ଉମରକୋଟ, ୧୮।୧୨(ସ୍ବ.ପ୍ର.): ଚାଷ କାମ ପାଇଁ ଥିବା କେନାଲ ପାଣିକୁ ଠିକାଦାର ନେଇ ରାସ୍ତା ତିଆରି କାମରେ ବ୍ୟବହାର କରୁଛନ୍ତି। ଉମରକୋଟ ଭାସ୍କେଲ ଜଳସେଚନ ପ୍ରକଳ୍ପର ପାଣି ପୂର୍ତ୍ତ ବିଭାଗ ରାସ୍ତା କାମରେ ଲଗାଯାଉଛି। ଏହାକୁ ନେଇ ଚାଷୀମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ମୋଟର ଲଗାଇ କେନାଲରୁ ପାଣି ନେବା ନିୟମ ବିରୋଧ ଅଟେ। ଏପରି କାମ କରୁଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି।
ଉମରକୋଟ ଦର୍ଗାଗୁଡ଼ା ଅଞ୍ଚଳରେ ଚାଷ କାମ ପାଇଁ ଭାସ୍କେଲ ଜଳଭଣ୍ଡାର ଜଳ କେନାଲ ମାଧ୍ୟମରେ ୧୧ ତାରିଖରୁ ପାଣି ଛଡ଼ାଯାଉଛି। କିନ୍ତୁ ପୂର୍ତ୍ତ ବିଭାଗ ପକ୍ଷରୁ ଚାଲିଥିବା ଉମରକୋଟ-ରାଇଘର ରାସ୍ତା କାମ ପାଇଁ ଦିନ ଦ୍ୱିପ୍ରହରରେ କେନାଲରୁ ଟ୍ୟାଙ୍କର ସାହାଯ୍ୟରେ ପାଣି ନିଆଯାଉଛି। ଏହାକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଚାଷୀ ମୋଟର ଲଗାଇ ପାଣି ନେଲେ ଭାସ୍କେଲ୍ ବିଭାଗ ଉକ୍ତ ମୋଟରକୁ ଜବତ କରୁଥିଲେ। ତେବେ ରାସ୍ତା କାମ ପାଇଁ ଏଭଳି ପାଣି ଚାଲାଣକୁ କାହିଁକି ରୋକାଯାଉ ନାହିଁ ବୋଲି ଚାଷୀମାନେ ପ୍ରଶ୍ନ କରିଛନ୍ତି। ଏନେଇ ଉମରକୋଟ ପୂର୍ତ୍ତ ବିଭାଗ ଏସ୍ଡିଓ ସନ୍ତୋଷ ପାତ୍ରଙ୍କୁ ପଚାରିବାରୁ, ରାସ୍ତା କାମରେ ବ୍ୟବହାର ହେଉଥିବା ପାଣି କେଉଁଠାରୁ ଆସିବ ତାହା ଠିକାଦାର ନିଜେ ବୁଝିବେ। ଠିକାଦାର କେନାଲରୁ ପାଣି ନେଉଥିବା କଥାରେ ସତ୍ୟତା ଥିଲେ, ତାଙ୍କୁ ଏପରି କରିବାକୁ ବାରଣ କରାଯିବ ବୋଲି ସେ କହିଛନ୍ତି। ଅନ୍ୟପଟେ ଭାସ୍କେଲ୍ ଜଳସେଚନ ବିଭାଗ ଏସ୍ଡିଓ ନିରଞ୍ଜନ ସାହୁଙ୍କ ସହ ଯୋଗାଯୋଗ କରିବାରୁ ଏପରି ଘଟଣା ମୋ’ ଦୃଷ୍ଟିକୁ ଆସିନାହିଁ ବୋଲି ସେ କହିଛନ୍ତି। ଯଦି ଠିକାଦାର ଏପରି କାର୍ଯ୍ୟ କରୁଥିବେ, ତାହାଲେ ଘଟଣା ସମ୍ପର୍କରେ ଉମରକୋଟ ତହସିଲଦାରଙ୍କ ଦୃଷ୍ଟି ଆକର୍ଷଣ କରିବି। ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବା ସହ କାମରେ ବ୍ୟବହାର ହେଉଥିବା ସମସ୍ତ ଉପକରଣକୁ ଜବତ କରାଯିବ ବୋଲି ସେ କହିଛନ୍ତି।
