ଭଦ୍ରକ ଅଫିସ, ୨୧।୨: ଭଦ୍ରକ ଜିଲାପାଳଙ୍କ କାର୍ଯ୍ୟାଳୟ ଆଗରେ ଏକ ପରିବାର ଆମରଣ ଅନଶନରେ ବସିଛନ୍ତି। ବିନା କବଲାରେ ଜମି ମାଲିକଙ୍କ ଅଗୋଚରରେ ଅନ୍ୟ ବ୍ୟକ୍ତିଙ୍କ ନାମକୁ ଜମି ଚାଲି ଯାଇଥିଲା। ଉକ୍ତ ଜମିକୁ ନିଜ ନାମକୁ ଫେରାଇ ଆଣିବା ପାଇଁ ଦୀର୍ଘ ୨୯ ବର୍ଷ ହେଲା ନାୟିକାନିଡ଼ିହି ଥାନା ନଣ୍ଡାପାଟଣା ଗ୍ରାମର ସମୀରଣ ପାଳଙ୍କୁ ସଂଘର୍ଷ କରିବାକୁ ପଡିଥିଲା। ଜମିକୁ ନିଜ ନାମରେ କରିବାକୁ ସମୀରଣ କେସ୍ କରିଥିଲେ। ଯାହାର ଖର୍ଚ୍ଚ ବହନ କରିବାକୁ ତାଙ୍କୁ ଅନ୍ୟ ଜମି ବିକିବାକୁ ପଡ଼ିଥିଲା। ତେବେ ଉକ୍ତ କ୍ଷତି ପୂରଣ ଦାବିରେ ସମୀରଣ ତାଙ୍କ ପରିବାର ଓ ସମ୍ପର୍କୀୟଙ୍କ ସହ ଜିଲାପାଳଙ୍କ କାର୍ଯ୍ୟାଳୟ ଆଗରେ ଆମରଣ ଅନଶନରେ ବସିଛନ୍ତି। ପୂର୍ବରୁ ସେ ବାସୁଦେବପୁର ତହସିଲ ଆଗରେ ମଧ୍ୟ ଧାରଣାରେ ବସିଥିଲେ। ଦାବି ପୂରଣ ନ ହେବାରୁ ଜିଲାପାଳଙ୍କ କାର୍ଯ୍ୟାଳୟ ଆଗରେ ବସିଛନ୍ତି। ତେବେ ଦାବି ପୂରଣ ନ ହେବା ପର୍ଯ୍ୟନ୍ତ ଅନଶନରୁ ଓହରିବେ ନାହିଁ ବୋଲି ସମୀରଣ କହିଛନ୍ତି।