ବଡବିଲ,୬।୧୦(ଦେବପ୍ରିୟ ରଣା): କେନ୍ଦୁଝର ଜିଲା ବଡ଼ବିଲ ଥାନା ଅନ୍ତର୍ଗତ ୫୨୦ ନମ୍ବର ଜାତୀୟ ରାଜପଥର କାଶିଆ ଛକ ନିକଟରେ ଶୁକ୍ରବାର ଅପରାହ୍ନରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି। ଏଥିରେ ବାପାଙ୍କର ମୃତ୍ୟୁ ଘଟିଥିବା ବେଳେ ତାଙ୍କ ୫ ବର୍ଷର ପୁଅ ଗୁରୁତର ହୋଇଛନ୍ତି। ମୃତକ ଜଣକ ଚମ୍ପୁଆ ଥାନା ବାଙ୍କ ଅଞ୍ଚଳର ପ୍ରଫୁଲ୍ଲ କାରୁଆ। ଗୁରୁତର ଶିଶୁପୁତ୍ର ଚନ୍ଦନଙ୍କୁ ଉଦ୍ଧାର କରାଯାଇ ବଡ଼ବିଲ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି।
ସୂଚନା ଅନୁଯାୟୀ, ପ୍ରଫୁଲ୍ଲ ରୁଗୁଡ଼ି ଅଞ୍ଚଳରେ ରହି ସୁଇପର ଭାବରେ କାମ କରନ୍ତି। ଶୁକ୍ରବାର ବାଇକରେ ପୁଅକୁ ବସାଇ ଭଦ୍ରାସାହି ପଟୁ ରୁଗୁଡ଼ି ଅଭିମୂଖେ ଯାଉଥିଲେ। ଜାତୀୟ ରାଜପଥର ଗୋଟିଏ ଲେନ୍ରେ ଏକ ଟ୍ରକ୍ ଯାଉଥିଲା। ପ୍ରଫୁଲ୍ଲ ବାଇକ୍ରେ ଡାହାଣ ପଟେ ଅତିକ୍ରମ କରୁଥିବା ବେଳେ କାଶିଆ ଛକରେ ଟ୍ରକ ଡ୍ରାଇଭର ଡାହାଣକୁ ଟ୍ରକ୍ କାଟିଦେବାରୁ ବାଇକ ସହ ଟ୍ରକ୍ ଧକ୍କା ହୋଇଥିଲା। ଟ୍ରକ୍ ଧକ୍କାରେ ପ୍ରଫୁଲ୍ଲଙ୍କ ବେକ କଟିଯାଇ ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା। ଦୁର୍ଘଟଣାରେ ପ୍ରଫୁଲ୍ଲଙ୍କ ପୁଅ ଚନ୍ଦନ ମୃତ୍ୟୁ ମୁଖରୁ ବର୍ତ୍ତି ଯାଇଥିବାବେଳେ ତାଙ୍କର ବାମ ଗୋଡ଼ ଭାଙ୍ଗି ଗୁରୁତର ହୋଇଥିବା ଜଣାପଡ଼ିଛି। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚତ୍ ଟ୍ରକକୁ ଜବତ କରି ତଦନ୍ତ ଜାରି ରଖିଛି। ଟ୍ରକ୍ ଡ୍ରାଇଭରଙ୍କ ବେପରୁଆ ଗାଡ଼ି ଚାଳନା ଯୋଗୁ ବାଇକ ଆରୋହୀଙ୍କ ଜୀବନ ଚାଲିଗଲା ବୋଲି ଲୋକେ ଅଭିଯୋଗ କରିଛନ୍ତି। ଏନେଇ ଥାନାରେ ଏକ ମାମଲା(ନଂ.୨୮୩/୨୩)ରେ ରୁଜୁ ହୋଇଛି।