ଚମ୍ପୁଆ, ୧୩।୭(ଡି.ଏନ.ଏ.) – କେନ୍ଦୁଝର ଜିଲା ଚମ୍ପୁଆ କୃଷି ଜିଲାର ଚଳିତବର୍ଷ ସ୍ବଳ୍ପ ବୃଷ୍ଟିପାତକୁ ନେଇ ଧାନ ଚାଷୀଙ୍କ ଚିନ୍ତା ବଢିବାରେ ଲାଗିଛି। ସ୍ବାଭାବିକ ବର୍ଷାକୁ ଅପେକ୍ଷା କରି ବୁଣା ଜମି ଗୁଡିକ ପଡ଼ିଆ ପଡ଼ିଥିବା ବେଳେ ଚାଷୀ ଚଳିତ ମାସ ବର୍ଷାକୁ ଆଖି ଆଗରେ ରଖି ଧାନ ତଳି ଦେଇ ରୁଆ ଉପରେ ଗୁରୁତ୍ୱାରୋପ କରୁଥିବା ଦେଖିବାକୁ ମିଳିଛି। କେଉଁଠି ଚାଷୀ ପାରମ୍ପାରିକ ବିହନ ବ୍ୟବହାର କରୁଛନ୍ତି ତ କେଉଁଠି ଚାଷୀ ଅଧିକ ଅମଳକ୍ଷମ ଧାନ ବିହନ ବ୍ୟବହାର କରୁଛନ୍ତି। ଜୁନ ମାସରେ ସାଧାରଣତଃ ୨୪୧.୪ ମିଲିମିଟର ବର୍ଷା ଜଳ ଚାଷ ପାଇଁ ଆବଶ୍ୟକ ରହିଥିବା ବେଳେ ଗତ ୨୦୨୧ ମସିହା ଜୁନ ମାସରେ ୧୭୮.୧ ମିଲିମିଟର ବର୍ଷା ହୋଇଥିଲା ବେଳେ ଚଳିତ ବର୍ଷ ୧୩୩.୬ ମିଲିମିଟର ବର୍ଷା ହୋଇଥିଲା। ସେହିପରି ଜୁଲାଇ ମାସରେ ୩୧୮ ମିଲିମିଟର ବର୍ଷାର ଆବଶ୍ୟକ ଥିବା ବେଳେ ୨୦୨୧ ମସିହା ଜୁଲାଇ ମାସରେ ୨୬୯.୮ ମିଲିମିଟର ବର୍ଷା ହୋଇଥିବା ବେଳେ ଚଳିତ ବର୍ଷ ୧୨୬.୧ ମିଲିମିଟର ବର୍ଷା ବର୍ତ୍ତମାନ ସୁଦ୍ଧା ହୋଇଛି। ମାତ୍ର ମାସ ପୁରିବାକୁ ଆଉ ଅଳ୍ପ ଦିନ ବାକି ରହିଥିବା ବେଳେ ଆବଶ୍ୟକ ବର୍ଷା ସମ୍ଭାବନା ନେଇ ଚାଷୀ ଚାଷ କାମ ଆଗେଇବାରେ ଲାଗିଛି। ବର୍ତ୍ତମାନ ଚାଷୀମାନେ ନିଜ ନିଜ ଜମିରେ ଧାନ ତଳି ଦେଇଥିଲେ ମଧ୍ୟ ଆବଶ୍ୟକ ବର୍ଷା ପାଇପାରି ନାହାନ୍ତି। ଫଳରେ ରୋଇବା ପାଇଁ ଜମି ପ୍ରସ୍ତୁତ ହୋଇପାରୁ ନାହିଁ। ଏ ନେଇ ଜିଲା କୃଷି ଅଧିକାରୀ ମନୋରଞ୍ଜନ ମଣ୍ଡଳଙ୍କୁ କହିଛନ୍ତି, ଜୁନ ମାସରେ ବର୍ଷାର ପରିମାଣ କମ ରହିଥିଲା ମାତ୍ର ଜୁଲାଇ ମାସ ବର୍ତ୍ତମାନ ସୁଦ୍ଧା ହୋଇଥିବା ବର୍ଷାର ପରିମାଣ ଦେଖିଲେ ଆଉ ୧୮ ଦିନ ଭିତରେ ସ୍ବାଭାବିକ ବର୍ଷା ଅନୁମାନ କରାଯାଉଛି। ଏହି ବର୍ଷା ହେଲେ ଚାଷ କାର୍ଯ୍ୟ ବହୁ ପରିମାଣରେ ଆଗେଇ ପାରିବ ବୋଲି ସୂଚନା ଦେଇଛନ୍ତି।