ହଙ୍ଗେରୀର ବୁଦାପେଷ୍ଟରେ ଉଦ୍ଯାପିତ ହୋଇଯାଇଛି ବିଶ୍ୱ ଆଥ୍ଲେଟିକ୍ସ ଚାମ୍ପିୟନଶିପ୍। ପ୍ରଥମ ଥର ପାଇଁ ୩ ଜଣ ଭାରତୀୟ ନୀରଜ ଚୋପ୍ରା, ଡି.ପି. ମନୁ ଓ କିଶୋର କୁମାର ଜେନା ଫାଇନାଲରେ ପ୍ରବେଶ କରି ଇତିହାସ ସୃଷ୍ଟି କରିଥିଲେ। ନୀରଜ ସ୍ବର୍ଣ୍ଣ ପଦକ ହାସଲ କରିଥିବା ବେଳେ ଯଥାକ୍ରମେ ପଞ୍ଚମ ଓ ଷଷ୍ଠ ସ୍ଥାନରେ ରହିଛନ୍ତି କିଶୋର ଓ ମନୁ। କିଶୋର ଭଲିବଲ ଛାଡି ଜାଭେଲିନ୍କୁ ଆପଣେଇ ଥିବା ବେଳେ ମନୁ ଜଣେ ଦ୍ରୁତ ବୋଲର ରହିଥିଲେ। କର୍ନାଟକର ଜଣେ କଫି ଚାଷୀଙ୍କ ପୁଅ ଡି.ପି. ମନୁ। ବେଲୁରର ହସନ୍ ଜିଲାରୁ ଆସୁଥିବା ମନୁ ସ୍କୁଲ ସମୟରେ ଜଣେ ଭଲ କ୍ରିକେଟର ଥିଲେ। ଦ୍ରୁତ ବୋଲିଂ କରିବାକୁ ପସନ୍ଦ କରୁଥିବା ମନୁ କ୍ରୀଡା ଶିକ୍ଷକଙ୍କ ପରାମର୍ଶ କ୍ରମେ ଜାଭେଲିନ୍କୁ ବାଛିଥିଲେ। ଦକ୍ଷିଣ ଭାରତର ଏକ ଗରିବ ପରିବାରରୁ ଆସିଥିବା ମନୁଙ୍କ ନିକଟରେ ଆରମ୍ଭରୁ ଜାଭେଲିନ୍ ମଧ୍ୟ ନ ଥିଲା। ବାଉଁଶକୁ ଜାଭେଲିନ୍ ଭାବରେ ବ୍ୟବହାର କରି ମନୁ ଆଗକୁ ବଢିଥିବା ବେଳେ ୨୦୧୯ ଖେଲୋ ଇଣ୍ଡିଆ ଗେମ୍ସରେ ସେ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ। କୋଚ୍ କାଶୀନାଥ ନାଏକ ୧୯ ବର୍ଷୀୟ ମନୁଙ୍କୁ ପୁଣେସ୍ଥିତ ଆର୍ମି ସ୍ପୋଟର୍ସ ସେଣ୍ଟରରେ ଭର୍ତ୍ତି କରିଥିଲେ।