ସଇଁତଳା,୨୨ା୧୦ (ରାଖାଲ ପ୍ରସାଦ ଶତପଥି): ବଲାଙ୍ଗୀର ଜିଲା ସଇଁତଳା ଥାନା ବେଲଗାଁ ଫାଣ୍ଡି ଅନ୍ତର୍ଗତ ପିପୃଟ ଗ୍ରାମ ନିକଟରେ ରବିବାର ରାତିରେ ଏକ ସଡ଼କ ଦୁର୍ଘଟଣାରେ ବାପାଙ୍କ ମୃତ୍ୟୁ ଘଟିଥିବା ବେଳେ ପୁଅ ଆହତ ହୋଇଛନ୍ତି। ମୃତକ ହେଲେ କରମତଲା ପଞ୍ଚାୟତ ଝିମନପାଲି ଗ୍ରାମର ଲକ୍ଷ୍ମଣ ଭୋଇ(୪୫)। ତାଙ୍କ ପୁଅ ଅନୀଲ ଭୋଇ(୨୦) ଆହତ ହୋଇଛନ୍ତି।
ଉଭୟେ ଦୁର୍ଗାପୂଜା ଦେଖିବା ପାଇଁ ବାଇକ୍ ଯୋଗେ ଶିଶକେଲା ଯାଉଥିଲେ। ୨୬ ନମ୍ବର ଜାତୀୟ ରାଜପଥ ପିପୃଟ ନିକଟରେ ବାଇକ୍କୁ କୌଣସି ଗାଡ଼ି ଧକ୍କା ଦେଇ ଫେରାର ହୋଇଯାଇଥିଲା। ଉଭୟେ ବାଇକରୁ ଛିଟିକି ରାସ୍ତାରେ ପଡ଼ିଥିଲେ। ଖବର ପାଇ ସଇଁତଳା ଥାନା ପୋଲିସ ଉଭୟଙ୍କୁ ଉଦ୍ଧାର କରି ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଇଥିଲା। ହେଲେ ସେଠାରେ ଡ଼ାକ୍ତର ବାପା ଲକ୍ଷ୍ମଣଙ୍କୁ ମୃତ ଘୋଷଣା କରିଥିଲେ।