ନୂଆଦିଲ୍ଲୀ,୨୩।୧୧: କଂଗ୍ରେସ ନେତା ରାହୁଲ ଗାନ୍ଧୀଙ୍କ ନେତୃତ୍ୱରେ ଆୟୋଜିତ ହୋଇଥିବା ଭାରତ ଯୋଡୋ ଯାତ୍ରାରେ ସାମିଲ ହେବେ ନ୍ୟାସନାଲ କନ୍ଫରେନ୍ସ (ଏନ୍ସି) ଅଧ୍ୟକ୍ଷ ଫାରୁକ ଅବଦୁଲ୍ଲା। ଯେତେବେଳେ ଏହି ଯାତ୍ରା ଲଖନପୁର ଅର୍ଥାତ୍ ଯେଉଁଠି ଜମ୍ମୁ-କଶ୍ମୀର ଆରମ୍ଭ ହେଉଛି ସେଠାରେ ପହଞ୍ଚିବା ପରେ ଫାରୁକ ସେଥିରେ ଅଂଶଗ୍ରହଣ କରିବେ। ଏନେଇ ବୁଧବାର ଫାରୁକ ନିଜେ ସୂଚନା ଦେଇଛନ୍ତି। ଏଥିସହ ସେ କହିଛନ୍ତି, ବର୍ତ୍ତମାନ ଦେଶରେ ଏକତା ଏବଂ ଅଖଣ୍ଡତା ବଜାୟ ରଖିବା ସମୟ ଆସିଛି। ଅନ୍ୟପଟେ ବୁଧବାର ସକାଳେ ଭାରତ ଯୋଡୋ ଯାତ୍ରା ମଧ୍ୟପ୍ରଦେଶର ବୁରହାନପୁର ଜିଲାରେ ପ୍ରବେଶ କରିଛି। ବୋଦରଲି ଗ୍ରାମରେ ପହଞ୍ଚିବା ପରେ ଏହି ଯାତ୍ରାକୁ ଜୋରଦାର ଏବଂ ପାରମ୍ପାରିକ ଭାବେ ସ୍ବାଗତ କରାଯାଇଥିଲା।