ମହାକାଳପଡ଼ା,୨୯ା୪(ଡି.ଏନ.ଏ.): ଲକ୍ଷ୍ୟସ୍ଥଳରେ ପହଞ୍ଚତ୍ବା ପାଇଁ ବହୁ ଘାତପ୍ରତିଘାତ ସହିବାକୁ ହୁଏ। ବିଭିନ୍ନ ପରିସ୍ଥିତିର ସାମ୍ନା କରିବାକୁ ପଡ଼େ। ଅକ୍ଳାନ୍ତ ପରିଶ୍ରମ ପରେ ସଫଳତା ମିଳେ। ଏହି କେଇ ପଦ କଥାକୁ ମନ୍ତ୍ର ଭାବେ ଗ୍ରହଣ କରି ଅନ୍ୟମାନଙ୍କ ପାଇଁ ପ୍ରେରଣା ସାଜିଛନ୍ତି ତୋଫାନ ମାନ୍ନା। କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ବଉଳକଣି ପଞ୍ଚାୟତ ଅଧୀନ ବେତବେଲାରୀ ଗ୍ରାମର ଗୌତମ ମାନ୍ନାଙ୍କ ପୁଅ ତୋଫାନ ପରିବା ଚାଷ କରି ନିଜର ଲକ୍ଷ୍ୟ ହାସଲ ପାଇଁ ଉଦ୍ୟମ ଜାରି ରଖିଛନ୍ତି।
ଭୁବନେଶ୍ୱରର ଏକ ଘରୋଇ ବୈଷୟିକ ମହାବିଦ୍ୟାଳୟରେ ଶେଷବର୍ଷର ଛାତ୍ର ତୋଫାନଙ୍କ ପରିବାରର ଆର୍ଥିକ ସ୍ଥିତି ସେମିତି ଭଲ ନୁହେଁ। ପିଲାଟି ଦିନରୁ ବହୁ କଷ୍ଟ କରି ସେ ପାଠ ପଢ଼ିଥିଲେ। ଲକ୍ଷ୍ୟ ଥିଲା ଜଣେ ଇଞ୍ଜିନିୟର ହେବେ। ସେହି ଆଶା ପୂରଣ ପାଇଁ ସେ ନିଜ ଘରଠାରୁ ୪ କି.ମି. ଦୂର କିଆବାରିଆଠାରେ ଅଢ଼େଇ ଏକର ଜମିକୁ ଭାଗସୂତ୍ରରେ ଆଣି ପରିବା ଚାଷ କରୁଛନ୍ତି। ଏବେ ତାଙ୍କ କ୍ଷେତରେ ଭେଣ୍ଡି, ପୋଇ, ବାଇଗଣ, ମକା, ବରୁଗୁଡ଼ି, ଝୁଡଙ୍ଗ, ସୂର୍ଯ୍ୟମୁଖୀ, ଗାଜର, ଧନିଆ ଓ ଲଙ୍କା ଆଦି ଫସଲ ହୋଇଛି। ଜଳସେଚନ ସୁବିଧା ନ ଥିଲେ ମଧ୍ୟ ନିକଟରେ ଥିବା ଖାଲରୁ ପମ୍ପ୍ ଯୋଗେ ପାଣି ମଡ଼ାଇ ସେ ପରିବା ଚାଷକୁ ଆଗେଇ ନେଇଛନ୍ତି। ବୈଶାଖର ଗ୍ରୀଷ୍ମ ପ୍ରବାହକୁ ଖାତିର ନ କରି ତୋଫାନ ନିଜ ଭବିଷ୍ୟତର ସୁନେଲି ସ୍ବପ୍ନକୁ ସାକାର କରିବାକୁ ଲାଗିଛନ୍ତି। ତାଙ୍କ କ୍ଷେତରୁ ପ୍ରତିଦିନ ବାହାରୁ ଥିବା ପରିବାକୁ ସେ ରାମନଗର, ଛପାଲି, ବେଣାକନ୍ଧା, ଜଗରୀଜୋର ବଜାରରେ ବିକ୍ରି କରୁଛନ୍ତି। ସେହି ଟଙ୍କାକୁ ସେ ସଞ୍ଚୟ କରି ରଖୁଛନ୍ତି। ସେ ପଢ଼ୁଥିବା କଲେଜର ବାର୍ଷିକ ଦେୟ ୮୦ ହଜାର ଟଙ୍କା। କଲେଜ ଖୋଲିଲେ ଟଙ୍କା ଜମା କରିବାକୁ ପଡ଼ିବ। ସେଥିପାଇଁ ତୋଫାନ ପରିବାର ସଦସ୍ୟଙ୍କ ସହ ମିଶି ଏହି ପରିଶ୍ରମ କରୁଛନ୍ତି ବୋଲି କହିଛନ୍ତି। ତାଙ୍କୁ ଏହି କାମରେ ବାପା ଗୌତମ ମଧ୍ୟ ସାହାଯ୍ୟ କରୁଛନ୍ତି। ଏ ସମ୍ପର୍କରେ ତୋଫାନଙ୍କ ବାପା କୁହନ୍ତି, ବହୁ କଷ୍ଟରେ ମୂଲମଜୁରି ଲାଗି ପୁଅକୁ ପାଠ ପଢ଼ାଉଛି। ତୋଫାନ ଏବେ ବି.ଟେକ୍ର ଶେଷ ବର୍ଷର ଛାତ୍ର। ପ୍ରତିବର୍ଷ ତା’ର ପାଠପଢ଼ା ଖର୍ଚ୍ଚ ବାବଦରେ ଲକ୍ଷାଧିକ ଟଙ୍କା ଖର୍ଚ୍ଚ ହେଉଛି। ସେଥିପାଇଁ ଆମ ପରିବାର ସଦସ୍ୟମାନେ ଅକ୍ଳାନ୍ତ ପରିଶ୍ରମ କରୁଛୁ। ପରିବା ଚାଷରୁ ଯାହା ଆୟ ହେଉଛି ସେଥିରୁ ସିଂହଭାଗ ପୁଅର ପଢ଼ାଖର୍ଚ୍ଚରେ ବ୍ୟୟ ହେଉଛି। ଅଳ୍ପ କିଛି ଟଙ୍କାରେ ଆମ ପରିବାର ଚଳୁଛି। ଏବେ କଲେଜ ଛୁଟି ଥିବାରୁ ପୁଅ ଆମ ସହ ମିଶି ଚାଷ କାମ କରୁଛି। ପରିବା ନେଇ ହାଟ ବଜାରରେ ବିକ୍ରି କରୁଛି। ଠାକୁରଙ୍କ ଦୟାରୁ ସେ ପାଠପଢ଼ା ଶେଷ କରି ଚାକିରି ପାଇଲେ ଆମ ଦୁଃଖ ସରିବ ବୋଲି ଗୌତମ କହିଛନ୍ତି।
