ବାରିପଦା(ନୀଳାଦ୍ରି ବିହାରୀ ଦଣ୍ଡପାଟ)/ଖୁଣ୍ଟା(ଦେବରଞ୍ଜନ ବେହେରା)/ଗୋପବନ୍ଧୁ ନଗର(ଶାନ୍ତନୁ କୁମାର ମଢୁଆଳ), ୬ା୮ମୟୂରଭଞ୍ଜ ଜିଲା ଶିମିଳିପାଳ ପାଦଦେଶର ଖୁଣ୍ଟା ତହସିଲ ଅଧୀନ ସୁବର୍ଣ୍ଣମଞ୍ଜରୀ ଅଞ୍ଚଳର ବଡ଼ପଥରା ରାଜସ୍ବ ନିରୀକ୍ଷକ (ଆର୍ଆଇ)ଙ୍କୁ ପଥର ଚାଲାଣକାରୀ ମରଣାନ୍ତକ ଆକ୍ରମଣ କରିଛନ୍ତି। ଆକ୍ରମଣକାରୀଙ୍କ ପଥରମାଡ଼ରେ ଆର୍ଆଇଙ୍କ ମୁଣ୍ଡ ଫାଟି ପ୍ରବଳ ରକ୍ତସ୍ରାବ ହୋଇଥିଲା। ବିଭାଗୀୟ କର୍ମଚାରୀ ତାଙ୍କୁ ନିକଟସ୍ଥ ଡୁକୁରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଛନ୍ତି। ଏ ନେଇ ଥାନାରେ ୬ ଜଣଙ୍କ ନାମରେ ଅଭିଯୋଗ ପରେ ଖୁଣ୍ଟା ପୋଲିସ ମାମଲା ରୁଜୁକରି ତଦନ୍ତ କରୁଛି। ସୂଚନା ଅନୁଯାୟୀ, ବେଆଇନ ପଥର କାରବାର ପାଇଁ ଉକ୍ତ ଅଞ୍ଚଳର ୬ ପଞ୍ଚାୟତର ପଥର ଖାଦାନରେ ଜୁଲାଇ ୧୭ରୁ ୧୪୪ଧାରା ଜାରି ହୋଇଛି। ଏଥିସହ ସୁବର୍ଣ୍ଣମଞ୍ଜରୀ ଅଞ୍ଚଳରେ ଗତ ୧୮ତାରିଖରେ ବେଆଇନ ପଥର ବ୍ଲାଷ୍ଟିଂ ଅଭିଯୋଗରେ ରାଜସ୍ବ ବିଭାଗ ପକ୍ଷରୁ ଚଢ଼ାଉ କରାଯାଇ ଘଟଣାସ୍ଥଳରେ କୋଟିଏରୁ ଊଦ୍ଧର୍ବ ଟଙ୍କା ମୂଲ୍ୟର କମ୍ପ୍ରେସର ଓ ୨ ହିଟାଚି ମେଶିନ ଜବତ କରିଥିଲା। ପୁନର୍ବାର ପଥର ବ୍ଲାଷ୍ଟିଂ ଓ ଚୋରାଚାଲାଣ ହେଉଥିବା ଖବରପାଇ ଶନିବାର ଭୋର ୫ଟା ସମୟରେ ବଡ଼ପଥରା ରାଜସ୍ବ ନିରୀକ୍ଷକ ଦୟାନିଧି ରାଉତ ସପଞ୍ଚୁଆ ଫରେଷ୍ଟ ବିଟ୍ ନିକଟ ସପନଚୁଆ-ସୁବର୍ଣ୍ଣମଞ୍ଜରୀ ରାସ୍ତାରେ ଜଗି ରହିଥିଲେ। ଏହି ସମୟରେ ପଥର ଚାଲାଣକାରୀ ଉକ୍ତ ଥାନା ଅଧୀନ ଡୁକୁରା ଗ୍ରାମର ଅରବିନ୍ଦ କୁମାର ସାହୁ (ଦୀପୁ), କୁଶଗଡ଼ିଆ ଗ୍ରାମର ବିଜୟ କୁମାର ନାଏକ (ବିଜୁ), ଚାନ୍ଦରାୟ ସରେନ (କଙ୍କ), ସପନଚୁଆ ଗ୍ରାମର ସମୀର ହେମ୍ବ୍ରମଙ୍କ ସମେତ ୨ ଯୁବକ ୩ ବାଇକରେ ଆସି ଆର୍ଆଇଙ୍କୁ ପଥରରେ ଆକ୍ରମଣ କରିଥିଲେ। ଆକ୍ରମଣରେ ଆର୍ଆଇଙ୍କ ମୁଣ୍ଡ ଫାଟି ଗୁରୁତର ହୋଇପଡ଼ିଥିଲେ। ଏହାର ସୁଯୋଗରେ ଆକ୍ରମଣକାରୀମାନେ ମୋବାଇଲ ଛଡ଼ାଇନେବା ସହ ବାଇକଟିକୁ ଭାଙ୍ଗି ଘଟଣାସ୍ଥଳରୁ ଫେରାର ହୋଇଯାଇଥିଲେ। ଖବର ପାଇ ତହସିଲଦାର ଅଙ୍କୁର ଅଭିଳାଷ, ଅତିରିକ୍ତ ତହସିଲଦାର ସୌମ୍ୟରଞ୍ଜନ ବେହେରା ପହଞ୍ଚତ୍ ଆର୍ଆଇଙ୍କୁ ଉଦ୍ଧାରକରି ଡୁକୁରା ଡାକ୍ତରଖାନାରେ ଭର୍ତ୍ତି କରିଥିଲେ। ଏନେଇ ଖୁଣ୍ଟା ଥାନାରେ ସେ ଲିଖିତ ଅଭିଯୋଗ କରିଛନ୍ତି। ଥାନାରେ ମାମଲା (ନଂ. ୨୩୧/୨୩)ରୁଜୁ କରି ପୋଲିସ ତଦନ୍ତ ଆରମ୍ଭ କରିଛି। ଘଟଣାକୁ ଜିଲା ରାଜସ୍ବ ନିରୀକ୍ଷକ ସଂଘ ନିନ୍ଦା କରିବା ସହ ଉପଯୁକ୍ତ ତଦନ୍ତ ପୂର୍ବକ ଆକ୍ରମଣକାରୀଙ୍କୁ ତୁରନ୍ତ ଗିରଫ ଦାବି କରିଛି।
