ମହାକାଳପଡ଼ା,୩।୯ (ଡି.ଏନ୍.ଏ.): ଚିଙ୍ଗୁଡି ଘେରିରେ ବ୍ୟବହୃତ ହେଉଥିବା ରାସାୟନିକ ପଦାର୍ଥ ଜଳରେ ମିଶିବାରୁ ବିଷ ପାଲଟୁଛି। ଏ ନେଇ ଜୀବଜନ୍ତୁ, ଜଙ୍ଗଲ ଓ ମୃତ୍ତିକା କ୍ଷୟ ହେବା ସହ ଜୈବବିବିଧତା ନଷ୍ଟ ହେଉଛି। ଏହାକୁ ଦୃଷ୍ଟିରେ ରଖି ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଉପକୂଳ ଅଞ୍ଚଳରେ ସରକାରୀ ଓ ଜଙ୍ଗଲ ଜମିରେ ବେଆଇନ ଚିଙ୍ଗୁଡ଼ି ଘେରି ଉଚ୍ଛେଦ ଅଭିଯାନ ଜୋରଦାର କରିବାକୁ କେନ୍ଦ୍ରାପଡ଼ା ଜିଲା ପ୍ରଶାସନ ମହାକାଳପଡ଼ା ବ୍ଲକ ପ୍ରଶାସନକୁ ଚିଠି କରିଛି। ପ୍ରଶାସନ ଉପକୂଳ ଅଞ୍ଚଳରେ ନାମକୁ ମାତ୍ର କେତେଗୋଟି ଘେରିକୁ ଉଚ୍ଛେଦ କରି ହାତ ବାନ୍ଧି ବସିଛି। କେତେଜଣ ଚିଙ୍ଗୁଡି ବ୍ୟବସାୟୀ ଉଚ୍ଛେଦକୁ ନେଇ ଅସନ୍ତୋଷ ବ୍ୟକ୍ତ କରିଥିଲେ। କାରଣ ଆଗକୁ ପଞ୍ଚାୟତ ନିର୍ବାଚନ ଥିବାରୁ ରାଜନେତାଙ୍କ ଚାପରେ ପ୍ରଶାସନ ଘେରି ଉଚ୍ଛେଦ କାମକୁ ବନ୍ଦ କରିଥିବା ସାଧାରଣରେ ଚର୍ଚ୍ଚା ହେଉଛି।
ବ୍ଲକ ପ୍ରଶାସନ ପକ୍ଷରୁ ସୁନିତି ପଞ୍ଚାୟତରେ ୪ ମାସ ତଳେ ହାତ ଗଣତି ଘେରି ଉଚ୍ଛେଦ କରିଥିଲା। ଅପରପକ୍ଷେ ହାଇକୋର୍ଟର ଏକ ସ୍ବତନ୍ତ୍ର ନିର୍ଦ୍ଦେଶନାମାରେ ସରକାରୀ ଜମିରେ ଯେଉଁ ଚିଙ୍ଗୁଡ଼ି ଘେରି ଉଚ୍ଛେଦ ହେଉଛି ତା’ର ଭିଡିଓ କରିବା ସହ ଘେରିର ସମସ୍ତ ଯନ୍ତ୍ରାଂଶକୁ ଜବତ କରି ଅନ୍ୟ ଏକ ସ୍ଥାନରେ ବିଭାଗୀୟ କର୍ମଚାରୀଙ୍କ ହେପାଜତରେ ଷ୍ଟକ୍ ରଖିବାକୁ ଉଲ୍ଲେଖ ରହିଛି। ବ୍ଲକର ଉପାନ୍ତ ଅଞ୍ଚଳରେ ବହୁ ସଂଖ୍ୟକ ବେଆଇନ ଚିଙ୍ଗୁଡ଼ି ଘେରି ନିର୍ମାଣ ଯୋଗୁ ସଂରକ୍ଷିତ ଜଙ୍ଗଲ ଉପରେ ପ୍ରଭାବ ପଡୁଛି। ଫଳରେ ଏହି ଘେରିର ଉଦ୍ବୃତ୍ତ ରାସାୟନିକ ଜଳ ନିଷ୍କାସିତ ହୋଇ ନଦୀ ଓ ସମୁଦ୍ରରେ ମିଶୁଛି। ଫଳରେ ସଂଲଗ୍ନ ଜଙ୍ଗଲ ଓ ଜୀବଜନ୍ତୁଙ୍କ ପ୍ରତି ବିପଦ ସୃଷ୍ଟି କରୁଛି। ଜଙ୍ଗଲଗୁଡ଼ିକର ଜୈବ ବିବିଧତା ନଷ୍ଟ ହେବା, ମୃତ୍ତିକା ଅବକ୍ଷୟ ହେଉଛି ବୋଲି ଅଞ୍ଚଳର ବୁଦ୍ଧିଜୀବୀ ମତ ପ୍ରକାଶ କରିଛନ୍ତି। ବ୍ଲକର ବତୀଘର, ଖରିନାସୀ, ରାମନଗର, ବଉଳକଣି, ପେଟଛେଲା, ଜମ୍ବୁ, ସୁନିତି, ନାଞ୍ଜୁରା, ବଡିଢ଼ି, କଂଶାରବଡ ଦାଣ୍ଡୁଆ, ଗଗୁଆ ଆଦି ପଞ୍ଚାୟତରେ ସରକାରୀ, ବେସରକାରୀ ଜମିରେ ବହୁ ଚିଙ୍ଗୁଡି ଘେରି ହୋଇଛି। ସେହିପରି ଚାଷ ଜମିରେ ଘେରି ନିର୍ମାଣ ହେବାଦ୍ୱାରା ଉକ୍ତ ଜମିର ମୃତ୍ତିକା ନଷ୍ଟ ହେଉଛି। ଘେରି ସଂଲଗ୍ନ ଜମିରେ ଧାନ ଫସଲ ପ୍ରତି ବିପଦ ସୃଷ୍ଟି ହେଉଛି ବୋଲି ଚାଷୀ ବାବାଜୀ ବେହେରା, ଶରତ ସାମଲ, ଅନିରୁଦ୍ଧ ସ୍ବାଇଁ, ବସନ୍ତ ବେହେରାଙ୍କ ସମେତ ବିଭିନ୍ନ ଅଞ୍ଚଳରୁ ଅଭିଯୋଗ ହେଉଛି। ଅପରପକ୍ଷରେ ଏହି ଚିଙ୍ଗୁଡ଼ି ଉତ୍ପାଦନ ହେବା ପରେ ବ୍ୟବସାୟୀମାନେ ଚଢ଼ା ଦରରେ କିଣି ବଡ଼ ବଡ଼ ଟ୍ରକ, ପିକ୍ଅପ ଭ୍ୟାନରେ ପ୍ରଥମେ ପାରାଦୀପ, ଭୁବନେଶ୍ୱର, ବାଲେଶ୍ୱର ପରେ କୋଲକାତା ଦେଇ ଜଳ ଜାହାଜ, ଉଡ଼ାଜାହାଜ ଯୋଗେ ବିଦେଶକୁ ରପ୍ତାନି କରୁଛନ୍ତି। ଏ ସମ୍ପର୍କରେ ମହାକାଳପଡ଼ା ତହସିଲଦାର ସୌଭାଗ୍ୟ ରଞ୍ଜନ ପଣ୍ଡାଙ୍କୁ ପଚାରିବାରେ ଖୁବ୍ଶୀଘ୍ର ଘେରି ଉଚ୍ଛେଦକୁ ଜୋରଦାର କରାଯିବ ବୋଲି ସେ କହିଛନ୍ତି।