ରୂପସା,୨।୯(ଡି.ଏନ.ଏ.): ବାଲେଶ୍ୱର ସଦର ବ୍ଲକ ଅଧୀନ ହଳଦୀପଦା ଅଞ୍ଚଳରେ ବୁଧବାର ଚଢ଼ାଉ କରି ବସ୍ତା ଥାନା ପୋଲିସ ୨ଜଣ ବ୍ରାଉନସୁଗାର ବେପାରୀଙ୍କୁ ଗିରଫ କରିଛନ୍ତି। ଗିରଫ ଅଭିଯୁକ୍ତ ହେଲେ ଏହି ଥାନା ଅଧୀନ ସିଙ୍ଗାରପୁର ଗ୍ରାମର ସେକ ଯଲାଲ ଓ ତାଙ୍କ ବିବାହିତା ଝିଅ ସାଇନା ବିବି।
ସବ୍ଇନ୍ସପେକ୍ଟର ରାଜଲକ୍ଷ୍ମୀ ନାୟକ ଓ ପ୍ରଭାକର ସାହୁ ପାଟ୍ରୋଲିଂ କରୁଥିବା ବେଳେ ଅଭିଯୁକ୍ତ ବାପା, ଝିଅଙ୍କୁ ସନ୍ଦେହରେ ଅଟକାଇ ପଚରାଉଚୁରା କରିଥିଲେ। ସେମାନଙ୍କଠାରୁ ୬.୩୫ ଗ୍ରାମ ବ୍ରାଉନସୁଗାର, ନଗଦ ୯୫ହଜାର ୧ଶହ ଟଙ୍କା ଓ ୨ଟି ମୋବାଇଲ ଫୋନ ଜବତ ହୋଇଥିଲା। ଜବତ ବ୍ରାଉନସୁଗାର ମୂଲ୍ୟ ୬୩ ହଜାର ୫ଶହ ଟଙ୍କା ହେବ ବୋଲି ପୋଲିସ କହିଛି। ଏହି ସମ୍ପର୍କରେ ଥାନାରେ ଏକ ମାମଲା (ନଂ.୨୫୭/୨୧) ରୁଜୁ ହୋଇ ଗିରଫ ବାପା, ଝିଅଙ୍କୁ ଗୁରୁବାର କୋର୍ଟ ଚାଲାଣ କରାଯାଇଛି। ଘଟଣାସ୍ଥଳରୁ ଅଭିଯୁକ୍ତ ସେକ୍ ଯଲାଲଙ୍କ ପୁଅ ସେକ ସଫିରୁଦିନ ଫେରାର ହୋଇଯାଇଛନ୍ତି।