ସୁନ୍ଦରଗଡ଼,୧୮।୨(ଡି.ଏନ୍.ଏ.): ସୁନ୍ଦରଗଡ଼ ଜିଲାରେ ଶୁକ୍ରବାର ଦ୍ୱିତୀୟ ପର୍ଯ୍ୟାୟ ପଞ୍ଚାୟତ ନିର୍ବାଚନ ଭୋଟ ଗ୍ରହଣ ଚାଳିଛି। ଜିଲାର ସବଡେଗା, କୁତ୍ରା, ନୂଆଁଗାଁ ଏବଂ ବିଶ୍ରା ବ୍ଲକର ୮ଟି ଜିଲାପରିଷଦ ଜୋନ୍ରେ ୨୫୩୮୬୧ ମତଦାତା ୮୨୨ ଭୋଟ ଗ୍ରହଣ କେନ୍ଦ୍ରରେ ନିଜର ମତଦାନ ଅଧିକାର ସାବ୍ୟସ୍ତ କରୁଛନ୍ତି। ଶାନ୍ତିଶୃଙ୍ଖଳା ସହ ମତଦାନ ଶେଷ କରିବାକୁ ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି।
ସବଡେଗା ବ୍ଲକର ୨ଟି ଜୋନ୍ରେ ମୋଟ ୧୭୩ଟି ବୁଥ ମଧ୍ୟରୁ ୮୪ଟି ବୁଥ୍ ଉତ୍ତେଜନାପ୍ରବଣ ଓ ୨୨ଟି ବୁଥ ଅତି ଉତ୍ତେଜନାପ୍ରବଣ ଭାବେ ଚିହ୍ନଟ ହୋଇଛି। କୁତ୍ରା ବ୍ଲକରେ ଥିବା ୨ଟି ଜୋନ୍ରେ ୨୦୦ଟି ବୁଥ ମଧ୍ୟରୁ ୧୨୮ଟି ଉତ୍ତେଜନା ଓ ୪୯ଟି ଅତି ଉତ୍ତେଜନାପ୍ରବଣ ବୁଥ ରହିଛି। ନୂଆଁଗାଁ ବ୍ଲକରେ ୫୬ଟି ଉତ୍ତେଜନାପ୍ରବଣ ଓ ୨ଟି ଅତି ଉତ୍ତେଜନା ପ୍ରବଣ ବୁଥ ରହିଥିବା ବେଳେ ବିଶ୍ରା ବ୍ଲକର ୨ଟି ଜୋନ୍ ରେ ଥିବା ୧୮୮ଟି ବୁଥ ମଧ୍ୟରୁ ୭୭ଟି ଉତ୍ତେଜନାପ୍ରବଣ ଓ ୪୨ଟି ଅତି ଉତ୍ତେଜନାପ୍ରବଣ ବୁଥ ଭାବେ ଚିହ୍ନଟ ହୋଇଛି। ସେଗୁଡିକରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି। ସବଡେଗା ବ୍ଲକରେ ମୋଟ ୫୦ହଜାର ୫୯୯ଜଣ ଭୋଟର ଥିବା ବେଳେ କୁତ୍ରା ବ୍ଲକରେ ୬୪ହଜାର ୭୯୫ଜଣ ଭୋଟର ରହିଛନ୍ତି। ସେହିପରି ନୂଆଁଗାଁ ବ୍ଲକରେ ମୋଟ ଭୋଟର ସଂଖ୍ୟା ୭୮ହଜାର ୯୯୬ ଥିବା ବେଳେ ବିଶ୍ରା ବ୍ଲକରେ ୫୦ହଜାର ୩୭୪ ଜଣ ଭୋଟର ରହିଛନ୍ତି। ଦ୍ୱିତୀୟ ପର୍ଯ୍ୟାୟ ନିର୍ବାଚନରେ ୪୧ ଜଣ ଜିଲାପରିଷଦ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ ହେବ ।