। ବନ୍ଧଟି ପାର୍କ ହୋଇ ଯିବା ପରେ ସ୍ଥାନୀୟ ଲୋକେ ହଇରାଣ ହେଉଛନ୍ତି ବୋଲି ଅଭିଯୋଗ ହେଉଛି।
ବଲାଙ୍ଗୀବନ୍ଧ ସାହିର ସନ୍ତୋଷ ପ୍ରଧାନ କୁହନ୍ତି, ଚାଷୀ ଓ ଚାଷର ସୁବିଧା ପାଇଁ ସରକାର ବଲାଙ୍ଗୀ ବନ୍ଧ ପ୍ରକଳ୍ପ କରିଥିଲେ। ଚାଷୀ ଘଣ୍ଟା ପ୍ରତି ମ୍ୟୁନିସିପାଲିଟିରେ ୬୦ ଟଙ୍କାରୁ ଆରମ୍ଭ କରି ୨୦୦ ଟଙ୍କା ପର୍ଯ୍ୟନ୍ତ ଦେଇ ଜମିରେ ପାଣି ମଡାଇଛନ୍ତି। ମରୁଡ଼ି ସମୟରେ ବଲାଙ୍ଗୀ ବନ୍ଧ ଜଳସେଚନ ପାଇଁ ଭଲ କାମ କରୁଥିଲା। ପୁଣି ଶୁଦ୍ଧିକ୍ରିୟା ସମୟରେ ବନ୍ଧରେ ଶୁଦ୍ଧକର୍ମ କରିବା, ଗାଧୋଇବା କାର୍ଯ୍ୟରେ ଲାଗୁଥିଲା । ଆମ ଅଞ୍ଚଳରେ ପୋଖରୀ ନ ଥିବାରୁ ଲୋକେ ସ୍ନାନ କରୁଥିଲେ। ସରକାର ପାର୍କ କରନ୍ତୁ ବିରୋଧ ନାହିଁ। ତେବେ ଚାଷୀ, ଚାଷ ଓ ସ୍ଥାନୀୟ ଲୋକଙ୍କ ଅସୁବିଧାକୁ ଉପଲବ୍ଧ କରି ଏହାର ସମାଧାନ ନ ହେବାରୁ ସମସ୍ୟା ସୃଷ୍ଟି ହୋଇଛି। ଆମୋଦପ୍ରମୋଦ ନଁାରେ ଅନ୍ୟକୁ କଷ୍ଟ ଦେବା, ହଇରାଣ କରିବା କି ପ୍ରକାରର ବିକାଶ ବୋଲି ପ୍ରଶ୍ନ ଉଠିଛି । ସିନ୍ଦୁରିଆର ଯୁବ ସଙ୍ଗଠକ ଶେକ୍ ଅବଦୁଲ ଆହାଦ୍ କୁହନ୍ତି, ବଲାଙ୍ଗୀ ବନ୍ଧକୁ ପାର୍କ କରାଯିବା ପୂର୍ବରୁ ଏହାର ସୁବିଧା ଅସୁବିଧା ଦିଗକୁ ବିଚାରକୁ ନେବାର ଥିଲା । ହେଲେ ଏ ଦିଗକୁ ସମୀକ୍ଷା କରାଯାଇ ନ ଥିବାରୁ ଚାଷୀ, ଚାଷ ଓ ସ୍ଥାନୀୟ ଲୋକ ହଇରାଣ ହେଉଛନ୍ତି। ଏବେ ବି ସମୟ ଅଛି।
ଲୋକଙ୍କ ଯାହା ସୁବିଧା ଅସୁବିଧା ଅଛି ତାକୁ ଅଭିଯୋଗ ଶୁଣାଣୀ କରି ସମାଧାନ କରାଇବା ଦରକାର। ନ ହେଲେ ଏହା ଆନ୍ଦେନାଳନର ରୂପ ନେବ।
କଂଗ୍ରେସ ଜିଲା ସଭାପତି ରଣଜିତ୍ ଦାଶ କୁହନ୍ତି, ବିକାଶ ନଁାରେ ଲୋକଙ୍କୁ ଦୁର୍ଦ୍ଦଶା ଭିତରକୁ ଠେଲି ଦିଆଯାଉଛି। ବିକାଶ ହେଉ ବିରୋଧ ନାହିଁ, ହେଲେ ଲୋକଙ୍କ ଅଭାବ ଅସୁବିଧାକୁ କ’ଣ ଅଣଦେଖା କରାଯିବ । ଲୋକଙ୍କୁ ଦୁର୍ଦ୍ଦଶା ଭିତରକୁ ଠେଲି ଏହା କି ପ୍ରକାରର ବିକାଶ ବୋଲି ସେ ପ୍ରଶ୍ନ କରିଛନ୍ତି।
ବଲାଙ୍ଗୀ ପାର୍କରେ ଥିବା ବଲାଙ୍ଗୀ ବନ୍ଦରୁ ଯେପରି ପୂର୍ବରୁ ଚାଷୀ ଜମିରେ ପାଣି ମଡାଉଥିଲେ ସେପରି ସୁବିଧା ଦିଆଯାଉ।
ଲୋକଙ୍କ ପାଇଁ ନୂଆ ପୋଖରୀ ଖନନ କରାଯାଉ ବୋଲି କହିଛନ୍ତି । ଗୋଡ଼ିସାହିର ଚାଷୀ କୈଳାସ ଭୂୟଁା କୁହନ୍ତି, ବଲାଙ୍ଗୀ ବନ୍ଧ ପାର୍କ ହୋଇଯିବା ପରେ ମରୁଡ଼ି ସମୟରେ ଆମ ଦୁଃଖ ବଳାଇ ଯାଉଛି।
ଜମିରେ ପାଣି ମଡ଼ାଇ ପାରୁନୁ। ସରକାର ଆମ ପାଇଁ ଜଳସେଚନ ବ୍ୟବସ୍ଥା କରିବା ଦରକାର ବୋଲି କହିଛନ୍ତି।