ଛତ୍ରପୁର,୨୫ା୫(ଦିଲ୍ଲୀପ ସାମଲ) : ଗଞ୍ଜାମ ଜିଲା ଛତ୍ରପୁର ଥାନା ଅନ୍ତର୍ଗତ ପୋଟଲାମପୁର ଗ୍ରାମରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି l କୌଣସି କାରଣ ନେଇ ଜଣେ ଯୁବକଙ୍କୁ ମରଣାତ୍ମକ ଭାବେ ଆକ୍ରମଣ କରିଛନ୍ତି ୨ ଜଣ ଆକ୍ରମଣକାରୀ l ପରେ ତାଙ୍କୁ ମୃତ ଭାବି ଛାଡ଼ି ଛତ୍ରପୁର ଥାନାରେ ଆତ୍ମସମର୍ପଣ କରିଛନ୍ତି ଏହି ୨ ଆକ୍ରମଣକାରୀ।
ସୂଚନାନୁସାରେ, ଶନିବାର ପୋଟଲାମପୁର ଗ୍ରାମର କେଶବ ନାହାକଙ୍କୁ କାଜୁ ତୋଟାକୁ କେନ୍ଦ୍ର କରି ସେହି ଗ୍ରାମର ଦୁଇ ଜଣ ବିଭିନ୍ନ ମାରଣାସ୍ତ୍ରରେ ଆକ୍ରମଣ କରି ମୃତ ହୋଇଯାଇଥିବା ଭାବି ଫୋପାଡ଼ି ଚାଲିଯାଇଥିଲେ। ପରେ ଛତ୍ରପୁର ଥାନାକୁ ଆସି ସେମାନେ ଆତ୍ମ ସମର୍ପଣ କରିଥିଲେ l ଅନ୍ୟପଟେ ରକ୍ତ ଜୁଡୁବୁଡୁ ଅବସ୍ଥାରେ କେଶବଙ୍କୁ ତାଙ୍କ ମାମୁ ଓ ସମ୍ପର୍କୀୟ ଲୋକେ ଉଦ୍ଧାର କରି ପ୍ରଥମେ ମ୍ୟୁନିସିପେଣ୍ଠ ସ୍ବାସ୍ଥ୍ୟ କେନ୍ଦ୍ର ଓ ପରେ ବ୍ରହ୍ମପୁର ମେଡିକାଲକୁ ପଠେଇଛନ୍ତି। କେଶବଙ୍କ ଅବସ୍ଥା ଗୁରୁତର ଅଛି l ଏନେଇ କେଶବଙ୍କ ମାମୁ ପଙ୍କଜ ତରେଇ ଘଟଣା ସମ୍ପର୍କରେ ଲିଖିତ ଭାବେ ଛତ୍ରପୁର ଥାନାରେ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତିକରି ଛତ୍ରପୁର ଥାନା ପୋଲିସ ଘଟଣାର ସରଜମିନ ତଦନ୍ତ କରି ଭାଗିରଥି ପଲାଇ ଓ ମହେଶ୍ୱର ପଲାଇଙ୍କୁ ଗିରଫ କରିଥିବା ସୂଚନା ମିଳିଛି।