ରାୟପୁର,୨୧।୮: ଛତିଶଗଡର କଂଗ୍ରେସ ବିଧାୟକ ଚାନି ସାହୁଙ୍କୁ ମରଣାନ୍ତକ ଆକ୍ରମଣ କରାଯାଇଛି। ରାଜନନ୍ଦଗାଓଁ ଜିଲାର ଖୁଜୀ ବିଧାନସଭାର ବିଧାୟକ ଥିବା ଚାନିଙ୍କୁ ଜଣେ ମଦ୍ୟପ ଯୁବକ ଆକ୍ରମଣ କରିଛନ୍ତି। ଏଥିରେ ବିଧାୟକ ଆହତ ହୋଇଛନ୍ତି। ଡାକ୍ତରଖାନାରେ ପ୍ରଥମ ଚିକିତ୍ସା ପରେ ଚାନି ସାହୁଙ୍କୁ ଡିସଚାର୍ଜ କରାଯାଇଛି। ଏଥିସହ ଅଭିଯୁକ୍ତଙ୍କୁ ପୋଲିସ ମଧ୍ୟ ଗିରଫ କରିଛି। କିନ୍ତୁ ବିଧାୟକଙ୍କ ସୁରକ୍ଷାକୁ ନେଇ ଅନେକ ବଡ ପ୍ରଶ୍ନ ଉଠିଛି।
ବିଧାୟକ ଚାନ୍ନି ସାହୁ ଏକ କାର୍ଯ୍ୟକ୍ରମରେ ଯୋଗରା ଗ୍ରାମରେ ପହଞ୍ଚିଥିଲେ। ସେଠାରେ ନିକଟସ୍ଥ ଗାଁର ଲୋକଙ୍କ ଭିଡ଼ ଜମିଥିଲା। ଏହି ସମୟରେ ଜଣେ ମଦ୍ୟପ ବିଧାୟକଙ୍କ ଉପରେ ଛୁରିରେ ଆକ୍ରମଣ କରିଥିଲେ। ଏହି ସମୟରେ ସେଠାରେ ଉପସ୍ଥିତ ଥିବା ପିଏସଓ ଏବଂ ସୁରକ୍ଷା କର୍ମୀ ମଦ୍ୟପଙ୍କୁ ଧରି ସେଠାରୁ ବାହାରକୁ ଆଣିଥିଲେ। ଏହା ସହିତ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇବା ପରେ ବିଧାୟକଙ୍କୁ ନିକଟସ୍ଥ କମ୍ୟୁନିଟି ସ୍ବାସ୍ଥ୍ୟ କେନ୍ଦ୍ରକୁ ଅଣାଯାଇଥିଲା। ସେଠାରେ ଚାନି ସାହୁଙ୍କ ପ୍ରାଥମିକ ଚିକିତ୍ସା କରାଯାଇଥିଲା। ଚାନ୍ନି ସାହୁଙ୍କ ହାତରେ ଆଘାତ ଲାଗିଥିବାରୁ ବ୍ୟାଣ୍ଡେଜ ହୋଇଛି।